ဘာအၚ်၊ ဖေဖဝ်ဝါရဳ ၃
ဒပ်ကံၚ်ဇြဳပၞာန် ဟိုတ်နူပန်ပှော်လွဟ်ဇၞော် ပ္ဍဲကွာန်ဖလာန်ဒံၚ်၊ ပွိုၚ်ဍုၚ်ဘာအၚ်၊ တွဵုရးကရေၚ်ဂှ်တုဲ ကောန်ၚာ်သၟတ် ၂ တၠ ဇီုကပိုက်ကလိဂွံလဝ်ဝပ်ရောၚ် ခရိုၚ်သဓီု ဗော်သွးကောန်ဂကူကရေၚ် KNU လလောင်ပ္တိတ်လဝ် ပ္ဍဲဂိတုဖေဖဝ်ဝါရဳ ၂ တေံရ။
အပ္ဍဲပေါဲဗ္တိုက် ဗ္ဒိုပ်ဒပ်ဝေန်တာပါန်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန် မက္တဵုဒှ်လဝ် ပ္ဍဲဂိတုဂျာန္နဝါရဳ ၃၀ တုဲကၠုၚ်တေံဂှ် နူကဵုဗ္ဒိုပ်ဒပ်ကံၚ်ဇြဳပၞာန် ခမရ (၂၀၈) လ္ပာ်ကမမံၚ် ဘိုၚ်ပန်ပှော်ကဵုလဝ် လွဟ်ဇၞော်တုဲ ဒတုံဗ္တိုဟ်ထ္ကးအာလဝ် လ္ပာ်ကွာန်ဖလာန်ဒံၚ်ရ။
ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်တုဲ သဝ်အံၚ်တပျေဟုၚ် အာယုက် ၁၅ သၞာံဝွံ ကလိဂွံဝပ်တဲပါဲကဝ်၊ သဝ်နေမျဵုဥူ အာယုက် ၁၆ သၞာံဂှ် ကလိဂွံဝပ် ကံတဲလ္ပာ်ပုၚ်ကဝ်ကဵု ဗုၚ်ထောၚ်ပြိုဟ် ဝပ်သ္ကာတ်လဝ်ရ။
ကောန်ၚာ် ကလိဂွံလဝ်ဝပ် ဒးလွဟ်ဇၞော် ၂ တၠဂှ် ဒုၚ်လွဳလွတ်ဒၟံၚ် ပ္ဍဲရုၚ်ဂဥုဲပွိုၚ်တိုက်ဖလာန်ဒံၚ်တုဲ သဝ်နေမျဵုဥူဝွံ ဒှ်ဒၟံၚ်အကာဲအရာ ဒးဂွိၚ်အန္တရာယ်လမျီုရောၚ်ဂှ် ဂွံတီကေတ် ဇရေၚ်ညးဒေသတံရ။
အပ္ဍဲပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် သ္ၚိဒၟံၚ်မွဲမ ကဵု ကွဳလိုန်ဓာတ်မွဲဖ္ဍိုက် ဇီုကပိုက်လီုလာ်လဝ်တုဲ ညးဍုၚ်ကွာန်ဒေသတံ ဒးဂြိပ်ဒဴပါဲဒလေတ်ကီုလေဝ် စနူဂိတုဖေဖဝ်ဝါရဳ ၂ တုဲ ကလေၚ်စဴမံၚ်ဒၟံၚ်အိုတ်ယျဂှ် သ္ဂးရ။
ပ္ဍဲကဵုတ္ၚဲဂှ်ရ ဗ္ဒိုပ်ဒပ်ခမရ ၂၀၈ ဖျေံသ္ဇိုၚ်ကမမံၚ်ကဵု အမတ ၃၁၄ ဖျေံသ္ဇိုၚ်ၜဳကလေၚ်တံဂှ် ဟိုတ်နူပန်ပှော်လဝ် လွဟ်ဇၞော်တံဂှ်ရ ဒတုံဗ္တိုဟ်ထ္ကးအာလဝ် ပ္ဍဲကွာန်ဝေန်တာပါန်တုဲ သ္ၚိဒၟံၚ် ၉ မ ဇီုကပိုက်လီုလာ်လဝ်ဂှ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။
တုဲကၠုၚ်ပ္ဍဲဂိတုဂျာန္နဝါရဳ ၁၉ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်လွဟ်ဇၞော် ပ္ဍဲကွာန်(တက်တူးကုန်း) ၊ ပွိုၚ်ဍုၚ်ၜဳကလေၚ်ဂှ်တုဲ ညးဍုၚ်ကွာန်ကောန်အရာပ် ၄ တၠ ချိုတ်တုဲ ၆ တၠ ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KNU