ပံၚ်၊ ဒဳဇြေမ်ဗာ(၈)
အခန်ကၞာတ္ၚဲသၟတ်မန် မရနုက်ကဵု (၁၂) ဝါ ကၠုၚ်စိုပ် ပ္ဍဲဂိတုဒဳဇြေမ်ဗာ စၟတ်တ္ၚဲ (၂၈)ဏံ ကၠောန်ဗဒှ်အာ ပ္ဍဲကွာန်ဝါကပိုဟ် ပွိုၚ်ဍုၚ်ပံၚ်ရောၚ်ဂှ် ဌာန်ကောံသၟတ်မန် ကဝ်မတဳကၠောန်ဗဒှ်အခန်ကၞာ ကဵုသမ္တီ ပ္တိတ်လဝ်တၚ်လလောၚ်တြးရ။
ပ္ဍဲကဵုတၚ်ရန်တၟံ အခန်ကၞာတ္ၚဲသၟတ်မန်ဂှ်မ္ဂး ဇၟာပ်သၟတ်မန်တအ် ကောံကလောံညဳသၟဟ်တုဲ သ္ဂောံပ္တဝ်ပၞးကဵုညးဂၠးကဝ် ကဏ္ဍသွာၚ်ဇဳမာန်ကီု သီုသွက်ဂွံထိၚ်ဒဝ်မၚ်မွဲ ဇၞော်သၠုၚ်အာ မဗဳဇတၞောဝ်ဒတောဝ်ဂကူမန် အလုံံဒေသတိဍာ်ဇဳမာန်ကီုဂှ်လေဝ် ပါလုပ်ဒၟံၚ်ရ။
သ္အာၚ်နူဂှ်ပၠန် ဒက်ပခိုၚ်ပ္တိုန် ဇြဟတ်သၟတ်မန်တုဲ သ္ဂောံပါလုပ်ယိုက်ဂၠေၚ်ပတုဲဖိုလ်ဂကူမန် ကဏ္ဍပရေၚ်ဂကူမန်၊ ပရေၚ်ဍုၚ်ကွာန်၊ ကေုာံ ပ္ဍဲပရေၚ်အာက္ဍိုပ်သွာၚ်ဇဳမာန်၊ သွက်ဂွံသၠုၚ်ပ္တိုန် ဇြဟတ်သၟတ် နွံပွိုၚ်တအ်ကီု၊ သၠာဲဂတးအာလညာတ်၊ ဆာန်ကောံပံၚ်တောဲကၠောန်အာ ကမၠောန်ဂကူရၚ်သ္ကအ်တုဲ ပံၚ်ကောံအာက္ဍိုပ်မာန်ရဂှ် ဟီုလဝ်ရ။
နဒဒှ်အစဳဇန်အခန်ကၞာ ပ္ဍဲကဏ္ဍနာနာဂှ် ကရောၚ်ပၞာန်ဖံၚ်ခရာ၊ လဟိၚ်စိုတ်၊ ပေါဲပြိုၚ်လိက်ပတ်မန်ကဵု ပေါဲသၠာဲဂတးလညာတ်တအ်လေဝ် နွံရဂှ် ဓမံက်ထ္ၜးလဝ် ပ္ဍဲလိက်ဆဝ်ပ္ၚုဟ် နူဌာန်ကောံသၟတ်မန် ပ္ဍဲဂိတုဒဳဇြေမ်ဗာ စၟတ်တ္ၚဲ (၃)ရ။
အခန်ကၞာတ္ၚဲသၟတ်မန် သၞာံတုဲကၠုၚ်တေံ မရနုက်ကဵု (၁၁) ဝါဂှ် ကၠောန်ဗဒှ်လဝ် ပ္ဍဲကွာန်ဝါဇြေန်၊ ၊ခရိုၚ်ထဝါဲ၊ တိဍာ်ထိၚ်ဒဝ် ဗော်ဍုၚ်မန်တၟိတုဲ ဂကောံရပ်လွဟ် မၞုံပွိုၚ်ဍုၚ်ရေဝ်တအ် ညံၚ်ဟွံဂွံပန်ပှော်ရၚ်သ္ကအ်ကီု သီုသွက်ဂွံထံက်ရံၚ်ကဵု ပရေၚ်ဂီုကၠီုသၟတ်မန်ဂှ် ဌာန်ကောံသၟတ်မန် လလောၚ်တြးပ္တိတ်လဝ် လိက်အာတ်မိက်ဏီရ။
အခိၚ်လၟုဟ်ဏံ ပ္ဍဲပွိုၚ်ဍုၚ်သဓီု၊ ကျာ်ထဝ်၊ ၜဳကလေၚ်၊ ကျာ်မြဟ် တွဵုရးဍုၚ်မန်တအ်ဂှ် အကြာဂကောံဇြဟတ် ပၠန်ဂတးရပ်လွဟ်ကဵု ကံၚ်ဇြဳပၞာန် ပေါဲဗတိုက်ဆက်နွံဒၟံၚ်တုဲ ညးဒေသတအ် ဇီုကပိုက်ချိုတ် ဒးလဝ်ဘဲဝပ်ညးသ္ကအ်တုဲ ပါဲဒၟံၚ်ဘဲပၞာန် ဂၠိုၚ်ကဵုလ္ၚီ နွံဒၟံၚ်ရ။
ပ္ဍဲပေါဲဗတိုက်ၜါသွာၚ် ပွိုၚ်ဍုၚ်ကျာ်မြဟ် ဒှ်လဝ် ပ္ဍဲဂိတုနဝ်ဝေမ်ဗာ သတ္တာဟဒုတိယကၠုၚ်တေံတုဲဂှ် ပ္ဍဲကဵုကွာန်မန်ဗ္ဒာဲဗ္ဒာဲတအ်ဂှ် ဟိုတ်နူလွဟ်ဇၞော်စှ်ေကီု သီုကဵုပန်ပှော်ဒၟံၚ်ကဵုက္ၜၚ်ကျာတုဲ ညးဍုၚ်ကွာန်မန်တအ် ဒးပါဲဓလေတ်ဒၟံၚ် ပ္ဍဲဒၞာဲဗၠးဘဲဖိုဟ်ဏီရ။
ပရိုၚ်- သြၚ်လောန်တိုၚ်မ်
ဗီု – CJ
sanlontai