မတ်မလီု၊ သေပ်တေမ်ဗာ ၁၀
အပ္ဍဲကာလသီအဝဵုဏံ ၚုဟ်ထဝ် ကေုာံ ၚုဟ်ဒဝ်ဠာ အပ္ဍဲဍုၚ် စိုပ်အာ ဒဵုကဵုၚုဟ်ဟွံကေၚ်က္တဵုဒှ်လဝ် အပ္ဍဲဝၚ်ဂှ်ဝွံ စနူဂိတုသေပ်တေမ်ဗာ သတ္တာဟပထမတုဲ စှ်ေကၠုၚ်ဒၟံၚ် အဆက်က်ရ။
တုဲကၠုၚ် ပ္ဍဲဂိတုအဝ်ဂါတ် သတ္တာဟဒုတိယဂှ် ၚုဟ်ဒဝ်ဠာအမေရိကာန် မွဲဒဝ်ဠာ ဒှ်အာလဝ်ၚုဟ် စဵုကဵု ၇၀၀၀ ဒ္ကေဝ်ပြၚ်ဂှ်ဝွံ အခါလၟုဟ် မွဲဒဝ်ဠာဂှ် ၚုဟ်စှ်ေအာ စဵုကဵု ၅၀၀၀ ဒ္ကေဝ်ရ။
ၚုဟ်ထဝ်ဒကောၚ် မဳဠေန် အပ္ဍဲဍုၚ်ဂှ်လေဝ် မွဲဒ္ကေဝ် နူ ၈၀ ကိုဋ်ဒ္ကေဝ်ဂှ် စှ်ေအာ စဵုကဵု ၆၃ ကိုဋ်ဒ္ကေဝ် မဒှ်ရ။
တၠပညာပရေၚ်ပိုန်ဒြပ်မွဲတၠဂှ် ၚုဟ်သြန်ဍုၚ်သ္အာၚ်တံ သၠုၚ်တိုန်ကၠုၚ်လဝ်ဂှ်ဝွံ ဟိုတ်နူကံၚ်ဇြဳပၞာန် ထိၚ်ဒက်လဝ် ဗွဝ်ဖျာလှာဲဂတးသြန်ဍုၚ်သ္အာၚ်တံဏောၚ်တုဲ ၚုဟ်ဂွံထပ်စှ်ေ ဂှ်တှ်ေ ဒးဗလးကဵု ဗွဝ်ဖျာသြန်ဍုၚ်သ္အာၚ်ဏံထေက်ဂှ် ထံက်ထ္ၜးလဝ်ရ။
“ၚုဟ်လှာဲလှုဲဟီုဂှ် ဒှ်ၚုဟ်ထိၚ်လဝ် ၚုဟ်ဖျာသီုဖအိုတ်ဂှ်ရဏောၚ်။ အေ ဂှ်တှ်ေ အာထိၚ်ထောံ ၚုဟ်လှာဲလှုဲဏံဂှ်တှ်ေ ဒှ်ညံၚ်ရဴပလီုထောံ ဗွဝ်ဖျာလှာဲသြန်ဍုၚ်သ္အာၚ်ဏံဂှ်ရဏောၚ်။ ဍာံဍာံဂှ် ကၠောန်ဒၟံၚ်သၞောတ်ပရေၚ်ပိုန်ဒြပ်ဗွဝ်ဖျာတုဲ ပရေၚ်ပိုန်ဒြပ်ဗွဝ်ဖျာဟီုဂှ် အရၚ်ဇကုသၟးဟွံသေၚ်ပုဟ်။ ဍုၚ်ကောန်မျူနေတ်တံရဂှ် ကၠောန်ဒၟံၚ်ပရေၚ်ပိုန်ဒြပ်ဗွဝ်ဖျာရဏောၚ်။ ဗွဝ်ဖျာဏံဂှ်တှ်ေ ဒးဗလးကဵုထေက်။ ဒးဗလးကဵုကၠာအိုတ်ဂှ်တှ်ေ ဗွဝ်ဖျာသြန်ဍုၚ်သ္အာၚ်၊ ဍေံတံဂှ် ထိၚ်လဝ်ဗွဝ်ဖျာသြန်ဍုၚ်သ္အာၚ်တုဲ ထိၚ်ၚုဟ်တံဏံမာန်ဏောၚ်ဂှ် ထေၚ်လဝ်ရ” သာ်ဝွံ သ္ဂးရ။
သ္အာၚ်နူဂှ်ပၠန် နကဵုကံၚ်ဇြဳပၞာန် ယဝ်ရဗလးကဵုဗွဝ်ဖျာ ထိၚ်ဒက်လဝ်တံဏံဂှ်မ္ဂး သီုဒဝ်ဠာ မပါလုပ် ၚုဟ်သြန်ဍုၚ်သ္အာၚ် ကေုာံ စနူကဵုထဝ်တံဂှ် ၚုဟ်စှ်ေကၠုၚ်တီတီဏောၚ်တုဲ ယဝ်ဆက်အာအတိုၚ်ဏံမ္ဂး ၚုဟ်စှ်ေကၠုၚ်လၟုဟ်ဂှ်ဝွံ ဒှ်အာသဘဴစှ်ေလဝ်မွဲချိုန်ခဏရဏောၚ်ဂှ် ညးဆက်ဟီုရ။
အခိၚ်လၟုဟ် အပ္ဍဲဗွဝ်ဖျာ ဒဝ်ဠာကဵု ထဝ်ဂှ် ဂွိၚ်ကဵုၚုဟ်ထပ်စှ်ဂှ်ေတုဲ ကလေၚ်သွံဒၟံၚ်တံ နွံတုဲ ၚုဟ်လ္ပာ်စှ်ေ ဟိုတ်နူၚုဟ်ဟွံညိၚ်ဏီဂှ်ရ ဒေါအ်ဇူလဝ် ပရေၚ်သွံရာန်တံ နွံရောၚ် ဂွံတီကေတ် ဇရေၚ်တၠကမၠောန်ထဝ်တံရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ညံၚ်ၚုဟ်လှုဲဍုၚ်သ္အာၚ်ကဵု ၚုဟ်ထဝ်တံ ဂွံသၠုၚ်တိုန်ကၠုၚ်ဂှ် ကၠောန်ဒၟံၚ်ဂးတုဲ အပ္ဍဲဂိတုတုဲကၠုၚ်တေံ ရပ်ဒက်လဝ် တၠကမၠောန်တံ နွံတုဲ ဒဵုကဵုအခိၚ်လၟုဟ် မၚ်ရံၚ်ဒၟံၚ်တံဂှ်ရ ဒးကၠောန်သ္ပဒၟံၚ် ပရေၚ်သွံရာန် ကုဗွဝ်ဖျာဒမၠုက်သၟး မဒှ်ရ။
ပ္ဍဲဍုၚ်ဗၟာ ကၠာဟွံဂွံသီအဝဵုတေံ မွဲဒဝ်ဠာဂှ် ၁၃၀၀ ဒ္ကေဝ်၊ ထဝ်မွဲဒ္ကေဝ်ဂှ် ပွဳပွူ ၁၃ ကိုဋ်ဓဝ် နွံလဝ်ကီုလေဝ် အပ္ဍဲကာလဒပ်ပၞာန်သီအဝဵုဏံ ၚုဟ်သၠုၚ်တိုန်ကၠုၚ် စဵုကဵု ၅ ဆပြၚ်တုဲ ၚုဟ်ဟွံညိၚ်ဝတ်တံ က္တဵုဒှ်ဒၟံၚ် လၟေၚ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ