ရေဝ်၊ ဂျူလာၚ် ၁၆
ပ္ဍဲပွိုၚ်ဍုၚ်ရေဝ် မဒှ်ပွိုၚ်ဍုၚ် တွဵုရးဍုၚ်မန် မဒးဒုၚ်လလောၚ်တြးလဝ် အမိၚ်အုပ်ဓုပ်ပၞာန်ဂှ် ဒပ်ကံၚ်ဇြဳပၞာန် ကၠောန်သ္ပၚးတးဒၟံၚ်တိဍာ် နကဵုကောန်ဒပ်စှ်ေနူတန်ဗ္တောန်ကွတ်ပၞာန်တံရောၚ်ဂှ် ဂွံတီကေတ် နူကဵုဒပ်ပၠန်ဂတးဍုၚ်မန် MSRF ကဵု ညးဒေသတံရ။
တုဲကၠုၚ် ပ္ဍဲဂိတုဂျောန် ၂၈ တေံ ပ္ဍဲကဵုဘာတန်ဗ္တောန်ဒေသ ဌာန်ဂအုပ်ပၞာန်ရးညးကဵုညးဂှ် ကောန်ဒပ်စှ်ေနူတန်ဗ္တောန် လၟေၚ် (၁) တံဂှ် ပ္ဍဲဂိတုဂျူလာၚ်မံက်တေံ ကံၚ်ဇြဳပၞာန် ပလံၚ်ဏာလဝ် ဒၞါဲဒေသပေါဲဗ္တိုက်က္တဵုဒှ်တံကဵု ဒၞါဲနွံပၟိက်ဒၟံၚ်ကုဇြဟတ်တံရ။
ပ္ဍဲကဵုဏံ စကခ ၁၉ ဌာန်ဂအုပ်ကောပ်ကာဲပရေၚ်ပၞာန် နွံဒၟံၚ်ပ္ဍဲပွိုၚ်ဍုၚ်ရေဝ်ဂှ်လေဝ် ပါလုပ်တုဲ ကောန်ဒပ်စှ်ေနူတန်ဗ္တောန်ကွတ်ပၞာန်တံဂှ် နူကဵုဂၠံၚ်ဍာ်မွဲကဆံၚ် ရပ်စပ်ကွဳစက်ကောန်အရာပ်တံတုဲ ပလံၚ်ဗစိုပ်လဝ်ရောၚ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံ အဓိက သ္ပပဓာန်ကဵု ဂၠံၚ်ဍာ်ရဏောၚ်။ ဂၠံၚ်ကုန်ဂှ်တှ်ေ ဟွံလောဲပုဟ်။ ကေတ်ကွဳစက်ကောန်အရာပ်တုဲ ပ္တိုန်ဏာမၞိဟ်ဍေံတံရ။ အဓိကဂှ်တှ်ေ စကခ ၁၉ ရဏောၚ် လုပ်။ ကလေၚ်တြးကၠုၚ် နူကဵု ၁၉ ဂှ်ရ။ လၟုဟ် တမ်ဒပ်မွဲမွဲ ဍေံတံ ပလံၚ်နၚ်မ္ဂး လၟိဟ်ဂှ် ချိၚ်ကေတ်တှ်ေ ၜိုတ် ၅၀/၁၀၀ နွံဏောၚ်။ ဗ္ဒါဲပိုယ်ဏံ တမ်ဒပ်ပိဒပ် နွံဒၟံၚ်။ စိုပ်ကၠုၚ်လ္ပာ်ဏံဂှ် ဂွံၜါသတ္တာဟယျ” သာ်ဝွံ သ္ဂးရ။
မွဲလ္ပာ်ဂှ်ပၠန် ဇြဟတ်နွံဒၟံၚ်တုဲတုဲတံကဵု ဇြဟတ်စိုပ်ကၠုၚ်တၟိတံဂှ် ပံၚ်တုဲ တိတ်မ္ၚးဒပ်တုဲ ပ္ဍဲကဵုဂၠံၚ်လုပ်တိတ်ကွာန်တံဂှ် လ္တက်ကယျိုၚ်ပၞာန်တုဲ နကဵုဟိုတ်ပရေၚ်ဂီုကၠီု စၟဳတ်ကၠုၚ်ဒၟံၚ်ဂှ်ရ ညးဍုၚ်ကွာန်တံ ဒှ်ပလာပ်ပထုဲဂှ် ညးဒေသဂှ် ဆက်ဟီုရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်လေဝ် နူကဵုလ္ပာ် (ဓမၚ်းဆိပ်ကျားတန်း) ဂှ် လုပ်စိုပ်ကၠုၚ် ပွိုၚ်ဍုၚ်ရေဝ် နကဵုဂၠံၚ်တၟိတုဲ ရပ်စပ်ကွဳစက်ကောန်အရာပ်တံ ကွဳစက်ဖ္ဍိုက်ဍိုတ်၊ ဗ္တဳတံတုဲ ကော်ကေတ်အတေၚ်အဓမ္မတုဲ ဖ္ဍိုက်ပ္တိုန်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဆ္ဂး ကောန်ဒပ်စှ်ေနူတန်ဗ္တောန်တၟိတၟိ ဒးဒုၚ်ပလံၚ်ဏာလဝ် လ္ပာ်ရေဝ်တံဂှ်ဝွံ ဒှ်ကောန်ဒပ်စှ်ေနူဘာတန်ဗ္တောန်ကွတ်ပၞာန် ဒေသလဵုရောဟီုဂှ် ဟွံဂွံတီကေတ်ကီုလေဝ် နကဵုက္ၜၚ်ပိပန်ဖ္ဍိုက် ကၠုၚ်နူလ္ဂုၚ် နကဵုဂၠံၚ်ဍာ်ဂှ် ဂွံမိၚ်ကေတ်တုဲ လ္ပာ်ဝါကလိ ပါ၊ ဟွံပါ ဟွံတီပုဟ်ဂှ် ညးလဴထ္ၜးလဝ်ရ။
နကဵုကံၚ်ဇြဳပၞာန် ပ္ဍဲဂိတုဂျောန် ၂၇ တုဲကၠုၚ်တေံ သွက်ဂွံပါ်တြးဆုဲပြံၚ် ကောန်ပၞာန်စှ်ေနူတန်ဗ္တောန်ကွတ်ပၞာန်တံ ပ္ဍဲကဵုတမ်ဒပ် ခမရ ခလရ နွံသၟဝ်ကောပ်ကာဲ ဌာန်ဂအုပ်ပၞာန်ရး မဆက်စပ်တံဂှ် စၞောန်လဝ်သ္ၚိတ်တ်ရ။
ပ္ဍဲကဵုဏံ ပ္ဍဲကဵုတမ်ဒပ် ခလရ၊ ခမရ နွံသၟဝ်ကောပ်ကာဲ စကခ ၁၉ ဖျေံသ္ဇိုၚ်ပွိုၚ်ဍုၚ်ရေဝ်ဂှ် ကောန်ဒပ် ၃၄၀ ပြၚ် ပါ်ပရအ်ဒးပလံၚ်ဏောၚ် တၚ်စၞောန်ဏံလေဝ် ပါလုပ်ဂှ် ဂွံတီကေတ် အတိုၚ်တၚ်နၚ် နူကဵုဌာန်ပရိုၚ် ဨရာဝတဳတိုၚ်(မ်) ထ္မံက်ထ္ၜးလဝ်ဂှ်ရ။
နာဲနဂါဂှ်တှ်ေ ဒပ်ကံၚ်ဇြဳပၞာန်ဝွံ ပ္ဍဲမွဲဒမြိပ်ပွိုၚ်ဍုၚ်ရေဝ်ဂှ် ပံၚ်ကၠေံဇြဟတ်ဒပ်တံတုဲ ပတေၚ်ဂြတ်လဝ် ပရေၚ်ဂီုကၠီုတံ ၚးတးတိဍာ်တံဂှ်လေဝ် စချဳဒရာၚ်ကၠုၚ်ဂှ် ဟီုရ။
“ ဒပ်ကံၚ်ဇြဳပၞာန်တံဂှ်တှ်ေ ဇြဟတ်စိုပ်ကၠုၚ်တၟိတံကဵု ဇြဟတ်နွံဒၟံၚ်တုဲတုဲတံဂှ် ပံၚ်တုဲ မွဲဒမြိပ်ပွိုၚ်ဍုၚ်ရေဝ်တံဂှ် ဍေံတံကၠောန်ကၠုၚ်ကၚ်ဂီုကၠီုတံ ဂၠိုၚ်ကၠုၚ်ရ။ စၟဳတ်သၟာန်သၟုက်ကၠုၚ် ညးဍုၚ်ကွာန်တံ သာဂၠိုၚ်ကၠုၚ်ရ။ အာစိုပ် စဵုကဵုအပ္ဍဲကၠအ်တံဂှ်တုဲ စၟဳတ်ဒၟံၚ်ဖုၚ်ညးဍုၚ်ကွာန်တံရ။ ပ္ဍဲဂၠံၚ်လုပ်တိတ်ဍုၚ်တံဂှ်လေဝ် ဖျေံကၠုၚ်ဇြဟတ်တံရ။ ပရေၚ်ၚးတးတိဍာ် ကၠာတေံ ဟွံကေၚ်ကၠောန်လဝ်တံဂှ်လေဝ် စတုဲချဳဒရာၚ်ကၠုၚ်ဂှ် ဂွံဆဵုကေတ်ရ” သာ်ဝွံ သ္ဂးရ။
ပွိုၚ်ဍုၚ်ရေဝ်ဝွံ ဖျေံလဝ်ဒပ် နကဵုစကခ ၁၉ ကံၚ်ဇြဳပၞာန်ဂှ်တုဲ တြးလဝ်ဒပ် နကဵုတမ်ဒပ် ၁၃ ဒပ် မဒှ်ရ။ မွဲလ္ပာ်ဂှ်ပၠန် မ္ၚးနူကဵုဂကောံရပ်လွဟ်ကောန်ဍုၚ်အရၚ်တံဂှ် ဒပ်ပၠန်ဂတးအပ္ဍဲဒေသတံကဵု ဒပ်ပံၚ်ကောံမဟာမိတ်တံလေဝ် ဒှ်ဒေသချဳဒရာၚ်ဒၟံၚ်ပရေၚ်ပၞာန် ဇြဟတ်ခိုဟ်မွဲရ။
နူကၞောတ်သၞာံတုဲကၠုၚ်တေံရ ကံၚ်ဇြဳပၞာန် ဒးဗလးလဝ် သ္ကုတ်ဂၠံၚ်ရေဝ်−ထဝါဲဂှ်တုဲ ဟိုတ်နူဂကောံဒပ်ပံၚ်ကောံပၠန်ဂတးတံ အုပ်ဓလီုလဝ်ပေၚ်ၚ်ဂှ်ရ ပရေၚ်ၚးတးတိဍာ်တံဂှ် ဟွံဂွံကၠောန်လဝ်တုဲ ဂၠံၚ်ကုန်ဂှ်လေဝ် သုၚ်စောဲဟွံဂွံတုဲ ဒးသ္ပပဓာန်လဝ် ကုဂၠံၚ်ဍာ်သၟးရ။
ဟိုတ်ဂှ်ရ နကဵုကံၚ်ဇြဳပၞာန် သ္ကုတ်ဂၠံၚ်ဒးဗလးလဝ်တဲ ၆ ဂိတုပြၚ်ဂှ် သွက်ဂွံကလေၚ်အုပ်ဓလီုမာန် နကဵုဇြဟတ် ကောန်ဒပ်စှ်ေနူတန်ဗ္တောန်ကွတ်ပၞာန် တၟိတၟိတံကဵု ဇြဟတ်နွံတုဲတုဲတံဂှ် ပံၚ်တုဲ ကၠောန်သ္ပၚးတးကၠုၚ်တိဍာ် သာ်ဏံရ။
နကဵုဒပ်မဟာမိတ်ဂမၠိုၚ် သွက်ဂွံထပိုတ်ရိုဟ်ကၞက် ဗ္တိုက်သရိုဟ်အာ ဒပ်ကံၚ်ဇြဳပၞာန်ဂှ် ဖျေံလဝ်သန္နိဌာန်တုဲဂှ်ရ တန်တဴကဵုအကာဲအရာအခေါၚ်အရာ ကလိဂွံကၠုၚ်တံကဵု ဇြဟတ်လွဟ်လက်နက်တံဂှ်တုဲ ဆက်လုပ်အာပေါဲဗ္တိုက်ဏောၚ်ဂှ် နာဲနဂါ ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram