မတ်မလီု၊ သေပ်တေမ်ဗာ ၁၁
ဟိုတ်နူပဋိပက္ခ ကေုာံ ပရေၚ်ဟွံညိၚ်ဝတ်တံဂှ်တုဲ တၚ်ကော်ဆဴဂမၠိုၚ်နွံဒၟံၚ်ကီုလေဝ် သွက်ဂွံခၞံဗဒှ်ဒၞါဲပွဳပွူပရေၚ်ပညာ ဂီုကၠီုမွဲ ကေုာံ ညံၚ်ဘာဗ္တောန်လိက်ဂမၠိုၚ် ဂွံဗၠးဘဲဂှ် ပ္တိတ်အာဇြဟတ်ဏောၚ် ဗော်သွးကောန်ဂကူကရေၚ် KNU ကဵုလဝ်ကတိရ။
ပ္ဍဲကဵုတၚ်လလောၚ်တြး စပ်ကဵုဘာဗ္တောန်လိက်အပ္ဍဲတိဍာ်ကဝ်တူလေဝ် ဂွံဗၠးဘဲ နူကဵုဗော်သွးကောန်ဂကူကရေၚ် KNU မလလောၚ်ပ္တိတ်လဝ် ပ္ဍဲဂိတုသေပ်တေမ်ဗာ ၉ ဂှ် ဟီုလဝ်ရ။
သ္ပစၟတ်သမ္တီ ကုအခေါၚ်ဗ္တောန်ပညာကောန်ၚာ် မတန်တဴဒၟံၚ်အပ္ဍဲကဝ်တူလေဝ်တံဂှ်တုဲ ဟိုတ်နူပဋိပက္ခရပ်လွဟ် မက္တဵုဒှ်ဒၟံၚ် လၟုဟ်တံဂှ်တုဲ ဂွိၚ်ကဵုဂီုကၠီုဗၠးဘဲ ကေုာံ ပရေၚ်ထတ်ယုက် ကွးဘာ၊ အ္စာ၊ အ္စာၝောံ ကေုာံ ဘာဗ္တောန်လိက်တံဂှ်တုဲ မ္ဒးလလောၚ်ပ္တိတ်လဝ် လိက်လလောၚ်တြးဂှ်ရောၚ် သ္ဂးရ။
KNU ဝွံ ပံၚ်တောဲရေၚ်တၠုၚ်ကဵု ညးဇၞော်လ္ပာ်ပရေၚ်ပညာတံ၊ ညးဍုၚ်ကွာန်ကောန်အရာပ်တံတုဲ သွက်အကာဲအရာကာတၟေၚ်ဂှ် ဆုဲပြံၚ်ဒၞါဲဗၠးဘဲကီု၊ ကၟာတ်ဘာယာယဳတံကီုဂှ် ထ္မံက်ရုပ်ရဴရေၚ်တၠုၚ်အာဏောၚ်တုဲ အပ္ဍဲကဵုဘာဗ္တောန်လိက် ကေုာံ အပ္ဍဲကွာန်အရာပ်နွံဗ္ဒါဲဗ္ဒါဲတံဂှ် ပရေၚ်ကၞာတ်ပ္တိုန်ပယျဵုဗၠးဘဲတံလေဝ် ပါလုပ်ရောၚ် သ္ဂးရ။
သ္အာၚ်နူဂှ်ပၠန် ဟိုတ်နူပဋိပက္ခရပ်လွဟ်တုဲ ဒဒှ်ရအရာမဇီုကပိုက် စိုတ်ဓာတ် ကွးဘာတံကဵု သၞာဲဒဴတံ နွံဂှ် သ္ပစၟတ်သမ္တီတုဲ ပ္ဍဲအကာဲအရာကာတၟေၚ် ကေုာံ အကာဲအရာအဆက်လက္ကရဴဂမၠိုၚ် ညံၚ်ဂွံနွံကဵုတၚ်ဒုၚ်လျိုၚ်ပရေၚ်ထတ်ယုက်တံဂှ် ပံၚ်တောဲရေၚ်တၠုၚ်အာကဵု ဂကောံမဆေၚ်စပ်ဂမၠိုၚ်ဏောၚ်ဂှ်လေဝ် သ္ဂးလဝ်ရ။
ဘာဗ္တောန်လိက် အပ္ဍဲဒေသကဝ်တူလေဝ်တံဂှ် နဒဒှ်ဗ္ဒိုပ်ဖျေံသ္ဇိုၚ်၊ ဒၞါဲပကောံပကေဝ်၊ ရုၚ်ကြိုၚ်စွံကပေါတ် တံဒှ်တမ် နကဵုတၚ်ရန်တၟံပရေၚ်ပၞာန်သာ်လဵုဒှ်ဒှ် ရပ်စပ်ဟွံဂွံတုဲ အပ္ဍဲတိဍာ်ညးတံထိၚ်ဒက်လဝ်တံဂှ် သွက်ဂွံဒ္ဂေတ်ဗက်ကဵုမူဏံဂှ် ကဵုကတိတုဲ ဂွံဒုၚ်တဲကၠောန်ဗက်အာ လှဲလှဲလးလးမာန်ဂှ်လေဝ် ထံက်ဂလာန်ကဵုအာဇြဟတ်ဏောၚ် ထ္မံက်ထ္ၜးလဝ် ပ္ဍဲလိက်လလောၚ်တြးဂှ်ရ။
သ္အာၚ်နူဂှ်ပၠန် ပံၚ်တောဲအာကဵု ဂကောံမှာဇန် နွံအပ္ဍဲကဝ်တူလေဝ်တံဂှ်တုဲ ယဝ်ရဘပဠကၠုၚ် လ္တူဘာဗ္တောန်လိက် ကေုာံ လ္တူဂကောံမှာဇန်တံဏံ နွံကၠုၚ်မ္ဂး ဒစးဒုၚ်ကဵုသတိကီု သွက်ဂွံခၞံဗဒှ်အာ သၞောတ်ကဵုသတိတၞဟ်သ္အာၚ် ပါလုပ်သီုကဵု ဂၠံၚ်တရဴဆက်စၠောံ သောၚ်ၚ်ကၠးကၠးတံဂှ်ဏောၚ်ဂှ် ထ္မံက်ထ္ၜးလဝ်ရ။
အခိၚ်ဒှ်ပဋိပက္ခ KNU ဂွံမၚ်မွဲကောန်ကွးဘာဂမၠိုၚ် ခိုဟ်ဟ်ဂေါဝ်ဝ်မာန် ပရေၚ်ဒစးဒုၚ်ပလေဝ်ပလေတ်ကာတၟေၚ် မထံက်ပၚ်အာကီု၊ သွက်ဂွံစဵုဒၞါမၚ်မွဲ ကောန်ၚာ်သၟတ်တံ ကေုာံ နဲကွတ်ပညာကဵုဇြဟတ် စပ်ကဵုစိုတ်တံဂှ် ပ္ကတ်ပ္ကေၚ်ဗ္တောန်အာကဵု အ္စာ၊ အ္စာၝောံဂမၠိုၚ်ဏောၚ်ဂှ် သ္ဂးလဝ် ပ္ဍဲလိက်လလောၚ်တြးဂှ်ရ။
ဟိုတ်ဂှ်ရ အပ္ဍဲကာလပဋိပက္ခဒှ်ဒၟံၚ်ဏံ အခေါၚ်ဗ္တောန်ပညာ ကောန်ၚာ်နူကဵုကဝ်တူလေဝ်ဂမၠိုၚ်ဂှ် ဗွိုၚ်ဍုၚ်သ္အာၚ်တံ မပါလုပ် ညးမဆက်စပ်သီုဖအိုတ် သွက်ဂွံထံက်ပၚ်ကဵုဂှ် KNU အာတ်မိက်လဝ် ပ္ဍဲလိက်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ