ဘာပန်၊ သေပ်တေမ်ဗာ ၁၀
တွဵုရးကရေၚ် ပွိုၚ်ဍုၚ်ဘာပန် ပ္ဍဲဒေသကတိုၚ်တိဂှ် စနူဂိတုသေပ်တေမ်ဗာမံက်တုဲ ဒပ်ကံၚ်ဇြဳပၞာန်ကဵု ဒပ် BGF တံ သၠဲပ္တိုန်ဇြဟတ်ဒပ်တုဲ လုပ်စိုပ်ကၠောန်ၜိုတ်ဒၟံၚ် ပရေၚ်ချဳဒရာၚ်ပရေၚ်ပၞာန်တံရောၚ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် ဟီုရ။
ဒပ်ကံၚ်ဇြဳပၞာန် ကေုာံ BGF ဇြဟတ် ၁၀၀ ပြၚ်ဂှ်ဝွံ နူကဵုဍုၚ်ကမမံၚ်မွဲကဆံၚ် လုပ်စိုပ်ကၠုၚ် ပ္ဍဲကွာန်ကတိုၚ်တိ တိဍာ်ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU ရ။
နကဵုဒပ်ကံၚ်ဇြဳပၞာန် ၜက်ကၠုၚ် နူကဵုကွာန်ကတိုၚ်တိတုဲ ယဝ်ရဆက်တိုန်ကၠုၚ် လ္ပာ်ဘာပန်မ္ဂး ပေါဲဗ္တိုက်ဗွဲမသ္ကာတ်မြဟ် က္တဵုဒှ်မာန်ရောၚ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ကံၚ်ဇြဳပၞာန် ကေုာံ ဒပ် BGF စိုပ်ကၠုၚ် နကဵုဇြဟတ် ၁၀၀ ပြၚ်ဂှ်ဝွံ ၜိုန်ရကဵုအထံက်ရီုပရေၚ်ပၞာန် လ္ပာ်ဍုၚ်ဘာပန် ဒၞါဲဒပ်ပံၚ်ကောံ KNLA တံ မပူဗိုၚ်လဝ်ဂှ် ဟွံမာန်ကီုလေဝ် ညံၚ်ဒပ်ပံၚ်ကောံတံ ဂွံဒှ်ပလာပ်ပထုဲ ဒှ်သဘဴချဳဒရာၚ်လဝ်ပရေၚ်ပၞာန် နူကဵုဇမ္ၚောဲ ဒှ်မာန်ဂှ် သ္ကိုပ်ဗိုလ်ဇၞော် သဝ်ကလာဒိုဝ် သ္ၚဳဂၠိပ်လဝ်ရ။
အပ္ဍဲကွာန်ကတိုၚ်တိဂှ် ဗ္ဒိုပ်ဒပ်ကံၚ်ဇြဳပၞာန်မွဲကဵု ဌာန်ဂအုပ်တမ်ဒပ် ဒပ်မၚ်ပယျဵု BGF မွဲ နွံတုဲ နူကဵုကတိုၚ်တိ လ္ပာ်လ္တူၜိုတ် ၄၀ မိုၚ်ပြၚ်ဂှ် ဍုၚ်ဘာပန်နွံရ။
လ္ပာ်ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဆက်ဗိုၚ်ကၟာတ်လဒဵုလဝ် ဗျူဟာပၞာန်ဖျေံသ္ဇိုၚ်ဘာပန် ကေုာံ ဗ္ဒိုပ်တမ်ဒပ်တံဂှ်တုဲ သွက်ဗ္ဒိုပ်ဗျူဟာ ကေုာံ ဇွောံမ ဒပ်ကံၚ်ဇြဳပၞာန် ဒးဒုၚ်ကၟာတ်လဒဵုတံဂှ် ဒးသ္ပပဓာန်ဒၟံၚ် နူကဵုတရဴကျာသၟးရ။
ပ္ဍဲခရိုၚ်ဘာပန် KNU ဂှ် အပ္ဍဲဂိတုအဝ်ဂါတ်တုဲကၠုၚ် ပွိုၚ်မွဲဂိတုဂှ် အကြာဒပ်ပံၚ်ကောံ KNLA ကဵု ဒပ်ကံၚ်ဇြဳပၞာန်ဂှ် ပေါဲဗ္တိုက်အပံၚ် က္တဵုဒှ်လဝ် ၁၀၀ ပြၚ်တုဲ လ္ပာ်ကံၚ်ဇြဳပၞာန် ဗ္ဒါဲ ၅၀ ဇီုကပိုက်ချိုတ်အာလဝ် နွံရောၚ် ဂွံတီကေတ် အတိုၚ်တၚ်လလောၚ်တြး ဌာန်ဂအုပ် ဒပ်မဟာ ၅ ရ။
ပရိုၚ်−သြၚ်လောန်တိုၚ်(မ်)
ဗီု−CJ