နေဗျဳဒဝ်၊ ဂျာန္နဝါရဳ ၅
ကံၚ်ဇြဳပၞာန် မဒးဂိဒၟံၚ် ပ္ဍဲကဵုပရေၚ်ပၞာန်ဂှ် သွက်ဂွံကၠောန်ဗဒှ်ပေါဲရုဲမာဲမာန် သၞာံ ၂၀၂၄ ဏံ သွက်ဂွံကံက်စရၚ်လၟိဟ်မၞိဟ်သဂါဗ္တံမာန် မရန်တၟံလဝ်တံဂှ် ဆက်ကၠောန်အာဏောၚ် က္ဍိုပ်သ္ကိုပ်ပၞာန် ဟီုရ။
ဟီုဂးစုတ်လဝ် ပ္ဍဲကဵုလိက်သဝဏ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မပလံၚ်ဗစိုပ်လဝ် သွက်အသေအဟာန် တ္ၚဲဗၠးၜး မရနုက်ကဵု ၇၆ ဝါ ပ္ဍဲဂိတုဂျာန္နဝါရဳ ၄ ဏံရ။
တၚ်ရန်တၟံကံၚ်ဇြဳပၞာန်ဂှ် ဒၟါနူဒှ်သွက်ဂွံကၠောန်ဗဒှ် ပေါဲရုဲမာဲဒဳမဝ်ကရေဇြဳဗော်ဇဳ ဗၠးၜးဗဗွဲဓဝ်မာန်သၟးရဂှ်တုဲ ရဲအခေါၚ်ကဵုမာဲနွံ နူအပ္ဍဲဍုၚ်၊ မ္ၚးဍုၚ်တံ ညံၚ်စရၚ်အၚ်ဂွံဒး အိုဿီုကဵုမၞိဟ်အခေါၚ်ကဵုမာဲနွံတံ ဂွံကဵုဆန္ဒမာဲမာန် အလုံဍုၚ်မွဲ တၟံကၠံပေၚ်ၚ် ဂွံကဵုမာဲမာန်ဂှ် ဒစးဒုၚ်ပလေဝ်ပလေတ်ဒၟံၚ်ရောၚ် သ္ဂးရ။
သွက်ဂွံကံက်စရၚ်တၠဆန္ဒမာဲတံ ဗွဲမအံၚ်ဇၞးမာန် ကေုာံ သွက်ဂွံဂွံတၚ်နၚ်မၞုံပၟိက် ပ္ဍဲကဵုပရေၚ်ဖောအ်ဗြေဝ်တောတက်ကၟိန်ဍုၚ်တံဂှ် ဒးကံက်စရၚ်လၟိဟ်မၞိဟ်သဂါဗ္တံဏောၚ်ဂှ် က္ဍိုပ်သ္ကိုပ်ပၞာန် ဟီုရ။
ဟိုတ်ဂှ်ရ စနူဂိတုအံက်တဝ်ဗာ ၁ သၞာံ ၂၀၂၃ ဂှ်တုဲ ကံက်လဝ်စရၚ်လၟိဟ်မၞိဟ်သဂါဗ္တံစမ်ၜတ်တုဲ ပ္ဍဲသၞာံ ၂၀၂၄ ဏံ သွက်ဂွံကံက်စရၚ်လၟိဟ်မၞိဟ်အလုံဍုၚ်မွဲမာန်ဂှ် ဆက်ကၠောန်အာဏောၚ် ဟီုဂးလဝ်ရ။
တန်တဴကဵုလ္တူဏံတုဲ ယဝ်ရဂွံကၠုၚ်စရၚ်မာဲ ဗိုန်ဗတ်ခိုၚ်ကၠိုက်တံဂှ်မ္ဂး သွက်ဂွံကၠောန်ဗဒှ် ပေါဲရုဲမာဲဒဳမဝ်ကရေဇြဳဗော်ဇဳ ဗွဲမဗဗွဲကဵုသၞောဝ်မာန်ဂှ်ကဵု အလုံမွဲကၟိန်ဍုၚ် ဒၞါဲသှ်ေသၟေဟ်ဟွံကဵုမွဲ သွက်ဂွံဂွံအခေါၚ်ကဵုမာဲဂှ် ဒးပ္တိတ်အာဇြဟတ်ဏောၚ် သ္ဂးရ။
ညံၚ်ဂွံဒှ် ပေါဲရုဲမာဲမၞုံကဵုသၞောဝ်သၞောတ်မွဲ၊ အလဵုအသဳမမံက်ဂတဝ်ကၠုၚ် နူပေါဲရုဲမာဲဏံဂှ် သွက်ဂွံပအပ်ပြာပ်တာလျိုၚ်ကၟိန်ဍုၚ်မာန် ဆက်ရေၚ်တၠုၚ်အာဏောၚ် ဂလာန်က္ဍိုပ်သ္ကိုပ်ပၞာန်ဂှ် ထ္မံက်ထ္ၜးလဝ် ပ္ဍဲလိက်သဝဏ်ရ။
ဟိုတ်နူပၠန်ဂတး ရဲဒစဵုဒစးသၞောတ်တၠအဝဵုပၞာန် အလုံဍုၚ်မွဲပြးဇးဂှ်တုဲ နကဵုကံၚ်ဇြဳပၞာန် ဒးဂိဒၟံၚ် ပ္ဍဲကဵုပရေၚ်ပၞာန်ဂှ် ကၠောန်ပေါဲရုဲမာဲတုဲ လှဲပြံၚ်ကဵုအဝဵု ကုညးမဂွံဇၞးဂှ်ဏောၚ် ဂလာန်ဏံဂှ်ဝွံ ဟီုဂးကၠုၚ်ဒၟံၚ် နူအခိၚ်သီအဝဵုတေံရ။
ဆ္ဂး တ္ၚဲကၠောန်ဗဒှ်ပေါဲရုဲမာဲဂှ် သ္ကိုပ်ပၞာန်ဇၞော် မေန်အံၚ်လှာၚ် ကဵုကတိဟီုဂးလဝ်ဟွံမွဲတုဲ ရေၚ်တၠုၚ်လၟေၚ်ကမၠောန်အဓာန်ဂတတံတုဲမ္ဂး ကၠောန်ဗဒှ်ပေါဲရုဲမာဲရဏောၚ်ဂှ် ထ္ၜးလဝ်ဟိုတ်ရ။
အခိၚ်ပရေၚ်ပၞာန်သီအဝဵု ကြပ်ပေၚ်ပိသၞာံဂှ် ဟိုတ်နူပၞာန်ထ္ပက် ဂကောံပံၚ်ကောံပၠန်ဂတးရပ်လွဟ်ကောန်ဍုၚ်အရၚ်တံတုဲ နကဵုကံၚ်ဇြဳပၞာန် ဇြဟတ်ဍိုန်လျစှ်ေဒၟံၚ်ဂှ် ကိစ္စစပ်ကဵုပရေၚ်ပၞာန်တံဂှ် ဟီုဂးချူစုတ်ကၠုၚ် ပ္ဍဲကဵုလိက်သဝဏ်တံလေဝ် ဟွံမွဲရ။
အာယုက်ကာလကာတၟေၚ် မပပဵုပ္တိုန်လဝ်ဂှ်လေဝ် ပ္ဍဲဂိတုဂျာန္နဝါရဳ ၃၁ ဏံ အာယုက်အိုတ်ဏောၚ်မဒှ်တုဲ နူကဵုကောံဓရီုဂီုကၠီုစဵုဒၞါ မကော်အာတ္ၚဲတေံဂှ်လေဝ် သွက်ဂွံဆက်ကၠောန် လၟေၚ်ကမၠောန်အဓာန်ဂတတံမာန်ဂှ် နကဵုကံၚ်ဇြဳပၞာန် ဆက်ကေတ်အာအဝဵုကၟိန်ဍုၚ် ၆ ဂိတုပၠန်ဏောၚ်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CNDCS