ဟဏဳ၊ သေပ်တေမ်ဗာ ၁၀
ပ္ဍဲသၞာံဏံ ပ္ဍဲတိုက်အာယှ လဗိုတ်ကျာဇြဟတ်ဇၞော်အိုတ် ဒၟါနူလဗိုတ်ကျာ သူပါတိုၚ်ဝှောန် ယာဂဳဂှ်တုဲ ပ္ဍဲဍုၚ်ဗဳယေတ်နာမ် သ္ကုတ်သၟဝ်ကျာဂှ် မၞိဟ် ၂၁ တၠ ချိုတ်အာလဝ်တုဲ ၂၂၉ တၠ ဇီုကပိုက်ကလိဂွံလဝ်ဝပ်ရောၚ် မဳဒဳယျာကၟိန်ဍုၚ်ပိုၚ် ထ္မံက်ထ္ၜးလဝ်ရ။
လဗိုတ်ကျာဏံဝွံ ပြံၚ်လှာဲအာ နဒဒှ်ဇြဟတ်ပိန်ကျာအောန် ဒေသသ္ကုတ်ဂမ္တဴဂှ်ကီုလေဝ် အခိၚ်ပ္တဝ်အာဒၟံၚ်က္ဍိုပ် လ္ပာ်ပလိုတ်ဂှ် ဍာ်ဇၞော်ဍာ်ကလိုပ် တိလာ်တံ က္တဵုဒှ်မာန်ရောၚ် သၟိၚ်တၠအဝဵုဂမၠိုၚ် ကဵုလဝ်သတိရ။
ဂိတုသေပ်တေမ်ဗာ စၟတ်တ္ၚဲ ၇ အခိၚ်ဒေသ သ္ဂာဗ္တံဂှ် ပ္ဍဲတွဵုရးဟွာဗေန် ဒၞါဲဒဵုဂၠိုၚ်ဂှ် နူဒဵုမွဲမ သရိုဟ်စှ်ေအာလဝ် လ္တူသ္ၚိမၞိဟ်ဒၟံၚ်တံ ညိညတုဲ မၞိဟ်ချိုတ်အာလဝ်နွံတုဲ ပ္ဍဲကဵုမၞိဟ်ချိုတ်အာဂမၠိုၚ် ကောန်ဂြောဝ်ဂတာပန်တၠ ပါလုပ်ရောၚ် ဂွံတီကေတ်ရ။
မၞိဟ်တြုံအာယုက် ၅၁ သၞာံမွဲတၠ ဂြိပ်ဗၠးအာကီုလေဝ် သမ္ဘာညး၊ ကောန်ဝုတ်ညး ကေုာံ ကောန်စဴၜါတၠ ဗၠိုက်အာလဝ် အကြာတိရ။
ဇွညးတံဂှ် ဗွဲကြဴဏံမှ ဂွံကလေၚ်ဂၠါဲဆဵုလဝ်ဂှ် ထ္မံက်ထ္ၜးလဝ် ပ္ဍဲဌာန်ပရိုၚ် အေအေဖ်ပဳရ။
ပ္ဍဲကဵုဒေသသာပါ တွဵုရးလာအိုဝ်ကိုၚ် သ္ကုတ်သၟဝ်ကျာကၟိန်ဍုၚ် ဒၞါဲဒဵုဂၠိုၚ်ဂှ် ပ္ဍဲဂိတုသေပ်တေမ်ဗာ ၈ အခိၚ်လဒေါဝ်တ္ၚဲဂှ် တိလာ် က္တဵုဒှ်လဝ်တုဲ မၞိဟ် ၁၇ တၠ ဗၠိုက်အာလဝ်အကြာတိဂှ် ဌာန်ပရိုၚ်ကၟိန်ဍုၚ်ပိုၚ် လလောၚ်တြးလဝ်ရ။
ကြဴနူဂှ်တုဲ ပ္ဍဲကဵုညးတံ တြဴတၠ ချိုတ်ဒၟံၚ်ဂှ် ဂွံဆဵုကေတ်တုဲ သှ်ေ ၉ တၠဂှ်တှ်ေ ဇီုကပိုက်ကလိဂွံလဝ်ဝပ်ရ။
ပ္ဍဲကဵုညးချိုတ်အာဂမၠိုၚ် မၞိဟ်ဇၞော်ဇၞော်တံကဵု ကောန်ၚာ်သၟတ်တံ ဒဒှ်ရပါလုပ်ဒၟံၚ်ဂှ် သၞာဲဒဴဗဳယေတ်နာမ် ဟီုလဝ်ရ။
ပ္ဍဲဂိတုသေပ်တေမ်ဗာ ၇ အခိၚ်လဗိုတ်ကျာယာဂဳ လုပ်စိုပ်ပိုက် အပ္ဍဲဍုၚ်ဗဳယေတ်နာမ် သ္ကုတ်သၟဝ်ကျာဂှ် ဒမြိပ်ကျာပိုက် မွဲနာဍဳ ၁၂၆ မိုၚ်နွံရောၚ် နူကဵုဌာန်ဒတန်ကဵုသတိ ဇြိုၚ်ကလုံ အေန်ဒိုဝ်−ပသိဝှေခ် ဟီုလဝ်ရ။
ဟိုတ်နူလဗိုတ်ကျာတုဲ စမြိုၚ်ဂမၠိုၚ် ကၟဳကယျာ၊ တၞံဆုဂမၠိုၚ် ကၟိုၚ်အာသီုရိုဟ်တုဲ ပ္ဍဲကဵုဍုၚ်ဟဏဳ မပါလုပ် အပ္ဍဲဒေသဂှ် ဇြဟတ်ဓာတ်လလဳပိုတ်သ္ကုတ်တံ က္တဵုဒှ်ဒၟံၚ်ရ။
သၟာတမ္ၚာဗွဲမဂၠိုၚ်ဂၠေၚ် ကၠေံဒၟံၚ်ရောၚ် ကြဴနူပရိုၚ်တိတ်တုဲဂှ် မၞိဟ်ကၠေံဒၟံၚ် ပ္ဍဲဗလးၜဳ ၂၇ တၠဂှ် ဗက်ဂၠါဲဒၟံၚ်ဖိုဟ်ရ။
ပ္ဍဲကဵုဍုၚ်ဟဏဳကီု သီုကဵုတွဵုရးသ္ကုတ်သၟဝ်ကျာ ၁၂ ဂှ် ဒးကၟာတ်လဝ် ဘာဗ္တောန်လိက်ဂမၠိုၚ် ယာယဳရ။
ကၠာဟွံဂွံလုပ်စိုပ် ဗဳယေတ်နာမ်ဂှ် လဗိုတ်ကျာဏံဝွံ လုပ်စိုပ်ပိုက်လဝ် ဍုၚ်ကြုက် တ္ကအ်ဟိုၚ်နာန် ကေုာံ ဍုၚ်ဖဳလေတ်ဖေန်တံဂှ်တုဲ မၞိဟ် ၂၄ တၠ ချိုတ်တုဲ မၞိဟ်ကလိဂွံဝပ် ဗွဲမဂၠိုၚ်ဂၠေၚ် နွံလဝ်ရ။
Ref: BBC