ဝါယှေန်တာန်၊ သေပ်တေမ်ဗာ ၇
အတိုၚ်အလဵုအသဳအမေရိကာန် လ္ၚတ်လဝ်ဂှ်မ္ဂး တၚ်နၚ်ပါလုပ် ပ္ဍဲတၚ်တုပ်စိုတ်ပရေၚ်ၜိုဟ်လလမ် ဂါဇြာ ၉၀ တၟံကၠံဂှ် အေဿရေ ကေုာံ ဟာမာသ်တံ တုပ်လဝ်စိုတ်တုဲယျတုဲ သွက်ဂွံထ္ပက်စၟတ်တဲ တၚ်တုပ်စိုတ်ဏံ ဒတုဲဂှ် ဒဒှ်ရဖ္တိုက်ဖ္အောဝ်လဝ် သီုၜါလ္ပာ်ဂှ် ဝန်ဇၞော်ကာဍုၚ်သ္အာၚ် အာန်တိုဝ်နဳ ဗလေန်ကာန် ဟီုလဝ်ရ။
ရန်တၟံကဵု သွက်သ္ဂောံဂွံတၚ်တုပ်စိုတ်မွဲမွဲတုဲ ခြာဟွံလအ်ဏံ အမေရိကာန် အဳဂျေပ် ကေုာံ ဍုၚ်ကာတာတံ ပ္တိုန်ထ္ၜးကဵုအာ လညာတ်တၞဟ်ဟ်တံဏောၚ်ဂှ် ဝန်ဇၞော် ဗလေန်ကာန် ဟီုရ။
သ္ကိုပ်ဝန်ဇၞော်အေဿရေ ဗေန်ဂျမေန် နေတာန်ညာဟု ပ္ဍဲကဵုသ္ပလဝ်သၟာန်သွဟ် ကုဌာန်ပရိုၚ် Fox News မွဲဂှ် တၚ်တုပ်စိုတ် ၉၀ တၟံကၠံ ဒှ်ဒၟံၚ်ဒတုဲယျ ဂလာန်ဏံဂှ် တးပါဲလဝ်တုဲ ၜိုတ်ကဆံၚ်ဏံ ဟွံကြပ်ဏီပုဟ်ဂှ် ဟီုဏာလဝ်ရ။
ဆ္ဂး ဗလေန်ကာန်ဂှ်တှ်ေ ဒုၚ်သ္ဇိုၚ်ကဵုညးဂွံဆဵုညာတ်လဝ်တုဲ ဒးဟီုမ္ဂး ၜိုတ် ၉၀ တၟံကၠံ တုပ်လဝ်စိုတ်တုဲယျ ဟီုဂွံရောၚ် ထေၚ်ကေတ်ဂှ် ဟီုလဝ် ပ္ဍဲလၟေၚ်တရဴဟေတဳရ။
ကၠုၚ်စိုပ် ပ္ဍဲဂိတုဂျာန္နဝါရဳဏံ ကၠာသမ္မတဗိုၚ်ဒေန် ဟွံဂွံတိတ်နူ သ္ၚိဗုဂှ် တၚ်တုပ်စိုတ်ဒေါအ်ပန်ပှော် ဂါဇြာ ကလိဂွံမာန်ဏောၚ် ဝန်ဇၞော်ဗလေန်ကာန် ဟီုလဝ်ရ။
ဆ္ဂး ပ္ဍဲကဵုပယျဵု ဂါဇြာ ကေုာံ အေဿရေ ဂှ် ဆက်စွံအာ ကောန်ဒပ်အေဿရေတံညိညဏောၚ် စပ်ကဵုသ္ကိုပ်ဝန်ဇၞော် နေတာန်ညာဟုဟီုလဝ်ဂှ်တုဲ ၜါလ္ပာ် လညာတ်ဟွံတုပ်သၟဟ်တံ နွံဒၟံၚ်ရ။
ညံၚ်ပရေၚ်ဆက်ဆောံ ကုဍုၚ်အာရာပ်တံ ဂွံခိုဟ်တိုန် ကဵုက္ဍိုပ်ရေၚ်တၠုၚ်အာဏောၚ် နကဵုသ္ကိုပ်ဝန်ဇၞော် နေတာန်ညာဟု မဟီုလဝ်ဂှ် စၟဳစလဝ် ဒဒှ်ရကလိဂွံ တၚ်တုပ်စိုတ် ကုဇြဝ်ဒဳအာရေဗဳယျာမွဲ မာန်ဏောၚ် မဒှ်ရ။
သၞာံတုဲကၠုၚ် ပ္ဍဲဂိတုအံက်တဝ်ဗာတေံ ဂကောံဟာမာသ် လုပ်စိုပ်ဗ္တိုက် သ္ကုတ်သၠုၚ်ကျာဍုၚ်အေဿရေတုဲ ရပ်ဒက်ဏာလဝ် ညးဒးဒုၚ်သ္ပဒၞန် ဗွဲမဂၠိုၚ်ဂၠေၚ်တုဲ အေဿရေ ဂှ်တှ်ေ သွက်ဂွံပသောၚ် ရဲရပ်လွဟ်ဟာမာဿ် နွံပ္ဍဲဂါဇြာတံဂှ် ကၠောန်သ္ပဒၟံၚ် ပရေၚ်ပြုပြေၚ်ပၞာန်တံရ။
ဟိုတ်နူပရေၚ်ပၞာန်အေဿရေတုဲ ပ္ဍဲဂါဇြာ ကောန်အရာပ်ချိုတ် နွံလဝ် ဗွဲမဂၠိုၚ်ဂၠေၚ်တုဲ ညးဒးထောံလသာသ္ၚိဌာန် နွံကၠုၚ် ကဵုပြကောဋိကိုဋ်တုဲ သွက်သ္ဂောံဂွံတၚ်တုပ်စိုတ်ဒေါအ်ပန်ပှော်ဂှ် အမေရိကာန်၊ အဳဂျေပ် ကေုာံ ကာတာတံ ပ္တိတ်ဒၟံၚ်ဇြဟတ်အိုတ် မဒှ်ရ။
Ref: AFP