ကြုက် ကေုာံ မက္ကဇြဳကိုဝ် သ္ပကတိ သွက်ဂွံပံၚ်တောဲရေၚ်တၠုၚ်

ပေကျေန်၊ ဒဳဇြေမ်ဗာ ၇

ပရေၚ်ပံၚ်တောဲ ကြုက် ကေုာံ မက္ကဇြဳကိုဝ်တံဂှ်ဝွံ သွက်ဖောအ်ဗြေဝ်တောတက်ဂှ် ဒှ်အကာဲအရာခိုဟ်အိုတ်ရောၚ် ဝန်ဇၞော်ကာဍုၚ်သ္အာၚ်ကြုက် ဝါန်ယဳ စိုပ်ဒၟံၚ်ဍုၚ်မက္ကဇြဳကိုဝ် ဟီုဂးလဝ်ရ။

ဟိုတ်နူလဗိုတ်ကျာဟာရဳကုၚ် အိုဝ်တေသ် မပိုက်လဝ် ပ္ဍဲဂိတုအံက်တဝ်ဗာတုဲကၠုၚ်တေံဂှ်တုဲ ပ္ဍဲအရာကလေၚ်ဒက်ပ္တန် အရာမဒးလီုလာ် မက္တဵုဒှ်လဝ်တံဂှ် ဍုၚ်ကြုက် မရီုဗၚ်လဝ်ဂှ် ဝန်ဇၞော်ကာဍုၚ်သ္အာၚ် မက္ကဇြဳကိုဝ်လေဝ် တၚ်တဴဂုဏ်ဂှ် သ္ဂးလဝ်ရ။

ဟိုတ်နူလဗိုတ်ကျာဂှ်တုဲ သွက်ဂြောဝ်ဂတာ မက္ကဇြဳကိုဝ် မဇီုကပိုက်အာလဝ်တံဂှ် အလဵုအသဳကြုက် ရာန်ကဵုလဝ် ကပေါတ်အရပ်စပ်သ္ၚိတံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဌာနဝန်ဇၞော်ကာဍုၚ်သ္အာၚ်မက္ကဇြဳကိုဝ်ရ။

မေဿတာဝါန်ယဳဂှ် ထေက်ကဵုဒးသၠုၚ်ပ္တိုန် ပရေၚ်ပံၚ်တောဲရေၚ်တၠုၚ် ကေုာံ ပရေၚ်သၠာဲဂတးသွာၚ်ဇဳ ပ္ဍဲကဵုသွာၚ်ပရေၚ်ပိုန်ဒြပ်၊ ပရေၚ်သွံရာန်ဗၞိက်၊ ယေန်သၞာၚ် ကေုာံ ပ္ဍဲကဵုသွာၚ်တၞဟ်သ္အၚ်တံဂှ်ရောၚ် သ္ဂးလဝ်ရ။

အလဵုအသဳသီုၜါဍုၚ်ဂှ် ပ္ဍဲဂိတုအံက်တဝ်ဗာတေံ ဂကောံညးစၞး မက္ကဇြဳကိုဝ်တံ အာစိုပ်ဂေတ်ဝေၚ်လဝ် ဍုၚ်ကြုက် ဒဒှ်ရပၟိက်ဇၞော်တဴဂှ် ကဵုက္ဍိုပ်ထ္မံက်ထ္ၜးလဝ်တုဲ နူကဵုလၟေၚ်တရဴဏံမွဲကဆံၚ် ဒက်ပ္တန်လဝ် ဂကောံကမၠောန်ဗ္တိုက်သ္အး ပရေၚ်သွံရာန်ဂဥုဲဓာတု ပါလုပ်သီုကဵု fentanyl ဂှ် မက္ကဇြဳကိုဝ် ဟီုလဝ်ရ။

ဂကောံအလဵုအသဳ သမ္မတအမေရိကာန် ဂျိုဝ်ဗိုၚ်ဒေန်ဂှ်လေဝ် သွက်ဂွံတာဒၞါ ဒဒှ်မကပေါတ်ဓာတု fentanyl ဂဥုဲဇကုဇကောဝ်ဂိဗၠး အန္တရာယ်နွံ ကုလမျီုဂှ်တုဲ ထံက်လဝ်ဂလာန် ကုပရေၚ်ပံၚ်တောဲ မက္ကဇြဳကိုဝ် ကေုာံ ကြုက်တံရောၚ်ဂှ် ဂွံတီကေတ်ရ။

မက္ကဇြဳကိုဝ်ဝွံ ပရေၚ်ဆက်ဆောံ အကြာကြုက် ကေုာံ ဍုၚ်လက်တေန်အမေရိကာန်၊ ဍုၚ်ကာရေဗဳယာန်တံ အာဒၟံၚ်သဘဴပ္တောံဂှ် ကၠောန်သ္ပကၠုၚ်ဍာံဍာံပြပြရ။

က္ဍိုပ်သ္ကိုပ်ကြုက် ကေုာံ မက္ကဇြဳကိုဝ်တံဝွံ ဆဵုဂဗလဝ်ညးသ္ကအ် ပ္ဍဲမ္ၚးကောံဓရီု ပေါဲသဳကၠဳကဆံၚ်လ္တူ APEC ဂှ်တုဲ ဂွံၜါသၞာံဂှ် သွက်ဂွံဗ္တိုက်သ္အး ပရေၚ်သွံရာန်ဂဥုဲဇဗ ဟွံလုပ်သၞောဝ် ကေုာံ သွက်ဂွံသၠုၚ်ပ္တိုန် ပရေၚ်ဓလိုက်တမ်ရိုဟ် စပ်ကဵုပရေၚ်သွံရာန်ဗၞိက်တံဂှ် တုပ်လဝ်စိုတ်ရောၚ် ဂွံတီကေတ်ရ။

Ref: Reuters