ဒူဗိုၚ်၊ နဝ်ဝေမ်ဗာ ၂၇
ဍုၚ်အဳရာန် မရီုဗၚ်ကဵုဒၟံၚ် ဂကောံဟာမာသ် ကေုာံ ဂကောံဟေဿဗိုဝ်လာ မဒှ်ဂကောံဗ္တိုက်ဒၟံၚ် အေဿရေ ပ္ဍဲဂါဇြာတံကဵု ပ္ဍဲလက်ဗနန်ဂှ် က္ဍိုပ်သ္ကိုပ်အဳရာန် အာယာတိုဝ်လာ အလဳ ခါမေနဳ ဟီုလဝ် ပ္ဍဲဂိတုနဝ်ဝေမ်ဗာ ၂၅ တေံ စၞးပ္တိတ်လိက်ဝါရာန်ဂှ် ထေက်ကဵုဒးဖျေံဒဏ်ဂစိုတ် ကုက္ဍိုပ်သ္ကိုပ်အေဿရေတံဂှ်ရ။
ပ္ဍဲဂိတုနဝ်ဝေမ်ဗာ ၂၁ တေံ ရုၚ်သၞောဝ်ဓဝ်အမှုရာဇဝတ်ဍုၚ်နာနာ ICJ စပ်ကဵုပ္တိတ်ကၠုၚ်လိက်ဝါရာန် ကုသ္ကိုပ်ဝန်ဇၞော်အေဿရေ ဗေန်ဂျမေန် နေတာန်ညာဟု၊ ဝန်ဇၞော်ကာစဵုဒၞါတြေံ ကေုာံ က္ဍိုပ်သ္ကိုပ်ဟာမာသ် အေဗရာဟေန် အေဝ် မာသရဳတံဂှ်တုဲ က္ဍိုပ်သ္ကိုပ်ဇၞော် ဍုၚ်အဳရာန် ခါမေနဳ ဟီုကၠုၚ်လဝ် သာ်ဏံရ။
ၜိုတ်ဆပ္တိတ်လိက်ဝါရာန်သၟးဂှ် ဟွံရုမ်ဂပ်တုဲ သွက်က္ဍိုပ်သ္ကိုပ်ရာဇဝတ်တံဏံဂှ် ဒးပ္တိတ်ဒဏ်ဂစိုတ်ဏောၚ်ဂှ် က္ဍိုပ်သ္ကိုပ်ဇၞော် ခါမေနဳ ရန်ကဵုက္ဍိုပ်သ္ကိုပ်အေဿရေဂမၠိုၚ်တုဲ ဟီုလဝ်ရ။
အပ္ဍဲကဵုပရေၚ်ဗ္တိုက် ညးဍုၚ်ကွာန်ကောန်အရာပ်တံ ဇၞော်ဇၞော်သၠဲသၠဲ မစှ်ေကဵုသၞောတ် ပ္ဍဲကဵုဂါဇြာဂှ် သ္ကိုပ်ဝန်ဇၞော်နေတာန်ညာဟုကဵု ဝန်ဇၞော်ကာစဵုဒၞါတြေံ ဂဝ်လတံ ဒဒှ်ရရပ်စပ်ကၠုၚ် ပရေၚ်ဂစိုတ်မၞိဟ်၊ ပရေၚ်ဍဵုဍိုက်၊ ပရေၚ်ကၠောဝ်ဗျဵုတံ ပ္ဍဲအရာမဝေၚ်ပၞာန်တံဂှ် ဂွံဆဵုကေတ် သက်သဳဂမၠိုၚ်ရောၚ် နာဲဗ္စာ ICC တံ ဟီုလဝ်ရ။
တၚ်သ္ဂုတ်သွာတ်ဏံဝွံ ဒှ်အရာသ္ဇက်ဒးဂွခိုဟ်မွဲ ဒှ်တၚ်သ္ဂုတ်သွာတ် ဟွံဂပ်ဝ်မွဲရောၚ် အေဿရေ ကလေၚ်ခၠေဝ်ပလန်ကၠုၚ် သီုဒေါသရ။
ညးဍုၚ်ကွာန်ဂါဇြာတံဂှ်တှ်ေ ဟိုတ်နူတၚ်သ္ဂုတ်သွာတ်ရုၚ်သၞောဝ်ဓဝ်ဏံတုဲ ညံၚ်ပရေၚ်ဗ္တိုက် ပကီုပရာပ်တံဏံ ဂွံတုဲဒှ်အာဂှ်ကီု၊ ညံၚ်ဂွံကေတ်ကဵုဒုဟ် ကုညးမကလိလောန်အမှုရာဇဝတ်ပၞာန်တံ ဂတမုက်သၞောဝ်ဓဝ်တံဂှ် ဒှ်တဴအထံက်အရီုဏောၚ်ဂှ် စၟဳဒၟံၚ်အိုတ်ရ။
အေဿရေ တးပါဲကၠေံ ပရေၚ်စဳရေၚ်ဂဗုတ် နူရုၚ်သၞောဝ်ဓဝ် ICC ဖျေံသ္ဇိုၚ်ဍုၚ်တဳဟုက်ဂှ်တုဲ ကလိလောန်လဝ် အမှုရာဇဝတ်ပၞာန် ပ္ဍဲဂါဇြာ ဟွံမွဲပုဟ်ဂှ် ကယျာန်ပါဲလဝ်ရ။
ပ္ဍဲဂိတုအံက်တဝ်ဗာ ၇ သၞာံ ၂၀၂၃ ဂှ် ICC ပ္တိတ်လဝ်ဝါရာန် ကုက္ဍိုပ်သ္ကိုပ်ဟာမာသ် အေဝ် မာသရဳ နကဵုတၚ်စောဲစပ် ဂစိုတ်မၞိဟ်ကဵုဂအုံဗွဝ်၊ ပလီုကောန်ဗြဴညး၊ တံၚ်ရပ်မၞိဟ်အာတ်သြန် အပ္ဍဲကဵုပရေၚ်လုပ်စိုပ်ဗ္တိုက်လဝ် သ္ကုတ်သၠုၚ်ကျာဍုၚ်အေဿရဂှ်ေရ။
ညးတံ ၚးတးပသောၚ်ထောံလဝ် က္ဍိုပ်သ္ကိုပ်ဟာမာသ် အေဝ် မာသရဳဏံ အပ္ဍဲကဵုပရေၚ်ဗ္တိုက်ကဵုပၞာန်ကျာဂှ်ရောၚ် အေဿရေ ဟီုလဝ်ကီုလေဝ် ဟာမာသ်ဂှ်တှ်ေ တးပါဲလဝ်လေဝ်ဟွံမွဲ ဒုၚ်လဝ်ဝန်လေဝ် ဟွံမွဲရ။
ပြဟ်ဟ်ဏံ အကြာအေဿရေ ကေုာံ ဟာမာသ်၊ ဂကောံဟေဿဗိုဝ်လာ ပ္ဍဲဍုၚ်လက်ဗနန်တံဂှ် ညန်ကြပ်ကၠုၚ်ဒၟံၚ်ကဵု သ္ဂောံဂွံတၚ်တုပ်စိုတ် ပရေၚ်ဒေါအ်ပန်ပှော်တံယျဂှ် အခိၚ်အမေရိကာန် ဟီုကၠုၚ်လဝ်ဂှ် သွက်တၚ်တုပ်စိုတ်ဏံဂှ် အေဿရေ ဂွံဖျေံသ္ဂုတ်သွာတ် နွံဒၟံၚ်ရ။
Ref: Reuters