နေဗျဳဒဝ်၊ ဂျူလာၚ် ၁၄
သ္ၚဳဂၠိပ် တၚ်ဍိုန်လျ၊ တၚ်ဂွံဇြဟတ် နူကဵုတန်ဗ္တောန်ကွတ်ပၞာန် ပံက်လဝ်တုဲတုဲတံဂှ်တုဲ သွက်တန်ဗ္တောန်ကွတ်ပၞာန် သ္ဂောံပံက်အာဂတဏံ အတိုၚ်လၟိဟ်မရန်လဝ်ညံၚ်ဂွံပေၚ်ဂှ် စွံအာရီုပ္တိတ်ဇြဟတ်အိုတ်ညိဂှ် ဝန်ဇၞော်ကာစဵုဒၞါ ကံၚ်ဇြဳပၞာန်ခါန်ကၞက်လဝ်ဂှ် ကဵုလဝ်ဇြဟတ်ဂရိုဟ်ရ။
ပ္ဍဲကဵုကောံဓရီုပ္ညဳပ္ညပ်ကမၠောန် ဂကောံကော်ညးယိုက်လျိုၚ်ပၞာန် မကၠောန်ဗဒှ်လဝ် ပ္ဍဲဂိတုဂျူလာၚ် ၁၂ ဂှ် သ္ကိုပ်ဗိုလ်ဇၞော်တေန်အံၚ်သာန် ဝန်ဇၞော်ကာစဵုဒၞါ သီုကဵုဒှ်ဥက္ကဌ ဂကောံကော်ညးယိုက်လျိုၚ်ပၞာန် ဗဟဵုဂှ် ဟီုလဝ်ရ။
ဝန်ဇၞော်ကာစဵုဒၞါဂှ် သွက်တန်ဗ္တောန်ကွတ်ပၞာန် သ္ဂောံပံက်အာဂတဏံဂှ် သ္ပဒတန်တြးလဝ် Time Frame တံတုဲဂှ်ရ လၟေၚ်ကမၠောန်ကော်ညးယိုက်လျိုၚ်ပၞာန်တံဂှ် အပ္ဍဲအခိၚ်မစၟတ်လဝ် ညံၚ်ဂွံတုဲဒှ် သွက်ဂွံစၟဳတ် နကဵုစရၚ်အၚ်ဂှ် သ္ဂးရ။
သ္အာၚ်နူဂှ်ပၠန် ပ္ဍဲအရာကံက်စရၚ်ညးယိုက်လျိုၚ်ပၞာန်တံဂှ် ညံၚ်ညးအာယုက်ပေၚ်တုဲတံကဵု အာယုက်ၜက်အာတံ ဟွံဂွံပါလုပ်ဂှ်ကီု၊ စုတ်စရၚ်အတေၚ်အဓမ္မကီု၊ စုတ်စၞးညးမွဲတုဲ ပွမပလံၚ်ဗစိုပ်တံ ညံၚ်ဟွံဂွံမွဲ သ္ကိုပ်အုပ်ဓုပ်ကွာန်တံ သွက်ဂွံစွံအာရီုကောပ်ကာဲအာ အရာဟွံဓဝ်ယာတံဂှ် ညးဟီုလဝ်ရ။
သ္ကိုပ်အုပ်ဓုပ်ကွာန်အရာပ် နွံအပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန် မွဲတၠဂှ် သွက်ဂွံယိုက်လျိုၚ်ပၞာန်ဂှ် ကော်မၞိဟ်ဟွံဂွံရတုဲ ကဵုဂလိုၚ်ပ္တိုန်လှုဲဏောၚ် ဟီုကီုလေဝ် ဟိုတ်နူဟွံဗက်အိုတ်ဂှ်ရ ကေတ်အရေဝ်မ္ဂးလေဝ် ဒးဒုၚ်ရဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ရဲလုပ်ပၞာန်ဂှ်တှ်ေ ကော်ဟွံဂွံဟဂှ်ရ။ ကဵုဂလိုၚ်ပ္တိုန်လှုဲဏောၚ်ဟီုကီုလေဝ် ဟွံဗက်ညးသ္ကအ်အိုတ်ရပုဟ်။ အေ ဂှ်တှ်ေ လ္ပာ်ပိုယ်တံလေဝ် ဒဒှ်ရကော်မၞိဟ်ဟွံဂွံဂှ် ပ္တိုန်ထ္ၜးလဝ်ရ။ ဂၠါဲကဵုမၞိဟ်ဟွံဂွံတုဲ ကေတ်အရေဝ်ဏောၚ်ဟီုမ္ဂးလေဝ် ဒးဒုၚ်ရဏောၚ်။ ဖျေံထံၚ်မ္ဂးလေဝ် ဒးဒုၚ်ရဏောၚ်။ လ္ပာ်ပိုယ် ဂွံဂွံမၞိဟ် ဂၠါဲဒၟံၚ်ကီုလေဝ် ရဲဒုၚ်ကဵုလျိုၚ် လမျီုပိုယ်ဂှ် ဟွံမွဲပုဟ်။ ပ္တိုန်လဝ်လိက်နုက်တိတ်ဂှ်လေဝ် ဟွံကဵုတိတ်ပုဟ်။ ဒးထံၚ်တှ်ေ ကလေၚ်ဗၠးကၠုၚ်မာန်ဒၟံၚ်ဏီ။ ဒးဒုၚ်ဂစိုတ်တှ်ေ တုဲဒှ်အာဟဂှ်ရ” သာ်ဝွံ သ္ဂးရ။
နကဵုကံၚ်ဇြဳပၞာန် အခိၚ်ဇြဟတ်ဍိုန်ကၠုၚ်ဒၟံၚ် ကဵုပၞာန်ထ္ပက်အလုံဍုၚ်မွဲဂှ် ပ္ဍဲသၞာံဏံ ဂိတုဖေဖဝ်ဝါရဳဂှ် ဂယိုၚ်ပ္တိုန်လဝ် သၞောဝ်ယိုက်လျိုၚ်ပၞာန် မစၞောန်ပျးလဝ် ပ္ဍဲလက်ထက်ဥူတာန်ယှိုဲ တၠအဝဵုပၞာန်တြေံဂှ်ရ။
အတိုၚ်လိက်ဒုၚ်စဳရေၚ် ဂကောံမၚ်လ္ၚတ် ကေၚ်ကာဍုၚ်ဗၟာ ကေုာံ ပဋိပက္ခ BACS ဂှ်မ္ဂး သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) ဂှ် ပံက်လဝ်ဘာတန်ဗ္တောန် ၂၁ ဘာတုဲ ပ္ဍဲကဵု ၂ လၟေၚ်ဏံဂှ် ညးသၟတ် ဗ္ဒါဲ ၉၀၀၀ ဒးဒုၚ်ပကောံလဝ် နဒဒှ်ကောန်ပၞာန်ရ။
တုဲကၠုၚ် ပ္ဍဲဂိတုဂျောန်ကြပ်အိုတ်တေံ ကောန်ပၞာန်စှ်ေနူတန်ဗ္တောန်ကွတ်ပၞာန် လၟေၚ် (၁) တံဂှ် သွက်ဂွံစဴ ဇရေၚ်ဂြောဝ်ဂတာတံဂှ် ကံၚ်ဇြဳပၞာန် ဟွံကဵုလဝ်အခေါၚ်တုဲ ပလံၚ်ဏာလဝ် ဒၞါဲပေါဲဗ္တိုက်သ္ကာတ်မြဟ် မပ္တံကဵုတွဵုရးကချေၚ်၊ ရးသေံသ္ကုတ်သၟဝ်ကျာ ကေုာံ ဗ္ဒိုပ်ဒပ်နွံမုက်ပၞာန် ပ္ဍဲရခေၚ်တံဂှ် လွာဲဂှ်ရောၚ် ဌာန်ပရိုၚ်ဂမၠိုၚ် ထ္မံက်ထ္ၜးလဝ်အိုတ်ရ။
သ္အာၚ်နူဂှ်ပၠန် ကုကောန်ပၞာန်စှ်ေနူတန်ဗ္တောန်တံဂှ် သီုကဵုယၟု သွက်ဂွံပါ်ပရအ်ပြံၚ်ဆုဲအာ ပ္ဍဲကဵုတမ်ဒပ် ခမရ၊ ခလရ နွံသၟဝ်ကောပ်ကာဲ ဌာန်ဂအုပ်ပၞာန်ရး ဒေသဒၞါဲပေါဲဗ္တိုက်သ္ကာတ်မြဟ်ဒၟံၚ်ဂှ်ရောၚ် ပရိုၚ်ဂမၠိုၚ် မံက်တိတ်လဝ်ရ။
ဟိုတ်နူအကာဲအရာတံဏံတုဲ သွက်တန်ဗ္တောန်ကၠုၚ်စိုပ် လၟေၚ်ဂတဂတတံဏံဂှ် ရဲမရန်လဝ်သ္ဂောံဗက်လုပ်အာပၞာန်တံရဂှ် ဂြိပ်တိတ်တံ နွံတုဲ လ္ၚဵုတံဂှ်လေဝ် လှုဲဂလိုၚ်လဵုကဵုကဵု ဟွံဗက်ရပုဟ်ဂှ် သ္ကိုပ်အုပ်ဓုပ်ကွာန်အရာပ်မွဲတၠပၠန်ဂှ် ဟီုလဝ်ရ။
“ကၠာတေံဂှ်တှ်ေ မၞိဟ်စွံလဝ် သွက်လၟေၚ်ဂတတုဲ ကဵုဗ္စလဝ်တံ မၞိဟ်ဗက်ဏောၚ် ဟီုလဝ်တံရဂှ် အာကလေၚ်ဂၠါဲကော်ဂှ် လ္ၚဵုတံဂှ်တှ်ေ ဂြိပ်အာယျ။ လ္ၚဵုတံဂှ် ၜိုတ်လဵုကဵုကဵု ဟွံဗက်ပုဟ် ဟီုတဴရ။ အာကော်အတေၚ်အဓမ္မတုဲ ပရိုၚ်တိတ်ကၠုၚ်မ္ဂး ဒးဒုၚ်ဂစိုတ်ဂှ်လေဝ် ဖေက်ဒၟံၚ်။ ဂွံဂွံမၞိဟ်ဂှ်တှ်ေ ဒှ်ဒၟံၚ်အကာဲအရာ သာ်လဵုမှ ဟွံလောဲပုဟ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ပ္ဍဲအရာထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်တံဂှ် ဌာနဝန်ဇၞော် မဆေၚ်စပ်တံ၊ သ္ကိုပ်ဝန်ဇၞော်တွဵုရး ကေုာံ ရးဒေသတံ ဂွံပံၚ်တောဲရေၚ်တၠုၚ်ညးသ္ကအ် ဗွဲမစိုပ်တရဴအိုတ်ဂှ် နွံပၟိက်ရောၚ် ဒဒှ်ရစၞောန်လဝ်ဂှ် ဝန်ဇၞော်ကာဍုၚ်သ္အာၚ် သ္ဂးရ။
အခိၚ်လၟုဟ် သွက်ဂွံဗပေၚ် ဇြဟတ်ဒပ်လေၚ်ဒိုက်ဒၟံၚ်တံဂှ် ပံက်လဝ် ဘာတန်ဗ္တောန်ပ္ကတ်ပ္ကေၚ် နွံပ္ဍဲတိဍာ်ဌာန်ဂအုပ်ရးပၞာန် မဆေၚ်စပ်တံ စဵုကဵု လၟေၚ် (၃) တုဲ သွက်ဂွံပ္ကောံကောန်ပၞာန် သွက်လၟေၚ်ဂတဏံဂှ် စၞောန်ပ္ညုၚ်ကၠုၚ်ဒၟံၚ်ရ။
ညးခါတ်အကာဲပရေၚ်ပၞာန်ဂှ်တှ်ေ ကံၚ်ဇြဳပၞာန် ဇြဟတ်ဒပ်ဍိုန်လျကၠုၚ်ဒၟံၚ်ဂှ်ဝွံ သွက်ဂွံဗဒေါအ်ကၠေံ ပၞာန်ထ္ပက်ဂကောံဇြဟတ်ပၠန်ဂတးတံမာန်၊ သွက်ဂွံဗပေၚ်ဇြဟတ်ပၞာန် အရာမနွံပၟိက်တံဂှ်တုဲ ကဵုတန်ဗ္တောန် ကုကောန်ဒပ်တၟိတၟိတံတုဲ စဳဇန်ဒၟံၚ် သွက်ဂွံပလံၚ်မုက်ပၞာန်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram