နေဗျဳဒဝ်၊ သေပ်တေမ်ဗာ ၄
ဂကောံရပ်လွဟ်ကောန်ဍုၚ်အရၚ် ဂကောံကဝ်က MNDAA ၊ ဂကောံတအာၚ် TNLA ကေုာံ ဂကောံရခေၚ် AA တံဂှ် ကံၚ်ဇြဳပၞာန် လလောၚ်တြးလဝ် နဒဒှ်ဂကောံပကီုပရာပ်ဂှ်ဝွံ ပံက်ဏာတြၚ်ပၞာန်ရဏောၚ်ဂှ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။
ဂကောံဗ္တိုက်သရိုဟ်ပကီုပရာပ်ဗဟဵု ကံၚ်ဇြဳပၞာန်ဂှ် နကဵုတၚ်တုပ်စိုတ် ဂကောံအလဵုအသဳကၟိန်ဍုၚ်ဂှ် ပ္ဍဲဂိတုသေပ်တေမ်ဗာ ၂ တေံ လလောၚ်တြးလဝ် ဂကောံမဟာမိတ်ကောဒေံပိဂကောံ MNDAA, TNLA ကေုာံ AA တံ နဒဒှ်ဂကောံပကီုပရာပ်ရ။
ဂကောံဒးဒုၚ်လလောၚ်တြးဂမၠိုၚ်ဝွံ ဂၠံၚ်ဒဒန်၊ တာဝါတိုၚ်ဓာတ်လလဳတံဂှ် ပစူမာၚ်ပလီုပလာ်ကီု၊ နူဇမ္ၚောဲ ပန်ပှော်ဗ္တိုက် ဍုၚ်၊ ကွာန် ဒၞါဲမၞိဟ်မံၚ်ဂၠိုၚ်တံ နကဵုလွဟ်ဇၞော်ကီု၊ ဖျေံကဵု Drop Bomb တံတုဲ ဗ္တိုက်ကီု ကေုာံ ဟိုတ်နူပလီုပလာ် ကပေါတ်စမြိုၚ်ကၟိန်ဍုၚ်ပိုၚ်တံဂှ်ရောၚ် ကံၚ်ဇြဳပၞာန် သ္ဂးရ။
နကဵုသြၚ်လောန်တိုၚ်(မ်) စပ်ကဵုဂကောံပကီုပရာပ် ကံၚ်ဇြဳပၞာန် လလောၚ်တြးလဝ်ဂှ်တုဲ ဂ္စါန်သၟာန်လဝ် ဂကောံတအာၚ် TNLA ကဵု ဂကောံရခေၚ် AA တံကီုလေဝ် ဟွံဂွံလဝ်အဆက် ကုညးမၞုံအခေါၚ်ဟီုဂး ဂကောံတံဂှ်ရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် လလောၚ်တြးကၠေံ ဂကောံကောဒေံပိဂကောံ နဒဒှ်ဂကောံပကီုပရာပ်ဂှ်ဝွံ နကဵုကံၚ်ဇြဳပၞာန် ဟွံကၠောန်သ္ပပေါဲသဳကၠဳပ္ညဳပ္ညပ်တံရတုဲ ဒှ်သဘဴလလောၚ်တြးထောံပၞာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ် ကလေၚ်တုဲထ္မံက်ပ္တိုန် ဂကောံကောဒေံပိဂကောံ နဒဒှ်ဂကောံပကီုပရာပ်ဂှ်တှ်ေ ပရေၚ်ပ္ညဳပ္ညပ် ပေါဲသဳကၠဳ သ္ဂောံသဳကၠဳကဵုအာညးတံဂှ် ဟွံကၠောန်ရတုဲ ကၟာတ်ထောံတြၚ်ပေါဲသဳကၠဳပရေၚ်ၜိုဟ်လလမ်ဂှ်တုဲ ပံက်ထောံတြၚ်ပၞာန်ရ။ အာဂတနူဏံ ပေါဲဗ္တိုက်ဂကောံကောဒေံပိဂကောံတံဂှ် နကဵုညးတံ ဆက်တုဲဒဒှ်ရဗ္တိုက်အာဏောၚ်ဂှ် ဒှ်သဘဴလလောၚ်တြးလဝ်ပၞာန်ကီုရ” သာ်ဝွံ သ္ဂးရ။
ဂကောံမဟာမိတ်ကောဒေံပိဂကောံဂှ်ဝွံ သၞာံတုဲကၠုၚ် ပ္ဍဲဂိတုအံက်တဝ်ဗာ ၂၇ တေံဂှ် လလောၚ်တြးလဝ်ပၞာန် နကဵုယၟုပရေၚ်ပၞာန် ၁၀၂၇ တုဲ ထ္ပက်ပၞာန် ကုဗ္ဒိုပ်ဒပ်ကံၚ်ဇြဳပၞာန် နွံရးသေံသ္ကုတ်သၟဝ်ကျာကဵု ရခေၚ်တံဂှ်တုဲ သီထိၚ်ကၠုၚ်ဒၟံၚ် ဍုၚ်တံရ။
ကြဴနူဂှ်တုဲ ဟိုတ်နူကြုက်လုပ်အကြာပ္ညဳပ္ညပ်ကဵုတုဲ အကြာကံၚ်ဇြဳပၞာန်ကဵု ဂကောံမဟာမိတ်ကောဒေံပိဂကောတံဂှ် ပရေၚ်သဳကၠဳပ္ညဳပ္ညပ်တံ နွံကၠုၚ် စဵုကဵုပန်ဝါတုဲ သၞာံဏံ အပ္ဍဲဂိတုဂျာန္နဝါရဳဂှ် ထ္ပက်လဝ်စၟတ်တဲ ပ္ဍဲတၚ်တုပ်စိုတ်ဟိုၚ်ဂေန်ရ။
ဆ္ဂး လ္ပာ်ကံၚ်ဇြဳပၞာန် ဝးပ္ကဝ်လဝ် တၚ်တုပ်စိုတ်ဂးတုဲ သၞာံဏံ ပ္ဍဲဂိတုဂျောန် ၂၅ တေံ ပ္ဍဲကဵုဍုၚ် ဗ္ဒိုပ်ဒပ်ကံၚ်ဇြဳပၞာန်တံမၞုံ ပ္ဍဲရးသေံသ္ကုတ်သၟဝ်ကျာဂှ် နဒဒှ်ပရေၚ်ပၞာန် ၁၀၂၇ သ္ကုတ်ဒုတိယတုဲ ကလေၚ်စကၠုၚ်လဝ် ပေါဲဗ္တိုက်တံရ။
နကဵုကံၚ်ဇြဳပၞာန် ဒးဂဗဒၟံၚ်ကဵု ပရေၚ်ကျဗြံဂှ် ပ္ဍဲပရေၚ်ပၞာန် ၁၀၂၇ သ္ကုတ်ဒုတိယဂှ် ဒးဆောံလေၚ်လဝ် ဌာန်ဂအုပ်ပၞာန်ရး ဖျေံသ္ဇိုၚ်လာယှိုဝ်တုဲ ဍုၚ်လ္ၚဵုလ္ၚဵု နူကဵုရးသေံသ္ကုတ်သၟဝ်ကျာကဵု ရးမာန္တလေဝ်တံဂှ်လေဝ် ဒးဗလးလဝ်တဲရ။
ဟိုတ်နူအကာဲအရာတံဏံတုဲ ကြုက်ပ္တိတ်ဒၟံၚ်ဇြဟတ် ပရေၚ်ၜိုဟ်လလမ် ပရေၚ်ပ္ညဳပ္ညပ်သဳကၠဳတံဂှ် နတဲဏံ ဟွံဒှ်ကလောန်ပုဟ်ဟီုဂှ် ကံၚ်ဇြဳပၞာန် ကၠိုဟ်အာဂှ်ရ လလောၚ်တြးလဝ် ဂကောံကောဒေံပိဂကောံ နဒဒှ်ဂကောံပကီုပရာပ်ရောၚ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
ဒံက်တာလှကျဝ်ဇြဝ် ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာ ဖျေံသ္ဇိုၚ်ဍုၚ်ကြုက်ဂှ် နကဵုကံၚ်ဇြဳပၞာန် သ္ဇက်ဂွံပ္တိတ်ကၠုၚ်ဇြဟတ် လ္ပာ်ပရေၚ်ပၞာန်တံ နွံကီုလေဝ် ဂွံစိုပ်တရဴကွေံကွေံဂှ် ဟွံထေၚ်ပုဟ်ဂှ် ဟီုရ။
“နူတမ်တေံရ ညးလေဝ် ဟီုလဝ်တုဲတုဲရလေဝ်။ ကလေၚ်ဗ္တိုက်လာယှိုဝ်ဏောၚ် ကလေၚ်ဗ္တိုက်လံၚ်ကိုၚ်ဏောၚ် ဟီုလဝ်တုဲ လ္ဂောံကဵုပရေၚ်ပၞာန်တှ်ေ ညးသ္ဇက်ဂွံပ္တိတ်ကၠုၚ်ဇြဟတ်ဂှ်နွံ။ ဆ္ဂး အဲရံၚ်ဂှ်တှ်ေ ဒပ်ပၞာန်ညးဂှ် အတိုၚ်ညးစကာ ဂွံဏောၚ်ဂှ် ဟွံထေၚ်ရပုဟ်။ ဒှ်ဟွံမာန်ရပုဟ်။ ဆ္ဂး ကံၚ်ဇြဳပၞာန်ဂှ်လေဝ် ဟွံတန်ကြန်ဒှ်ဒၟံၚ်တုဲ ဗီုပြၚ်ညးချပ်တိုန်တံဂှ်တှ်ေ ဒှ်ကၠုၚ်ဆဆဵုရ။ ဟိုတ်ဂှ်ရ ပရေၚ်ပိုန်ဒြပ်ဍေံတံကီု၊ မုကီုဂှ် ဇီုကပိုက်ကၠုၚ်လေဝ် ပါရ။ ဟိုတ်ဂှ်ရ မတေံညံၚ်ညံၚ်၊ မဏံညံၚ်ၚ် စမ်ကၠောန်ဒၟံၚ်ဏောၚ် ထေၚ်ကေတ်ရ။ စိုပ်တရဴကွေံကွေံဂှ် ဟွံထေၚ်ပုဟ်။ စွံစိုတ် ပကီုပရာပ်ဒှ်ဒှ် ပကီုပရာပ်ဟွံသေၚ်ဒှ်ဒှ် ဗ္တိုက်ဂှ် ဗ္တိုက်ဒၟံၚ်ရလေဝ်” သာ်ဝွံ သ္ဂးရ။
မွဲလ္ပာ်ဂှ်ပၠန် ပရေၚ်ပ္ညဳပ္ညပ်သဳကၠဳပရေၚ်ၜိုဟ်လလမ် အကြာကံၚ်ဇြဳပၞာန် ကဵု ဂကောံမဟာမိတ်ကောဒေံပိဂကောံ ကြုက်သ္ကိုပ်သ္ကဂှ်ဝွံ ပြဟ်ဟ်ဏံ ဒေါအ်ဒေၚ်အာမာန်ကီုလေဝ် စိုပ်ကာလမွဲတ္ၚဲ ပရေၚ်သဳကၠဳပ္ညဳပ္ညပ်တံ ကလေၚ်က္တဵုဒှ်ကၠုၚ်မာန်ရောၚ် ညးထံက်ထ္ၜးလဝ်ရ။
တုဲကၠုၚ် ဂိတုအဝ်ဂါတ်ကြပ်အိုတ်တေံလေဝ် မေဿတာ တုက်ယှဳကျွေန် ညးစၞးတၟေၚ်ကေၚ်ကာအာယှ ဌာနဝန်ဇၞော်ကာဍုၚ်သ္အာၚ်ဍုၚ်ကြုက်ဂှ် သဳကၠဳလဝ် ကုဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာ EAOs လ္ၚဵုတံ နွံလဝ်ရောၚ် ပရိုၚ်တိတ်ဒၟံၚ်ရ။
ပ္ဍဲကဵုဂကောံ EAOs သ္ကုတ်သၟဝ်ကျာတံဂှ် လ္ပာ်ဂကောံဗၠးၜးကချေၚ် KIO ဂှ် သဳကၠဳလဝ် ကုညးစၞးတၟေၚ်ကြုက် နွံလဝ်ရောၚ် မဳဒဳယျာပရိုၚ်ဂမၠိုၚ် ဟီုပ္တိတ်လဝ်တုဲ ဂကောံသှ်ေလ္ၚဵုတံဂှ်တှ်ေ ဟီုပ္တိတ်လဝ် ဟွံမွဲဏီရ။
ကံၚ်ဇြဳပၞာန်ဂှ်တှ်ေ ဒးဆေၚ်ဒၟံၚ်မုက် ပၞာန်ထ္ပက်အလုံဍုၚ်မွဲ ကုဂကောံဇြဟတ်ပၠန်ဂတးရပ်လွဟ်ဂမၠိုၚ် ပါလုပ်သီုကဵု EAOs ပၠန်ဂတးတံဂှ်တုဲ ကဵုဂကောံ EAOs ဒေါအ်ပန်ပှော်လ္ၚဵုတံလေဝ် သဳကၠဳဒၟံၚ်ပရေၚ်ၜိုဟ်လလမ်ရ။
ပရိုၚ်−သြၚ်လောန်တိုၚ်(မ်)
ဗီု−TNLA/Social Media