ဝါယှေန်တာန်၊ ဂျောန် ၂၉
ပ္ဍဲပေါဲရုဲမာဲသမ္မတ မကၠောန်ဗဒှ်အာ ပ္ဍဲဂိတုနဝ်ဝေမ်ဗာဂှ် ဒဒှ်ရရန်တၟံလဝ် သွက်ဂွံကေတ်ဇၞး သမ္မတတြေံ ဒဝ်နေဝ်ထြာပ်ဂှ် သမ္မတအမေရိကာန် ဂျဵုဗိုၚ်ဒေန် ဟီုလဝ် ပ္ဍဲဂိတုဂျောန် ၂၈ တေံရ။
သမ္မတဗိုၚ်ဒေန်ဂှ် ပ္ဍဲအရာကၠောန်သ္ပ ပေါဲပြိုၚ်ပ္ကာန်ဟီုဂလာန် ကုထြာပ်ဂှ် ဒဒှ်ရအစောံစရာဲညး ဟွံခိုဟ်လဝ်ဂှ် သ္ပစၟတ်သမ္တီတုဲ ရဲသ္ကအ်ဗော်ဒဳမဝ်ကရေတ်ညးဂမၠိုၚ်လေဝ် ဟွံဂွံလဝ်ဇြဟတ် ဒှ်လဝ်ရ။
ညးဝွံ မၞိဟ်ဍောတ်တ်မွဲ ဟွံသေၚ်ရတုဲ ကွာ်ဗီုကၠာတေံလေဝ် ဟွံမာန်ရတုဲ ပြိုၚ်ပ္ကာန်ကေတ်မာန်ဂလာန်လေဝ် ဟွံမာန်ရပုဟ်ဂှ် သမ္မတဗိုၚ်ဒေန် ဟီုလဝ်ရ။
ပ္ဍဲအရာဟီုပြိုၚ်ပ္ကာန်ကေတ်မာန်ဂလာန် ကုသမ္မတတြေံ ထြာပ် နူလ္ပာ်ဗော်ရဳပါပလေတ်ကာန်ဂှ်တှ်ေ သမ္မတဗိုၚ်ဒေန် ကျအာလဝ်ရောၚ် ညးဂမၠိုၚ် ညာတ်လဝ်အိုတ်ရ။
ဆ္ဂး နကဵုညး အစဳဇန်လုပ်ပြိုၚ်အာပေါဲရုဲမာဲဂှ် ဟွံယှအ်အာဇဲ ဒုၚ်ကျအာဟွံသေၚ်ပုဟ်ဂှ် ဗိုၚ်ဒေန် ဟီုရ။
သမ္မတဗိုၚ်ဒေန် အာယုက် ၈၁ သၞာံဂှ်ဝွံ ပ္ဍဲအရာဟီုပြိုၚ်ပ္တိုန်ဖျေံဂလာန်ဂှ် မွဲဏှမွဲဏှ တံၚ်ခယျဒၟံၚ်ဂှ်ရ ဂွံယိုက်ဂၠေၚ်လျိုၚ် ပန်သၞာံပၠန်ဂှ် ဒှ်ဟွံမာန်ရပုဟ်ဂှ် ညးကဵုမာဲဂမၠိုၚ် ဂွိၚ်ဒၟံၚ်အိုတ်ရ။
ဒဳမဝ်ကရက် လ္ပာ်သမ္မတဂှ်တှ်ေ သွက်ပေါဲရုဲမာဲ နဝ်ဝေမ်ဗာဂှ် ဒၞါဲဗိုၚ်ဒေန်ဂှ် စုတ်အလံၚ်ညးစၞးတၞဟ်ဟ်မွဲတၠ ဂွံ ဟွံဂွံဂှ် မိက်ဂွံတီဒၟံၚ်အိုတ်ရ။
စပ်ကဵုအကာဲအရာဒှ်မာန်သာ်ဏံဂှ်တုဲ ဟီုဂးဒၟံၚ်တံ ဟွံမွဲပုဟ်ဂှ် ညးမၞုံအခေါၚ်ဟီုဂး ဂကောံစန်ဒက်မာဲဗိုၚ်ဒေန် မိုက်ကေဝ် တိုၚ်လာ ဟီုလဝ်ရ။
သမ္မတတြေံ ထြာပ် အာယုက် ၇၈ သၞာံဂှ် ပ္ဍဲအရာဟီုပြိုၚ်ပ္ကာန်ဂလာန်ဂှ် တၚ်နၚ်ဗၠေတ်တ် ဗွဲမဂၠိုၚ် ဟီုစုတ်ဏာလဝ်ဂှ် ဂွံဆဵုကေတ်တုဲ ဂၠါဲလဝ်ဒုဟ် ရဲဒဳမဝ်ကရက်တံရ။
ဆ္ဂး ဂကောံစန်ဒက်မာဲ သမ္မတဗိုၚ်ဒေန်ဂှ်ဝွံ ဂၠါဲဂွံလဝ်သြန်ဗွဝ် တၟာဂလိုၚ်ရောၚ် မဒှ်ရ။
ပေါဲပြိုၚ်ပ္ကာန်ဂလာန်ကေတ်မာန် ညးတံၜါတၠ ပ္ဍဲသၞာံ ၂၀၂၀ တေံဂှ် ကောန်ဍုၚ်အမေရိကာန် မၚ်ဗဵုကဵုဇြဟတ် နွံလဝ် ၇၃ ပြကောဋိကိုဋ်ကီုလေဝ် ပေါဲဟီုပြိုၚ်ဂလာန် လက္ကရဴအိုတ်ဏံဂှ် ကောန်ဍုၚ်အမေရိကာန် ကဵုဇြဟတ် နွံလဝ် ၄၈ ပြကောဋိကိုဋ်ဓဝ်ရ။
ဗိုၚ်ဒေန် မဒှ်သမ္မတအမေရိကာန် အာယုက်ဇၞော်အိုတ်ဂှ်ဝွံ အပ္ဍဲကဵုရုဲစှ် ညးစၞးပေါဲရုဲမာဲ ဗော်ဒဳမဝ်ကရေတ်တံဂှ် ဂွံဒုၚ်ရုဲစှ်လဝ် ဗွဲမလောဲသွာရ။
သမ္မတတြေံ ထြာပ်ဂှ်တှ်ေ အပ္ဍဲကဵုရုဲစှ်လဝ် ညးစၞးဗော်ရဳပါပလေတ်ကာန်ဂှ် လုပ်ပြိုၚ်ပ္ကာန်လဝ် ဗွဲမဝါတ်ဂါတ်တုဲ ဂွံဇၞးလဝ်ရ။
ဂကောံစန်ဒက်မာဲ ထြာပ်ဂှ်တှ်ေ ထ္မံက်ထ္ၜးလဝ် ဗဳဒဳယိုဝ်သ္ကုတ် ဗိုၚ်ဒေန် ဒှ်ဒၟံၚ်တတတံၚ်ၚ် ဟွံကလိတ်ကလောတ်ဂှ်တုဲ ညးဝွံ ဂွံယိုက်ဂၠေၚ်လျိုၚ် နဒဒှ်သမ္မတဂှ် ဟွံဒးရးရပုဟ်ဂှ် ဟီုလဝ်ရ။
Ref: Reuters