စပ်ကဵုဂလာန် က္ဍိုပ်သ္ကိုပ်ပၞာန် သ္ဂးလဝ် သွက်ဂွံသောၚ်ကလး နနဲပရေၚ်ဍုၚ်ကွာန်ဂှ် AA ခၠေဝ်ပလန်လဝ်သာ်လဵုရော

မတ်မလီု၊ ဒဳဇြေမ်ဗာ ၈

က္ဍိုပ်သ္ကိုပ်ပၞာန်သီအဝဵု မဒးကျဒၟံၚ် ဟိုတ်နူပရေၚ်ဗ္တိုက် ဂကောံဇြဟတ်ပၠန်ဂတးတံဂှ် နကဵုဂကောံဒပ်ရပ်လွဟ်ဂမၠိုၚ် သွက်ဂွံသောၚ်ကလး နနဲပရေၚ်ဍုၚ်ကွာန်အိုတ်ဂှ် ပ္ဍဲဂိတုဒဳဇြေမ်ဗာ ၄ တုဲကၠုၚ်တေံ ဟီုပ္တိတ်ကၠုၚ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ် နကဵုဂကောံဒပ်ရပ်လွဟ်ဂမၠိုၚ် ဆက်တုဲဒိုဟ်ဓီုဒၟံၚ်ဏီမ္ဂး ဘဲဒဏ်ဏံဂှ်ညးဍုၚ်ကွာန်တံရဟေၚ် ဒးဒုၚ်စသိုၚ်ဏောၚ်တုဲ ဒးသောၚ်ကလး နကဵုနဲကဲပရေၚ်ဍုၚ်ကွာန်အိုတ်ဂှ် ဟီုဂးလဝ် အပ္ဍဲကောံဓရီုကံၚ်ဇြဳပၞာန်ရ။

ကရောံပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံ ပါလုပ်သီုကဵု ဒပ်ပၞာန်ရခေၚ် AA ဂှ် ဟိုတ်နူပရေၚ်ဗ္တိုက် ဂကောံဇြဟတ်ပၠန်ဂတး အလုံဍုၚ်တံဂှ်တုဲ အခိၚ်ဒးဆောံလေၚ်လဝ် ဍုၚ် ဟွံအောန်နူကဵု ၁၈ ဍုၚ်ဂှ် က္ဍိုပ်သ္ကိုပ်ပၞာန် စဟီုပ္တိတ်ကၠုၚ် အရေဝ်ၜိုဟ်လလမ်ရ။

ညးမၞုံအခေါၚ်ဟီုဂး AA ဥူခါၚ်သုခဂှ် ဂလာန်က္ဍိုပ်သ္ကိုပ်ပၞာန်ဂှ်ဝွံ သွက်ကံၚ်ဇြဳပၞာန် မ္ဒးဆေၚ်ဒၟံၚ်မုက် အကြေပ်အဂြတ်နာနာဂှ် ဒှ်ကိစ္စဟီုပ္တိတ်လဝ် တၞဟ်နသ္ဂောံဂွံ ပၞော်တိတ်ပရေၚ်ဍုၚ်ကွာန်မွဲမွဲဏောၚ်တုဲ ဒှ်ကိစ္စအာသၟဝ် သၞောဝ်သ္ဇိုၚ် ၂၀၀၈ ဂှ်ရ သ္ဇက်ဂွံဒုၚ်တဲမာန်ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဂလာန်က္ဍိုပ်သ္ကိုပ်ပၞာန်ပကီုပရာပ် ဂးလဝ် ဆဵုဂဗသဳကၠဳ လ္ဂောံကဵုပရေၚ်ဍုၚ်ကွာန်ဟီုဂှ်ဝွံ သွက်ကံၚ်ဇြဳပၞာန် မ္ဒးဆေၚ်ဒၟံၚ်မုက် ကုအကြေပ်အဂြတ်နာနာဂှ် ဒှ်ကိစ္စဟီုပ္တိတ်လဝ် တၞဟ်နသ္ဂောံဂွံ ပၞော်တိတ်ပရေၚ်ဍုၚ်ကွာန်မွဲမွဲဏောၚ်ဂှ် အဲညာတ်ကေတ်ရ။ ဒၞါဲဏံ သ္ဇက်ဒးကူချပ်မွဲဂှ်တှ်ေ ယဝ်ရညး ဆဵုဂဗသဳကၠဳ လ္ဂောံကဵုပရေၚ်ဍုၚ်ကွာန်မ္ဂး Roadmap ညးတံဂှ် မုရော၊ ဒုၚ်သ္ဇိုၚ်ကဵု အရာလဵုတုဲ သဳကၠဳဂှ်ရော။ ဒုၚ်သ္ဇိုၚ်ကဵု NCA ကေုာံ သၞောဝ်သ္ဇိုၚ် ၂၀၀၈ ကံၚ်ဇြဳပၞာန် မဟီုကၠုၚ်ဒၟံၚ်အဆက်က်ဏံဂှ်တုဲ သဳကၠဳအာဏောၚ်ဟီုဂှ် ဒှ်ကိစ္စညးလဵုမွဲမှ ဒုၚ်တဲမာန်ဟွံသေၚ်ပုဟ်။ ကလောန်လေဝ် ဒှ်ဟွံသေၚ်ပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် ကြဴနူသၞာံ ၁၉၆၂ တုဲ ပေါဲသဳကၠဳ ပ္ဍဲလက်ထက် တၠအဝဵုအဆက်က် သီအဝဵုတုဲ အလဵုအသဳတိုန်ကၠုၚ်သီုဖအိုတ်တံဂှ် မုသွဟ်မှဟွံတိတ်ကၠုၚ်လဝ်တုဲ ပေါဲသဳကၠဳပရေၚ်ဍုၚ်ကွာန် အံၚ်ဇၞးကၠုၚ်လဝ်တံလေဝ် ဟွံမွဲပုဟ်ဂှ် ညးဟီုလဝ်ရ။

က္ဍိုပ်သ္ကိုပ်ပၞာန်ဂှ်တှ်ေ ပ္ဍဲအရာသဳကၠဳပရေၚ်ၜိုဟ်လလမ်ဂှ် ဒတူလိုၚ်အာ နူသၟဝ်သၞောဝ်သ္ဇိုၚ် ၂၀၀၈ ကဵု “တာလျိုၚ်ပိုယ်ပိသာ်” ဂှ်ဏောၚ်ဂှ် ဟီုဂးလဝ်ရ။

ပ္ဍဲပေါဲသဳကၠဳဆဵုဂဗ ပရေၚ်ဍုၚ်ကွာန်တံဂှ် နကဵုကံၚ်ဇြဳပၞာန်ဂှ် အလဵုအသဳ ညးဍုၚ်ကွာန်တံ ရုဲစှ်ပ္တိုန်လဝ်ဟွံသေၚ်တုဲ ဂကောံအလဵုအသဳသ္ပစၞးညးဍုၚ်ကွာန်တံလေဝ် ဟွံသေၚ်ဂှ်ရ မုမှဒှ်ကၠုၚ်ဟွံသေၚ်ပုဟ်ဂှ် ဥူခါၚ်သုခ ခၠေဝ်ပလန်လဝ်ရ။

“နကဵုကံၚ်ဇြဳပၞာန်ပကီုပရာပ်ဏံဂှ် ဂကောံပရေၚ်ဍုၚ်ကွာန်ဟွံသေၚ်ပုဟ်။ ဒးဟီုမ္ဂး အလဵုအသဳညးဍုၚ်ကွာန်တံ ရုဲစှ်ပ္တိုန်လဝ်လေဝ် ဟွံသေၚ်တုဲ အလဵုအသဳ သ္ပစၞးညးဍုၚ်ကွာန်တံလေဝ် ဟွံသေၚ်ပုဟ်။ ဟိုတ်ဂှ်ရ သွက်ဂွံဆဵုဂဗသဳကၠဳ လ္ဂောံကဵုပရေၚ်ဍုၚ်ကွာန်ဂှ် ဒှ်ဂကောံဍာ်ဒကေဝ်ပေၚ်မွဲ ဟွံသေၚ်ပုဟ်။ ညးတံဝွံ ဒှ်ဒပ်ပၞာန်ပကီုပရာပ်မွဲရဏောၚ်။ ဟိုတ်ဂှ်ရ ကိစ္စ ဥက္ကဌကံၚ်ဇြဳပၞာန် ဟီုဂးဒၟံၚ် ဆဵုဂဗသဳကၠဳ လ္ဂောံကဵုပရေၚ်ဍုၚ်ကွာန်ဂှ် ဒှ်ကၠုၚ်ဟွံသေၚ်ပုဟ်ဂှ် အဲညာတ်ရ။ အဓိပ္ပာယ်လေဝ် ဟွံမွဲပုဟ်“ သာ်ဝွံ သ္ဂးရ။

မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန်ဂှ် တွဵုရးရခေၚ် ဟွံညိၚ်ဝတ်ဂှ်ဝွံ ဟိုတ်နူ ဒပ်ပၞာန်ရခေၚ် AA ဏောၚ် စောဲစပ်လဝ်တုဲ ဥူခါၚ်သုခဂှ် ပွမဟီုဂးသာ်ဏံဂှ်ဝွံ ဒှ်ပြဝ ဟွံမွဲကဵုဂုဏ်သိက္ခာမုက်ဂွတံရောၚ်ဂှ် ပါ်ပါဲလဝ်ရ။

ဒပ်ပၞာန်ရခေၚ် AA ဝွံ လုပ်ဒၟံၚ်ပေါဲဗ္တိုက် သွက်ဂွံထပိုတ်ရိုဟ်ကၞက်ကံၚ်ဇြဳပၞာန် ကရောံဂကောံရပ်လွဟ်ကောန်ဍုၚ်အရၚ် မဟာမိတ်ကောဒေံတံဂှ်တုဲ သီကၠုၚ် ဗ္ဒိုပ်ဒပ်ကံၚ်ဇြဳပၞာန်တံ အဆက်က်ရ။

တုဲကၠုၚ် ပ္ဍဲဂိတုဒဳဇြေမ်ဗာ ၄ တေံဂှ်လေဝ် ကုန်ဗျူဟာ ထရောန်အိုၚ် မၞုံပွိုၚ်ဍုၚ်ပလက်ဝ တွဵုရးချေၚ် ပၟိက်ဇၞော်သွက်ပရေၚ်ပၞာန် ကံၚ်ဇြဳပၞာန်ဂှ် ဗ္တိုက်သီဂွံလဝ်ဖအိုတ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media