လာယှိုဝ်၊ နဝ်ဝေမ်ဗာ ၂၇
ပရေၚ်ပၞာန် ၁၀၂၇ မက္တဵုဗဒှ်လဝ်ကဵု လ္ပာ်ကံၚ်ဇြဳပၞာန်တံ ညံၚ်ဂွံကျဗြံ တုဲဒှ်အာတုဲဂှ် ဂကောံကဝ်က MNDAA ကဵု ဂကောံတအာၚ် TNLA တံဝွံ ဟိုတ်နူအလဵုအသဳကြုက် လုပ်ပ္ညဳပ္ညပ်ကဵုအကြာတုဲ သ္ဂောံဆဵုဂဗသဳကၠဳကဵု ကံၚ်ဇြဳပၞာန်ဂှ် လလောၚ်ပ္တိတ်ကၠုၚ်လစွံစိုတ်ညးသ္ကအ်ရ။
ဂကောံမဟာမိတ်ကောဒေံ MNDAA ကဵု TNLA တံဝွံ အပ္ဍဲပရေၚ်ပၞာန် ၁၀၂၇ တေံဂှ် သီဂွံလဝ်တိဍာ်ကံၚ်ဇြဳပၞာန် မအုပ်ဓလီုလဝ် ပ္ဍဲရးသေံသ္ကုတ်သၟဝ်ကျာတံ ကြပ်သီုဖအိုတ်ဂှ်တုဲဂှ် ဒးဆေၚ်ဒၟံၚ်မုက်ကဵု သီုပရေၚ်ဗ္တိုက်ကဵုပၞာန်ကျာ သီုဇြဟတ်ဂရိုဟ် နူအလဵုအသဳကြုက်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဟိုတ်နူပရေၚ်ဗ္တိုက် နူဂကောံပၠန်ဂတးတံဂှ်တုဲ ဇြဟတ်ဍိုန်ဒၟံၚ်ကီုလေဝ် ပရေၚ်အုပ်ဓုပ်ပၞာန် နွံဒၟံၚ်ဏီဂှ်ရ နကဵုဍုၚ်သ္အာၚ်ဂမၠိုၚ် ဒးဆက်ဆောံဒၟံၚ် ကုကံၚ်ဇြဳပၞာန် မကေမ်ၛှာပ်လဝ် အဝဵုအာဏာစက်ဗဟဵုဂှ်ရ။
ဣဏံဝွံ အပ္ဍဲပရေၚ်အုပ်ဓုပ်ကၟိန်ဍုၚ်ဂှ် ဒပ်ပၞာန် တန်ကၠုၚ်ဒၟံၚ် မွဲဒကုတ်မွဲဒကဴတုဲတုဲဂှ်ရ ပရေၚ်မဇီုကပိုက်က္တဵုဒှ်ကၠုၚ်တံဂှ် စိုပ်ကၠုၚ်ဍာ် သ္ဂောံဆဵုဂဗသဳကၠဳတံဂှ်ရောၚ် ညးခါတ်အကာဲပရေၚ်ဍုၚ်ကွာန်လ္ၚဵု ထံက်ထ္ၜးလဝ်ရ။
MNDAA ကဵု TNLA တံ အခိၚ်ခြာတုဲ လလောၚ်ပ္တိတ်ကၠုၚ်တၚ်လလောၚ်တြး သွက်ဂွံဆဵုဂဗသဳကၠဳပရၚ်ဍုၚ်ကွာန် ကုကံၚ်ဇြဳပၞာန်ဂှ်ကီုလေဝ် ဆက်ရပ်စပ်အာ အခေါၚ်စဵုဒၞါ ဇကုဇကုဂှ်ရောၚ် ဗီုညးကဵုညး ကဵုလဝ်သမ္တီအိုတ်ရ။
သုတေသဳပရေၚ်ဍုၚ်ကွာန်မွဲတၠဂှ် ကံၚ်ဇြဳပၞာန်ဝွံ သၞာံဂတဏံ သ္ဂောံကလေၚ်သီအာ အလုံဒေသရးသေံသ္ကုတ်သၟဝ်ကျာမွဲဂှ် နွံဒၟံၚ်တုဲ MNDAA ကေုာံ TNLA တံ လ္ဂောံကဵုပရေၚ်ဍုၚ်ကွာန် ဒစးဒုၚ်တုဲမိက်ဂွံစဵုဒၞါလဝ်ဂှ်ရ လလောၚ်ပ္တိတ်လဝ်လစွံစိုတ်သာ်ဏံရောၚ် သ္ၚဳဂၠိပ်လဝ်ရ။
“ကံၚ်ဇြဳပၞာန်ဂှ်တှ်ေ ကၠာဟွံဂွံစိုပ် သၞာံ ၂၀၂၅ ဂိတုမာတ် ၂၇ ဂှ် သွက်သ္ဂောံသီအာ လာယှိုဝ်မပါလုပ် သီုကဵုအလုံဒေသရးသေံသ္ကုတ်သၟဝ်ကျာမွဲဂှ် နွံရ။ ခြာဟွံလအ် စထ္ပက်အာပၞာန်ရဏောၚ်။ MNDAA ကဵု TNLA တံဂှ် လ္ဂောံကဵုပရေၚ်ဍုၚ်ကွာန် မိက်ဂွံဒစးဒုၚ်စဵုဒၞါလဝ်ဂှ်တုဲ လလောၚ်ပ္တိတ်လဝ်သာ်ဏံရ။ ကံၚ်ဇြဳပၞာန် ထ္ပက်ကၠုၚ်ပၞာန်မ္ဂး နဒဒှ်အခေါၚ်စဵုဒၞါဇကုဇကုဂှ် ကလေၚ်ပံက်ကၠုၚ်မုက်ပၞာန်ဂွံဏောၚ်။ သီုကဵုဝေၚ်ပါဲအာ ဇြဟတ်ဂရိုဟ်ကြုက်တံ မွဲတဲဓဝ် ဒှ်အာဏောၚ်” သာ်ဝွံ သ္ဂးရ။
ပ္ဍဲကဵုတၚ်လလောၚ်တြး TNLA ဂှ် ထံက်ရံၚ်ကဵုညးဍုၚ်ကွာန်ဒေသ ဒးဒုၚ်စသိုၚ်ဒၟံၚ်ဘဲပၞာန်တံဂှ်တုဲ နဒဒှ်သ္ပစၟတ်သမ္တီ ပရေၚ်အလဵုအသဳကြုက် ပ္တိတ်ကၠုၚ်ဇြဟတ် သွက်ပယျဵုဂွံညိၚ်ဝတ် ကေုာံ ညံၚ်ပေါဲဗ္တိုက်ဂွံဒေါအ်ဒေၚ်ဂှ်တုဲ ဂွံဆဵုဂဗသဳကၠဳ ဒှ်ဒၟံၚ်ဒတုဲရောၚ် ပ္ဍဲဂိတုနဝ်ဝေမ်ဗာ ၂၅ တေံ လလောၚ်တြးလဝ်ရ။
ပဋိပက္ခပရေၚ်ပၞာန်တံ တုဲဒှ်တုဲ ဂွံဒက်ပ္တန် အကာဲအရာပရေၚ်ဍုၚ်ကွာန် မၜိုဟ်သြိုဟ်ညိၚ်ဝတ်မွဲမာန် ပရေၚ်အလဵုအသဳကြုက် မလုပ်အကြာပ္ညဳပ္ညပ်ကဵုဂှ် သွက်သ္ဂောံဂွံသွဟ်မခိုဟ်ပြဲမွဲတုဲ TNLA ဆက်ပံၚ်တောဲရေၚ်တၠုၚ်အာဏောၚ် သ္ဂးရ။
MNDAA ဂှ်လေဝ် အလဵုအသဳကြုက် သွက်ဂွံလုပ်ပ္ညဳပ္ညပ်ကဵုအကြာ ပ္ဍဲကဵုအကာဲအရာပရေၚ်ဍုၚ်ဗၟာဏံဂှ် အာတ်မိက်လဝ်တုဲ နကဵုဂၠံၚ်ဍာန်ပရေၚ်ဆဵုဂဗသဳကၠဳဂှ် ဂၠါဲအာသွဟ် ပဋိပက္ခတံဂှ်ဏောၚ်ဂးတုဲ ပ္ဍဲဂိတုသေပ်တေမ်ဗာ ၁၈ တေံ ကဵုလဝ်သမ္တီရ။
ဒံက်တာသာၚ်ကျဳဇြေန်သဵု ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ် သွက်ဂွံအုပ်ဓလီုတိဍာ်ဂှ် နကဵုဂကောံဂွံလဝ်စေဝ်လ္တူတံဂမၠိုၚ် ဒက်ပ္တန်အာဗီုပြၚ်ပရေၚ်အုပ်ဓုပ်အပိုၚ်တံမာန်ဟာ ဒုၚ်သ္ဇိုၚ်ကဵုပရေၚ်သဳကၠဳသာ်ဏံတုဲ ချပ်ဒၟံၚ်အိုတ်ရောၚ် သ္ၚဳဂၠိပ်လဝ်ရ။
“ဗွဲတၟေၚ် ကြဴနူ ၁၀၂၇ တုဲဂှ် ချဳဒရာၚ်ကၠုၚ်တုဲ သွက်ညးတံ ဂွံအုပ်ဓုပ်တိဍာ်ဒေသတံဂှ် နကဵုဂကောံဂွံကၠုၚ်စေဝ်လ္တူဂမၠိုၚ်မ္ဂး အကာဲအရာလၟုဟ်ဏံ ယဝ်သဳကၠဳဏောၚ်ဟီုမ္ဂး သီကၠဳဂွံဏောၚ် ညးတံချပ်ဒၟံၚ်သာ်ဏံလေဝ် နွံ။ ယဝ်ရ ချပ်ကၠုၚ်သာ်ဏံမ္ဂး တိဍာ်ဒေသညးတံဂှ် ကလေၚ်ဒက်ပ္တန်အာ ဗီုပြၚ်ပရေၚ်အုပ်ဓုပ်အပိုၚ်ညးတံ မွဲမွဲမာန်ဟာ ပရေၚ်သဳကၠဳသာ်ဏံတံ ကၠောန်ကၠုၚ်မာန်ဏောၚ်။ ဒုၚ်သ္ဇိုၚ်ကဵုအရာတံဏံတုဲ ချပ်ဒၟံၚ်ညးသ္ကအ်ရောၚ် ကၠိုဟ်ကေတ်ရ” သာ်ဝွံ သ္ဂးရ။
ပ္ဍဲကဵုပရေၚ်ပၞာန် ၁၀၂၇ မစကၠုၚ်လဝ် သၞာံတုဲကၠုၚ် ပ္ဍဲဂိတုအံက်တဝ်ဗာတေံဂှ် ပ္ဍဲကဵုတၚ်ရန်တၟံဂမၠိုၚ် ဒေသညးတံ ညံၚ်ညးတံဂွံအုပ်ဓုပ်ကေတ်မာန် တၚ်နၚ်ဏံ ပါလုပ်ရ။ ဟိုတ်ဂှ်ရ ပရေၚ်အုပ်ဓုပ်ကံၚ်ဇြဳပၞာန် ကေုာံ စက်ယန်ပရေၚ်ပၞာန် နွံမံၚ်ပ္ဍဲဒေသတအာၚ် ကေုာံ ပ္ဍဲကဝ်က ရးသေံသၟဝ်ကျာတေံ အလုံမွဲဂှ် ဒးဒုၚ်သရိုဟ်ဖျေံလဝ်ရ။
ပရေံအိုတ်ဂှ်တှ်ေ ကြဴနူကံၚ်ဇြဳပၞာန်တံ ဒးဗလးကၠုၚ်တဲ ဌာန်ဂအုပ်ပၞာန်ရးဨသာန် ဖျေံသ္ဇိုၚ်ဍုၚ်လာယှိုဝ် ပ္ဍဲကဵုအၚ်္ဂပၞာန် ဒှ်ဂၞန် ၃ ဂှ်တုဲဂှ် ကြပ်အရိုဟ်တ္ၚဲ ကၠုၚ်စိုပ်ထောံမခတိုဟ် ဗ္တိုက်ဒၟံၚ် ဍုၚ်ကွာန်မဒးဆောံလေၚ်လဝ်တံ နူကဵုပၞာန်ကျာတံဂှ်ရ။
စပ်ကဵုပရေၚ်ဏံတုဲ ညံၚ်ဗ္ဒိုပ်ဒပ်ကံၚ်ဇြဳပၞာန်တံ ညံၚ်ကောန်ဒပ်တံ ဂွံအိုတ်အးအာဂှ် TNLA ဗ္တိုက်ပ္တိတ်မာန်ကီုလေဝ် ကုပရေၚ်ဗ္တိုက်ကဵုက္ၜၚ်ကျာ မစွံပွန်ကဵုညးဍုၚ်ကွာန်တံဂှ် ညးဍုၚ်ကွာန်ဟၟဲကဵုဒုဟ်ဒဏ်တံ ဒးဒုၚ်စသိုၚ်ဒၟံၚ် ဗွဲမသ္ကာတ်မြဟ်ရောၚ် သ္ဂးရ။
ဟိုတ်ဂှ်ရ ထံက်ရံၚ်ညှာတာကဵု ညးဍုၚ်ကွာန်မ္ဒးဒၟံၚ်ဘဲပၞာန်တံဂှ်တုဲ ရပ်စပ်အာအခေါၚ်စဵုဒၞါဇကုဇကုတံဂှ်တုဲ ဂွံသောၚ်ကလးအာ ပြဒ္ဒညာနာနာမာန် ရန်သာ်ဏံတုဲ သွက်ဂွံဆဵုဂဗသဳကၠဳဂှ် TNLA ဒှ်ဒၟံၚ်ဒတုဲတွဵုရောၚ်ဂးတုဲ လလောၚ်တြးလဝ်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် အခါၜါလ္ပာ်ဆဵုဂဗသဳကၠဳညးသ္ကအ် လ္ပာ် TNLA အာတ်မိက်ကၠုၚ် ကံၚ်ဇြဳပၞာန် သွက်ဂွံဒေါအ်ပၞာန် သွက်ဂွံဒေါအ်ကဵု ပရေၚ်ပန်ပှော်ကဵုလွဟ်ဇၞော် ကေုာံ ပရေၚ်ဗ္တိုက်ကဵုပၞာန်ကျာတံဂှ်ဏောၚ်ဂှ် သ္ၚဳဂၠိပ်လဝ်ရ။
“လ္ပာ်ညးတံ (TNLA) ဂှ်လေဝ် ကြုက်ဗဒေါအ်ကဵုပၞာန်ဂွံဏောၚ်။ ဆ္ဂး လ္ပာ်ညးတံလေဝ် အာတ်မိက်ကၠုၚ်ကီုဏောၚ်။ အရာမေန်အံၚ်လှာၚ် မစၟတ်လဝ် နဒဒှ်ဂကောံဇြဟတ်ပကီုပရာပ်တံဂှ် ဒးရုပ်သီကဵုဏောၚ်။ တုဲပၠန် ပၞာန်ထ္ပက်ကဵုက္ၜၚ်ကျာ ကေုာံ ပန်ပှော်ဒၟံၚ်ကဵုလွဟ်ဇၞော်တံဂှ် ဒးဒေါအ်ကဵုဏောၚ်။ တၚ်အာတ်မိက်အရာတံဏံဂှ် အာတ်မိက်ကၠုၚ်ဏောၚ်” သာ်ဝွံ သ္ဂးရ။
ဆ္ဂး ပြဟ်ဟ်ဏံ ဂွံဆဵုဂဗသဳကၠဳဂှ် ဟွံချိုတ်ပၠိုတ်ကီုလေဝ် ပရေၚ်ဗ္တိုက်ပၞာန်ကျာ ကေုာံ ပရေၚ်ဗ္တိုက်ပရေၚ်ပၞာန်တံဂှ်တှ်ေ လ္ပာ်ကံၚ်ဇြဳပၞာန် ဆက်ကၠောန်ဒၟံၚ်ဂှ်ရ သွဟ်ပေါဲသဳကၠဳဂှ်ဝွံ ထ္မံက်အာရုပ်ရဴနတဲမာန် ဟွံသေၚ်ပုဟ်ဂှ် ညးထံက်ထ္ၜးလဝ်ရ။
နကဵုသြၚ်လောန်တိုၚ်(မ်) စပ်ကဵုပရေၚ်ဆဵုဂဗသဳကၠဳ TNLA ဏံဂှ်တုဲ နဗီုပြၚ်သာ်လဵု သ္ဂောံဆဵုဂဗအာ ကုကံၚ်ဇြဳပၞာန်နွံရောဟီုဂှ် ဆက်စၠောံသၟာန်သၟုက်လဝ် ဇရေၚ်ညးမၞုံအခေါၚ်ဟီုဂး (လွေးယေဦး) ကီုလေဝ် ကလေၚ်လဝ်ပရိုၚ်ဂှ်ဟွံမွဲရ။
မွဲလ္ပာ်ဂှ်ပၠန် ဂကောံဗ္တိုက်သရိုဟ်ပွပကီုပရာပ် ကဆံၚ်ဗဟဵု ကံၚ်ဇြဳပၞာန်တံဂှ် နကဵုတၚ်တုပ်စိုတ် ဂကောံအလဵုအသဳကၟိန်ဍုၚ်ဂှ် နူဂိတုသေပ်တေမ်ဗာမံက်တေံရ လလောၚ်တြးလဝ် MNDAA, TNLA, AA တံ နဒဒှ်ဂကောံပကီုပရာပ်ရ။
က္ဍိုပ်သ္ကိုပ်ပၞာန်ဂှ်တှ်ေ နကဵု MNDAA, TNLA, AA တံ ယဝ်ထ္ၜးပျးကၠုၚ်ပြဝကလောန် ပိုတ်တ်သ္ကုတ်တ် ဒဒှ်ရညးတံမၞုံပၟိက် ကုပရေၚ်ၜိုဟ်လလမ်ဂှ်မှဟေၚ် ရေၚ်တၠုၚ်အာ ပရေၚ်သဳကၠဳတံမာန်ဏောၚ်ဂးတုဲ ပ္ဍဲဂိတုနဝ်ဝေမ်ဗာ ၆ တေံ ကဵုလဝ်သမ္တီ ကုသ္ကိုပ်ဝန်ဇၞော်ကြုက်ရ။
ပရိုၚ်−သြၚ်လောန်တိုၚ်(မ်)
ဗီု−TNLA/MNDAA