မတ်မလီု၊ ဒဳဇြေမ်ဗာ ၇
ဗ္တိုက်သရီုဟ်အာ သၞောတ်တၠအဝဵုပၞာန် နကဵုပၠန်ဂတးရပ်လွဟ်တံမာန်မှဟေၚ် ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳ မဍိုက်ပေၚ်ကဵု အခေါၚ်စၞောန်ပျးအပိုၚ် ညးဍုၚ်ကွာန်တွဵုရးဍုၚ်မန်တံ မိက်သ္ဂောံဂွံဒၟံၚ်တံဂှ်ဏောၚ်ဂှ် ကံၚ်ဇြဳဖေဝ်ဒရာဍုၚ်မန် ဟီုရ။
နူကဵုကံၚ်ဇြဳပၞာန်လၟုဟ် စပ်ကဵုပရေၚ်ဗ္တိုက်ပကီုပရာပ် လ္တူညးဍုၚ်ကွာန် မၞုံအပ္ဍဲတွဵုရးဍုၚ်မန်တံဂှ်တုဲ ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ကံၚ်ဇြဳဖေဝ်ဒရာဍုၚ်မန် MSFC မဖ္တိုက်ဖ္အောဝ်လဝ် ညးဍုၚ်ကွာန်ပၠန်ဂတးဂမၠိုၚ် ကေုာံ ညးသၟတ်မန်တံ မလလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၅ ဂှ်ရ။
ညးသၟတ်မန် မၞုံအပ္ဍဲတွဵုရးဍုၚ်မန်တံကီု သီုကဵုညးသၟတ်ကောန်ဍုၚ်အရၚ်တၞဟ်သ္အာၚ်တံကီု အနာဂတ်တေံ သွက်ဂွံဒက်ပ္တန်အာ ကၟိန်ဍုၚ်ဖေဝ်ဒရာ ဍုၚ်ဗၠးၜး မၞုံကဵုအခေါၚ်တုပ်သၟဟ်တံဂှ်တုဲ သွက်ဂွံပါလုပ်ကဵု ပ္ဍဲပရေၚ်ဗ္တိုက်သရိုဟ် သၞောတ်တၠအဝဵုပၞာန်လၟုဟ်တံ နူကဵုလ္ပာ်သ္ပမာန်ဂှ် MSFC ဖ္တိုက်ဖ္အောဝ်လဝ်ရ။
ဗော်ဍုၚ်မန်တၟိ မဒှ်ဂကောံရပ်လွဟ်ကောန်ဍုၚ်အရၚ် သ္ပစၞးကောန်ဂကူမန်ဂှ် ကေမ်ၛာပ်လဝ်မူ ပြသၞာပရေၚ်ဍုၚ်ကွာန်ဂှ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်တုဲ ဟွံပါလုပ်ကၠုၚ် ပ္ဍဲကဵုပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံဂှ်ဏီဖိုဟ်ရ။
တုဲကၠုၚ် အပ္ဍဲဂိတုနဝ်ဝေမ်ဗာ သတ္တာဟဒုတိယဂှ် ကြဴနူပေါဲဗ္တိုက်ၜါသွာၚ် မၞုံအကြာတွဵုရးကရေၚ်ကဵု မန်ဂှ်တုဲ နူကဵုဗ္ဒိုပ်ဒပ်၊ တမ်ဒပ်ကံၚ်ဇြဳပၞာန် ကေုာံ ဌာန်ဂအုပ်ပၞာန်ရးအဂၞဲတံ ပန်ပှော်ဗ္တိုက်လဝ် နကဵုလွဟ်ဇၞော် နကဵုတရဴကျာ အပ္ဍဲကဵုကွာန်ရး မၞုံအပ္ဍဲပွိုၚ်ဍုၚ်ကျာ်မြဟ်တံဂှ်ရ။
ဟိုတ်နူပရေၚ်ပန်ပှော်ဗ္တိုက်ဂှ်တုဲ ပ္ဍဲကဵုကွာန် ညးဍုၚ်ကွာန်မန်တံ မံၚ်တန်တဴဒၟံၚ် အပ္ဍဲပွိုၚ်ဍုၚ်တံဂှ် ညးဍုၚ်ကွာန်ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံအိုတ်ဂှ် ကံၚ်ဇြဳဖေဝ်ဒရာဍုၚ်မန် သ္ဂးရ။
ပြဝကံၚ်ဇြဳပၞာန် ဟွံမွဲဓဝ်ဗ္စာရဏာမၞိဟ်သာ်ဏံဂှ်ဝွံ ပ္ဍဲပွိုၚ်ဍုၚ်ကျာ်မြဟ်သၟးဟွံက ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ်၊ သဓီု၊ ဇြပ်ဗု ကေုာံ ပွိုၚ်ဍုၚ်ရေဝ်တံဂှ်လေဝ် ကၠောန်သ္ပလဝ် နနဲသာ်ဏံကီုဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နကဵုကံၚ်ဇြဳပၞာန် ပၞာန်ဂှ် ဟွံဗ္တိုက်ကဵုပၞာန်မွဲသာ် ဗ္တိုက်ဒၟံၚ်လ္တူညးဍုၚ်ကွာန်ဟွံမွဲကဵုဒုဟ်ဒဏ်တံဂှ်ဝွံ ဝးပ္ကဝ်ဒၟံၚ် စေဝ်ပၞောန်စပ်ကဵုပရေၚ်ပၞာန်တံ ဇၞော်ကဵုဇြဟတ်တုဲ စပ်ကဵုကိစ္စကလိလောန်ဒၟံၚ် အမှုရာဇဝတ်ပၞာန် လ္တူဂကူမၞိဟ်တံ အလုံဍုၚ်မွဲ ပါလုပ်သီုကဵုတွဵုရးဍုၚ်မန်ဂှ် ကံၚ်ဇြဳဖေဝ်ဒရာဍုၚ်မန် ဒစဵုဒစး ဗွဲမသ္ကာတ်မြဟ်ရ။
နကဵုညးဍုၚ်ကွာန်မန်တံ ဂွံဗလးဘဲ သွက်ဂီုကၠီုဇကုဇကုဂှ် ပါဲဒၟံၚ်ဒၞါဲမၞိဟ်ကောံကလောံ၊ ၜံက်စွံလဝ် ကတိုၚ်အောပ်မာၚ် လၟိုန်န် ဒးကလၚ်ကေတ်ပရိုၚ် ဆေၚ်စပ်ကဵုပၞာန်ချဳဒရာၚ်၊ သီုကဵုကောန်ညးဍုၚ်ကွာန်တအ် ဒးဒ္ဂေတ်ဗက် တၚ်နၚ် ဗီုဒးမံၚ်ပ္ဍဲပေါဲဗ္တိုက်ရောၚ်ဂှ် ကဵုလဝ်သမ္တီရ။
အပ္ဍဲကာလညးဍုၚ်ကွာန်တံ ပါဲဒဴဒၟံၚ်ပၞာန်ဂှ် စပ်ကဵုပရေၚ်ကဵုအရီုဗၚ် ဗ္စာရဏာမၞိဟ်တံတုဲ နကဵုကံၚ်ဇြဳဖေဝ်ဒရာဍုၚ်မန် ၜိုတ်သၟဟ်အစောံ ရီုဗၚ်ကဵုဒၟံၚ်တုဲ မပ္တံကဵုဂကောံသၚ်ဂမၠိုၚ်၊ ဂကောံမှာဇန်ဂမၠိုၚ်၊ ဂကောံပရေၚ်ဍုၚ်ကွာန် အပ္ဍဲဍုၚ်ဂမၠိုၚ်တံလေဝ် ညံၚ်သ္ဂောံကဵုအရီုဗၚ်မာန်ဂှ် ဗ္တိုက်ဖ္အောဝ်ဏာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai