မနဳလာ၊ အံက်တဝ်ဗာ ၄
ဂျပါန် ကေုာံ ဍုၚ်ဖဳလေတ်ဖေန်ၜါဍုၚ် သွက်အခေါၚ်က္ဍစိုပ် စပ်ကဵုပရေၚ်ပၞာန်တံကဵု ကောန်ဒပ်ရေၚ်သ္ကအ် သွက်ဂွံသၠာဲဂတးညးသ္ကအ်မာန် ရန်သာ်ဏံတုဲ က္ဍိုပ်သ္ကိုပ်ကၟိန်ဍုၚ်ဂှ်ၜါဍုၚ် ထ္ပက်လဝ်စၟတ်တဲ တၚ်တုပ်စိုတ် သွက်ဂွံဒက်ဂကောံဒပ်ပံၚ်ကောံရ။
ပွမရေၚ်တၠုၚ်သာ်ဏံဂှ်ဝွံ အခိၚ်ပြဝကြုက် က္ဍုဟ်မၠေံဂၠါဲသၞတံ သၠုၚ်တိုန်ကၠုၚ်ဒၟံၚ်ဂှ်ကဵု ပရေၚ်ကြံၚ်မ္ၚိုဟ် စပ်ကဵုတရဴဍာ် အပ္ဍဲဒေသတံ သၠုၚ်တိုန်ဒၟံၚ်ဂှ် မံက်တိတ်ကၠုၚ်လဝ်ရ။
က္ဍိုပ်သ္ကိုပ်ဂျပါန် ကေုာံ ဖဳလေတ်ဖေန်တံဝွံ သွက်ဂွံဒုၚ်ဂါန် ကုတၚ်ရေၚ်တၠုၚ် မပ္တိတ်ကၠုၚ်ဇြဟတ် ညံၚ်ဂွံဇီုကပိုက် ကုအဝဵုအပိုၚ်အခြာကၟိန်ဍုၚ်နာနာ မဆေၚ်စပ်ဂမၠိုၚ် မၞုံအပ္ဍဲၜဳကြုက်သၠုၚ်ကျာကဵု ဗၟံက်တံဂှ်တုဲ တုပ်လဝ်စိုတ် သွက်ဂွံပံၚ်တောဲကၠောန်အာ ကရောံကၟိန်ဍုၚ်ပံၚ်ကောံအမေရိကာန်ရ။
“သွက်ဂွံစ ပရေၚ်ပ္ညဳပ္ညပ်သဳကၠဳညးသ္ကအ်ဂှ်တုဲ ကြဴနူသ္ဂုတ်သွာတ်လဝ် တၚ်တုပ်စိုတ် စပ်ကဵုပရေၚ်ပၞာန်တံတုဲဂှ် ညံၚ်သီုပိလ္ပာ် ပရေၚ်ပံၚ်တောဲရေၚ်တၠုၚ်အာတံ ဇြဟတ်ဂွံခိုဟ်ဂှ်လေဝ် တုပ်လဝ်စိုတ်ရ” သာ်ဝွံ သ္ကိုပ်ဝန်ဇၞော်ဂျပါန် ကဳယှဳဒါ ဟီုဂးလဝ်ကဵု အ္စာပရိုၚ်ဂမၠိုၚ်ရ။
ကၟိန်ဍုၚ်ဂျပါန် ကေုာံ ဖဳလေတ်ဖေန် ၂ ဍုၚ် လ္ဂောံကဵုပရေၚ်ပၞာန် မပံၚ်လဝ်တဲ ကုအမေရိကာန်ဂှ်ဝွံ ဒစဵုဒစးကၠုၚ်လဝ် ကုအကာဲအရာကြုက် မဂၠါဲသၞ အပ္ဍဲဗလးၜဳတံဂှ်ကဵု က္ၜၚ်ကြုက် မလုပ်စိုပ်ကၠုၚ်လဝ်တံဂှ် အဆက်က်ရ။
တၚ်တုပ်စိုတ်သာ်ဏံဂှ်ဝွံ ပ္ဍဲအကြာဖဳလေတ်ပေန်ကဵု ကၟိန်ဍုၚ်အမေရိကာန်တံဂှ်လေဝ် ချုက်လဝ်ကီုတုဲ သွက်ဂွံကေတ်လျိုၚ် ပရေၚ်ဖျေံဒပ် လ္ဂောံကဵုပရေၚ်ပၞာန်တံ နကဵုအလန်ဂှ်ကဵု သွက်ဂွံရေၚ်တၠုၚ် တန်ဗ္တောန်ပရေၚ်ပၞာန်တံ သၠဲသၠဲလးလး မဒှ်ရောၚ်ဂှ် ဂွံတီကေတ်ရ။
ဟိုတ်နူတၚ်တုပ်စိုတ်ဏံတုဲ ဂျပါန်ဝွံ ပ္ဍဲကဵုအစဳဇန်သ္ပအထံက်အရီု ကုပရေၚ်ဂီုကၠီုကၟိန်ဍုၚ်သ္အာၚ်တံဂှ် သွက်ဂွံသၠုၚ်ပ္တိုန် ပရေၚ်ဂီုကၠီုရေဒါ ရေၚ်ၜဳဖဳလေတ်ဖေန်ဂှ် ကဵုအာသြန်ဂျပါန် ၆၀၀ ပြကောဋိကိုဋ်ဏောၚ်ဂှ် ဂွံတီကေတ်ရ။
Ref; Reuters
sanlontai