မတ်မလီု၊ ဂျာန္နဝါရဳ ၄
တွဵုရးကရေၚ်၊ သ္ကုတ်ဂၠံၚ်ထိုအ်ဂဝ်ကိုဝ် ဗြဝတဳ−ကအ်ကြိက်ဂှ် ဟိုတ်နူကံက်ဒၟံၚ် အခေါန်ဂၠံၚ်တံ ဂၠိုၚ်ကဵုဆဂှ်တုဲ ၚုဟ်ဗၞိက်ဖျာသေံ သုၚ်စောဲရပ်စပ်ဒၟံၚ် အပ္ဍဲဒေသတံ ထပ်သၠုၚ်တိုန်ကၠုၚ်ဂှ် ဂွံတီကေတ် ဇရေၚ်သၟာဗၞိက်တံကဵု ညးဒေသတံရ။
ပ္ဍဲကဵုဍုၚ်ကအ်ကြိက် ဒၞါဲဂၠံၚ်ဇၞော်အာယှနွံ ဂၠံၚ်အဓိက ပရေၚ်သွံရာန်ဗၞိက်ပယျဵု သေံ−ဗၟာၜါဍုၚ်ဂှ် စနူဂိတုဒဳဇြေမ်ဗာတုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံ ပေါဲဗ္တိုက်သ္ကာတ်မြဟ်လဝ်တုဲ ကၟာတ်လဒဵုလဝ်အခေါၚ်အာကၠုၚ်သုၚ်စောဲဂၠံၚ်ဂှ်ရ။
ဟိုတ်နူဒးဒုၚ်ကၟာတ်လဝ် အခေါၚ်အာကၠုၚ်ဂၠံၚ်ဇၞော်အာယှဂှ်တုဲ ဒးကလေၚ်သုၚ်စောဲဒၟံၚ် သ္ကုတ်ဂၠံၚ်ထိုအ်ဂဝ်ကိုဝ် ဗြဝတဳ−ကအ်ကြိက် သွက်ပရေၚ်သွံရာန်ဗၞိက် သေံ−ဗၟာၜါဍုၚ်ရ။
အခိၚ်လၟုဟ် ပ္ဍဲကဵုသၞေဟ်ကၚ်စၟဳတ် လ္တူသ္ကုတ်ဂၠံၚ်ထိုအ်ဂဝ်ကိုဝ် ကေုာံ သၞေဟ်ကၚ်ကံက်အခေါန်ဂၠံၚ်တံဂှ် ဒၟါနူကံက်ကၠုၚ်အခေါန်ဂၠိုၚ်ကဵုဆဂှ်တုဲ အရာမဇီုကပိုက် လ္တူကဏ္ဍသွံရာန်ဗၞိက်ပယျဵုတံ ဇၞော်ပၟဝ်ကၠုၚ်ရ။
သၟာဗၞိက်ပယျဵုမွဲတၠဂှ် ဇၟာပ်ပ်သၞေဟ်ကၚ်စၟဳတ် မၞုံလ္တူဂၠံၚ်ထိုအ်ဂဝ်ကိုဝ်တံဂှ် ကဵုလှုဲတုဲမှ ဒးအာကၠုၚ်ဂှ်ကီု၊ ၚုဟ်သြန်ၝာတ်သေံတံ သၠုၚ်တိုန်ကၠုၚ်ကီု၊ ဟိုတ်နူအခက်အခုဲပရေၚ်ပလံၚ်ဗစိုပ်တံတုဲ ၚုဟ်ကပေါတ်ဗၞိက်သေံတံ ထပ်က္ဍၚ်ကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဇၟာပ်သၞေဟ်ကၚ် မၞုံလ္တူဂၠံၚ်ထိုအ်ဂဝ်ကိုဝ်တံ သီုဖအိုတ်ဂှ် ဂွံလှုဲတုဲ ပံက်လဝ်ဏောၚ်။ သၞေဟ်ကၚ်ၜိုတ်နွံဂှ် ကဵုလှုဲတုဲ ဒးအာဒၟံၚ်ဏောၚ်။ သၞေဟ်ကၚ်ဂှ်ဂၠိုၚ်တုဲ လှုဲဂှ်အိုတ်ဂၠိုၚ်။ ၚုဟ်ဍေံတိုန်အာရ။ မၞိဟ်တံဂှ်တှ်ေ ကၠေၚ်စက်ဂှ်လေဝ် ဟွံဂွံပုဟ်။ ဂၠံၚ်ဂှ်လေဝ် ဟွံခိုဟ်။ ၚုဟ်သြန်ၝာတ်ဂှ်လေဝ် တိုန်ဒၟံၚ်။ ပရေၚ်ပလံၚ်ဗစိုပ်ဂှ်လေဝ် ဟွံပြေပြံၚ်တုဲ သီုဖအိုတ်ဂှ် ၚုဟ်တိုန်အာအိုတ်ရ” သာ်ဝွံ ညးသ္ဂးရ။
ပ္ဍဲကဵုသ္ကုတ်ဂၠံၚ်ထိုအ်ဂဝ်ကိုဝ်ဂှ် ကွဳစက်သ္ၚိမွဲဖ္ဍိုက်မ္ဂး ဒးကဵုဒၟံၚ်ၚုဟ်သၞေဟ်ကၚ် လ္ပာ်စှ်ေသၟးရဂှ် မွဲကိုဋ်ဒ္ကေဝ်ပြၚ်တုဲ ကွဳစက်ဖ္ဍိုက်ပ္တိုန်နၚ်ဗၞိက်မွဲဖ္ဍိုက်မ္ဂး အောန်အိုတ် ဒးအိုတ်ဒၟံၚ် ၜိုတ်ပွဳပွူပိကိုဋ်ဒ္ကေဝ်ဂှ် ဂွံတီကေတ် ဇရေၚ်သၟာဗၞိက်ပယျဵုမွဲတၠရ။
ဂၠံၚ်ထိုအ်ဂဝ်ကိုဝ်ဂှ်ဝွံ နွံဒၟံၚ်ပ္ဍဲတိဍာ်ထိၚ်ဒဝ် ကံၚ်ဇြဳၜိုဟ်လလမ်ကရေၚ် PC ကီုလေဝ် သၞေဟ်ကၚ်စၟဳစၟတ် ကေုာံ သၞေဟ်ကၚ်ကံက်အခေါန်ဂၠံၚ် ဗော်သွးကောန်ဂကူကရေၚ် KNU၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ၊ ဒပ်မၚ်ပယျဵုကရေၚ် သၟဝ်တဲကံၚ်ဇြဳပၞာန် BGF ကေုာံ PC တံ နွံဒၟံၚ်ရ။
ပ္ဍဲကဵုဂၠံၚ်ထိုအ်ဂဝ်ကိုဝ်ဂှ် ဗွဲကြဴဏံ လ္ပာ်ဒပ်မၚ်ပယျဵုကရေၚ် BGF သၟဝ်တဲကံၚ်ဇြဳပၞာန်တံ သၠဲပ္တိုန်ပံက်ကၠုၚ် သၞေဟ်ကၚ်ကံက်အခေါန်ဂၠံၚ်တံဂှ် ဂွံတီကေတ် အတိုၚ်ဂလာန်သၟာဗၞိက်ပယျဵုတံရ။
ညးအုပ်ကာ ကံၚ်ဇြဳၜိုဟ်လလမ်ကရေၚ် PC သ္ကိုပ်ဗိုလ်သဝ်ကျဝ်ညောအ်ဂှ် ၜိုန်ရပံက်လဝ်သၞေဟ်ကၚ်ကံက်အခေါန်ဂၠံၚ်တံ သွက်ဂွံကလေၚ်ပလေဝ်ဂၠံၚ်ဂှ်ကီုလေဝ် ကဵုလဝ်အခေါၚ်မလုပ်သၞောဝ်ဂှ် နွံဒၟံၚ်ၜါသၞေဟ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တၚ်ရန်တၟံပိုယ်ဂှ်တှ်ေ ညးဍုၚ်ကွာန်ဒေသတံ အာကၠုၚ်တရဴ ဂွံပြေပြံၚ်ကလိတ်ကလောတ်ဂှ်ကီု၊ ဗၞိက်ဂေတ်ဂြိပ်အပ္ဍဲဒေသ ညံၚ်ဂွံဒှ်ဒတုဲဖဵု စဵုကဵုဗၞတ်ဗ္ၜတ်မွဲမွဲဏောၚ် မဒှ်ရ။ ဆ္ဂး ဒှ်ဒၟံၚ်ဒေသ ဂကောံရပ်လွဟ်သီုပန်ဂကောံ ကောံမံၚ်ဒၟံၚ်တုဲ ကံက်အခေါန်သၞေဟ်ကၚ်တံ မုတံ ဟွံမွဲလးလးပုဟ် ဂွံဟီုဂှ်လေဝ် ဝါတ်ဒၟံၚ်။ အရၚ်ဂွံထိၚ်ဒဝ်ဂၠံၚ်ပိုယ်တံတုဲ သၞေဟ်ပိုယ်ပံက်လဝ်ဂှ် ၜါဒၞါဲရဏောၚ်” သာ်ဝွံ ဟီုရ။
ပ္ဍဲကဵုဂၠံၚ်ထိုအ်ဂဝ်ကိုဝ်ဂှ် သၞေဟ်ကၚ်ကံက်ၚုဟ်ဂၠံၚ်တံ ဂၠိုၚ်တိုန်ကၠုၚ်ကီု၊ ဟိုတ်နူအာတ်ကၠုၚ်လှုဲလှာ် ဂၠိုၚ်ကဵုဆတံတုဲ ကပေါတ်ဗၞိက်သေံတံဝွံ တန်တဴကဵုဂကူဍေံတုဲ ၚုဟ်သၠုၚ်တိုန်ဒၟံၚ် နူ ၅၀၀၀ ဒ္ကေဝ် စဵုကဵု ၁၀၀၀၀ ဒ္ကေဝ်ပြၚ်ဂှ် ဂွံတီကေတ် ဇရေၚ်ညးဒေသတံရ။
ဂၠံၚ်ထိုအ်ဂဝ်ကိုဝ်−ကျဝ်ခအ်ဂှ် ယာန်ဖ္ဍိုက်ဗၞိက် လ္တူသၠာ ၁၀ တံ ဒၟါနူတတ်ကၠောံအာကၠုၚ်တုဲ ဂၠံၚ်လီုလာ်ကၠုၚ်နွံကၠုၚ်ဂှ်ရ စနူဂိတုဂျာန္နဝါရဳ ၁ တုဲ ကၟာတ်လဝ်အခေါၚ်အာကၠုၚ် ယာန်သၞောတ်ဗ္ၜတ်လဝ်တံဂှ် ကံၚ်ဇြဳၜိုဟ်လလမ်ကရေၚ် PC လလောၚ်ပ္တိတ်လဝ်အမိၚ် ပ္ဍဲဂိတုဒဳဇြေမ်ဗာ ၂၇ တေံရ။
ဟိုတ်နူအခက်အခုဲဂၠံၚ်တုဲ ယာန်ဖ္ဍိုက်ဗၞိက်တံ ဒးဒုၚ်ကၟာတ်လဒဵုလဝ် အခေါၚ်အာကၠုၚ်တံဂှ်တုဲ သၟာဗၞိက်ဂမၠိုၚ်ဝွံ ကၠောန်ၜိုတ်ဒၟံၚ်ပရေၚ်သွံရာန်ဗၞိက် ကဵုကွဳစက်(မှန်လုံ)ဍောတ်တ်လ္ၚဵုတံ သီုကဵုကွဳစက်သ္ၚိတံဂှ်တုဲ ဒးဆေၚ်ဒၟံၚ်မုက် ကုခရိတ်ဇက်ပလံၚ်ဗစိုပ်ဇၞော်သၠုၚ်တံရ။
ဍုၚ်ဗၟာဝွံ အပ္ဍဲဒေသဂှ် ဒးရပ်စပ်ဒၟံၚ် ကပေါတ်ဗၞိက်ကၠုၚ်နူသေံတံအဓိက မပ္တံကဵုဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ် ကေုာံ ကပေါတ်ဗၞိက်အရပ်စပ်ပရေၚ်သိုၚ်ခၞံတံ သီုကဵုကပေါတ်ဗၞိက်အရပ်စပ်နာနာသာ်တံရ။
ပရိုၚ်−သြၚ်လောန်တိုၚ်(မ်)
ဗီု−CJ