မတ်မလီု၊ ဒဳဇြေမ်ဗာ ၈
ပ္ဍဲဆေၚ်ကၠေၚ်စက် မၞုံပ္ဍဲတွဵုရးဍုၚ်မန် ဗွဲမဂၠိုၚ်ဂှ် ဟိုတ်နူကၠေၚ်စက်ပိုတ် က္တဵုဒှ်ဒၟံၚ်ဂှ်ရ ရေၚ်တုဲ ဒးမၚ်ရာန်ဒၟံၚ် အခိၚ်ဗွဲမလအ်လတုဲ က္တဵုဒှ်ကၠုၚ် စဵုကဵုပိုတ်အာလးလးတံဂှ် ဂွံတီကေတ် အတိုၚ်ဂလာန်ညးဒေသတံရ။
ကၠေၚ်စက်ပိုတ်ဂှ်ဝွံ စက္တဵုဒှ်လဝ် ပ္ဍဲဂိတုဒဳဇြေမ်ဗာ ၁ တေံတုဲ ပ္ဍဲဂိတုဒဳဇြေမ်ဗာ ၇ ဂှ် ပိုတ်ကၠုၚ်အိုတ်ဍာ်ဂှ်ကီု၊ ၜိုတ်နွံပၟိက် ရာန်ကၠုၚ်ဟွံဂွံတံသၟးဟွံက အခိၚ်ဗွဲမလအ်လ ရေၚ်တုဲ ဒးမၚ်ရာန်ဒၟံၚ်တံဂှ် ဒးဂဗဒၟံၚ်ရ။
ပ္ဍဲအရာရာန်ကၠေၚ်စက်ဂှ်လေဝ် ဆေၚ်ကၠေၚ်စက်တံဂှ် ကွဳစက်မွဲဖ္ဍိုက်ဂှ် ကွက် ၃၀၀၀၀ ဒ္ကေဝ်၊ ကွဳလိုန်ဓာတ်မွဲဖ္ဍိုက်ဂှ် နူကဵု ၃၀၀၀ ဒ္ကေဝ် စဵုကဵု ၅၀၀၀ ဒ္ကေဝ် သွံကဵုဒၟံၚ် နကဵုဗၞတ်ဗ္ၜတ်ဂှ်ရ လှုဲလှာ်နွံကီုလေဝ် ၜိုတ်နွံပၟိက်ဂှ် ရာန်ကေတ်ဟွံဂွံဒှ်ဒၟံၚ်ရ။
ညးဒေသမွဲတၠဂှ် အခိၚ်လၟုဟ် မ္ၚးနူကဵုရာန်ကၠေၚ်စက် ၜိုတ်နွံပၟိက်ဟွံဂွံဂှ် ဒးရာန်ဒၟံၚ် အတိုၚ်ၚုဟ်ဆေၚ်ကၠေၚ်တံဟီုဂှ်တုဲ ဒးမၚ် အခိၚ်ဗွဲမလအ်လတုဲ ဒးရာန်ဒၟံၚ်ဂှ်ရ ကၠောန်ကလောန်ဟွံဂွံပုဟ်ဂှ် ဟီုရ။
“ပိုယ်တံ ရေၚ်တုဲ ဒးရာန်ဒၟံၚ်ကၠေၚ်စက်တံတုဲ အကြာဏံ ညးဍုၚ်ကွာန်တံ ဒးဒုၚ်ဒၟံၚ်ဂှ်တှ်ေ ၚုဟ်တိတ်နူသၟောန်ပါၚ် ဆေၚ်ကၠေၚ်တံဂှ်ရ။ ၚုဟ်ကၠေၚ်ဂှ် ဟီုဒၟံၚ် အတိုၚ်ၚုဟ်နွံဒၟံၚ် ပ္ဍဲပါၚ်ဍေံတံရ။ မၞိဟ်ရေၚ်ဒၟံၚ်တံဂှ်လေဝ် ကၠေၚ်အောန် ကၠေၚ်ဂၠိုၚ်ဂှ် ဟွံရံၚ်ရပုဟ်။ ၚုဟ်လဵုဒးကဵုဒးကဵု အာရၚ်ဒၟံၚ်ဟဂှ်ရ။ လ္ၚဵုတံပၠန်ဂှ်လေဝ် ကၠိုဟ်တ္ၚဲ အခိၚ်လဵုဂွံဟွံတီ အာမၚ်ဒၟံၚ်သ္ၚိတ်တ် ရေၚ်ဒၟံၚ်ဂှ်လေဝ် နွံဒၟံၚ်ရ။ မိက်ဂွံဟီုဂှ်တှ်ေ လၟုဟ်ဂှ် ညးလဵုမွဲမှ ကၠောန်ကလောန်ဟွံဂွံရပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုဆေၚ်ကၠေၚ်စက်လ္ၚဵုတံ သွံကဵုဒၟံၚ် ညးမကဵုၚုဟ်ဂၠိုၚ်ၚ်တံဂှ် နွံဒၟံၚ်တုဲ မၞိဟ်တံဏံ ဟိုတ်နူကၠတ်သွံတြးကၠုၚ် နွံကၠုၚ်ဂှ်ရ ကၠေၚ်ဓာတ် ၁ လဳတာဂှ် ကဵုၚုဟ် နူကဵု ၅၀၀၀ ဒ္ကေဝ် စဵုကဵု ၆၀၀၀ ဒ္ကေဝ်တုဲ ဒးကလေၚ်ရာန်ဒၟံၚ်ရောၚ်ဂှ် ညးဆက်ဟီုရ။
တၠကမၠောန်သွံရာန်ကၠေၚ်စက်မွဲတၠဂှ် ကၠေၚ်စက်ဒးပိုတ်အာဂှ်ဝွံ ပ္ဍဲကဵု (သီလဝါ) ဒၞါဲကံၚ်ဇြဳပၞာန် ပ္တိတ်ကဵုကၠေၚ်ဂှ် ဒးမၚ်ဒၟံၚ် အခိၚ်ဗွဲမလအ်လ မဒှ်တုဲ ညးဒေသတံလေဝ် ရာန်ကၠုၚ် နကဵုစိုတ်ဓဝိၚ်ဂွိၚ်ဂွါဲတံရောၚ်ဂှ် ဟီုရ။
“ ကွဳစက်တံ ဒးရာန်ဒၟံၚ် ပ္ဍဲသၞေဟ် (သီလဝါ) ဂှ်ဂၠိုၚ်တုဲ ဒးပ္တိတ်ကၠေၚ်ဂှ် လအ်ဒၟံၚ်။ ကၠေၚ်ဂှ် စၞးဒးစိုပ်ၜါတ္ၚဲဂှ် ဒှ်အာပိပန်တ္ၚဲတုဲ လ္ပာ်ဏံဂှ် ကၠေၚ်ပိုတ်အာမာန်ဒၟံၚ်ဏောၚ်။ အတေံ ဂွံပ္တိတ်ကၠေၚ်ဂှ်လေဝ် လအ်ဒၟံၚ်ညိညဏောၚ်။ တုဲပၠန် ဂွိၚ်တုဲ ဗက်ရာန်ဒၟံၚ်ကၠေၚ်တံဂှ်ရ မဒးသွံၜိုတ်ပိတ္ၚဲဂှ် အိုတ်အာ မွဲတ္ၚဲဓဝ်ရ။ ဒှ်ဒၟံၚ်ဗီုပြၚ်တံဏံရ”သာ်ဝွံ သ္ဂးရ။
ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ် စပ်ကဵုကၠေၚ်စက်တုဲ သွက်ဂွံပၠောပ် ပမာဏ မဒးပၠောပ်ပ္တိုန်တံဂှ် နွံဒၟံၚ်ဒတုဲတုဲ သွက်ဂွံပၠောပ်ပ္တိုန်ဂှ် က္ၜၚ်စိုပ်ဒၟံၚ်တံလေဝ် နွံဒၟံၚ်ယျဂှ် ပ္ဍဲဂိတုဒဳဇြေမ်ဗာ ၆ တေံ ဟီုဂးလဝ်ရ။
အခိၚ်လၟုဟ် ဟိုတ်နူရေၚ်တၠုၚ်ဒၟံၚ် အပြံၚ်အလှာဲမူဝါဒလၟုဟ်တံဂှ်တုဲ သွက်ဂွံဂွံ သြန်မကလေၚ်လုပ်ကၠုၚ် နူကဵုသၟာဗၞိက်ပလံၚ်ပ္တိတ်ဗၞိက်ပၠောပ်တံဂှ်ကီု၊ သြန်ကလေၚ်လုပ်ကၠုၚ် နူကဵုကောန်ကလောန်ဍုၚ်သ္အာၚ်တံဂှ်ကီု ကေုာံ သြန်နူကဵုကမၠောန်ဟောန်ဒဳ ဟွံလုပ်သၞောဝ်တံဂှ် ကဵုလဝ်မက်ဂၠက်ရောၚ် သ္ဂးရ။
ဒၟါနူမက်ဂၠက်သာ်ဏံနွံဒၟံၚ်ဂှ်ရ လှုဲတံဏံ သာလုပ်စိုပ်ကၠုၚ်တုဲ သာလုပ်စိုပ်ကၠုၚ်ဗက် ဗွဝ်ဖျာဂှ်လေဝ် အလဵုလဵုဍေံ ထိၚ်ပ္ညဳတုဲတုဲဂှ် က္ဍိုပ်သ္ကိုပ်လလောၚ်ပရိုၚ် ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် ကြဵုဇာလဝ်ကီုလေဝ် အရာမနွံပၟိက်ဒဝ်ဠာဂှ် ထ္မံက်ပ္တိတ်ဟီုဂးလဝ် ဟွံမွဲရ။
ကၠေၚ်စက်လၟုဟ်တံဂှ် ကၠေၚ်ဓာတ် ဂကူ ၉၅ မွဲလဳတာဂှ် ကံၚ်ဇြဳပၞာန် ခုတ်လဝ် ဗ္ဒါဲ ၂၇၀၀ ဒ္ကေဝ်တုဲ ၉၂ မွဲလဳတာဂှ် ၜိုန်ရစၟတ်လဝ် ပွဳပွူ ၂၆၀၀ ဒ္ကေဝ်ကီုလေဝ် ပ္ဍဲကဵုဆေၚ်ကၠေၚ်စက်တံဂှ် ပ္တိုန်ၚုဟ်သွံတြးဒၟံၚ် ဂၠိုၚ်နူဏံ နွံဒၟံၚ်ဂှ် ညးဒေသတံ ဟီုရ။
ကၠေၚ်စက်ပိုတ်ဂှ်ဝွံ စနူဂိတုဒဳဇြေမ်ဗာမံက်ဏံတုဲ ပါလုပ်သီုကဵုဍုၚ်လ္ဂုၚ်ဂှ် ပ္ဍဲကဵုတွဵုရးဍုၚ်မန်၊ တွဵုရးရခေၚ်တံသၟးဟွံက ပ္ဍဲကဵုဍုၚ်ဇၞော်ဇၞော်လ္ၚဵုတံဂှ်လေဝ် ဒးဂဗကၠုၚ် ပရေံပရေံတုဲ ကံၚ်ဇြဳပၞာန်ဂှ် ဒဵုကဵုအခိၚ်လၟုဟ် သောၚ်ကလးကဵုဟွံမာန်ဏီရ။
ပ္ဍဲဍုၚ်ဗၟာဏံ ကၠေၚ်စက်ဂှ်ဟီုမ္ဂး ကၠာကံၚ်ဇြဳပၞာန် ဂွိုအ်သီအဝဵု ပ္ဍဲလက်ထက်အလဵုအသဳတုဲကၠုၚ်တေံဂှ် ကၠေၚ်ဓာတ်မွဲလဳတာ နူကဵုမၞုံကၠုၚ် ၆၀၀ ဒ္ကေဝ်ဂှ် ကြဴနူဒပ်ပၞာန်သီအဝဵုတုဲ သၠုၚ်တိုန်ကၠုၚ် ၄ ဆပြၚ်တုဲ ၚုဟ်ဟွံညိၚ်ဝတ်တံကဵု ပိုတ်အိုတ်ကၠုၚ်တံဂှ်လေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai