လှာဒကှ်၊ သေပ်တေမ်ဗာ ၁၃
ဗ္ဒိုပ်ကံၚ်ဇြဳပၞာန် ပ္ဍဲကွာန်လောတ်ယှာန် ပွိုၚ်ဍုၚ်လှာဒကှ် တွဵုရးကရေၚ်ဂှ် ပ္ဍဲဂိတုသေပ်တေမ်ဗာ ၁၂ အခိၚ်နူဂယးဂှ် ဒပ်ပံၚ်ကောံ KNLA ကဵု PDF တံ ဗ္တိုက်သီဂွံလဝ်ရောၚ် ဂွံတီကေတ် အတိုၚ်ဂလာန် ကောန်သ္ဂံၚ်ပါလုပ်လဝ် ပ္ဍဲပရေၚ်ပၞာန်တံဂှ်ရ။
စနူဂိတုအဝ်ဂါတ် သတ္တာဟဒုတိယတုဲကၠုၚ်တေံတုဲ ဂကောံပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်စဵုဒၞါညးဍုၚ်ကွာန် PDF တံ စဝေၚ်လဝ်ပေါဲဗ္တိုက်သီဗ္ဒိုပ် ကုဗ္ဒိုပ်လောတ်ယှာန် ကေုာံ ဗျူဟာအနာန်ကွေန် ဖျေံသ္ဇိုၚ်လှာဒကှ်ရ။
အပ္ဍဲပေါဲဗ္တိုက်သီဗ္ဒိုပ်လောတ်ယှာန်ဂှ် ကောန်ဒပ်ကံၚ်ဇြဳပၞာန်တံ ထောံလသာဗ္ဒိုပ် ဂြိပ်အာလဝ်တုဲ လ္ပာ်ဒပ်ပံၚ်ကောံတံ ကၠောန်သ္ပဒၟံၚ် ပရေၚ်ၚးတးတိဍာ်ရ။
အပ္ဍဲပေါဲဗ္တိုက်သီဗ္ဒိုပ်ဏံ ကောန်ဒပ်ကံၚ်ဇြဳပၞာန် ဇီုကပိုက်ချိုတ်အာတံကဵု သီဂွံလွဟ်လက်နက်တံဂှ် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ လလောၚ်ပ္တိတ်ကဵုပရိုၚ်ဏောၚ်ဂှ် ကောန်သ္ဂံၚ်ပါလုပ်လဝ် ပ္ဍဲပရေၚ်ပၞာန်တံဏံ ဟီုရ။
ဒပ်ကံၚ်ဇြဳပၞာန်ဝွံ ညံၚ်ဗ္ဒိုပ်လောတ်ယှာန် ကေုာံ ဗ္ဒိုပ်ဗျူဟာအနာန်ကွေန် ဟွံဂွံစှ်ေအာဂှ် ကၠောန်သ္ပဗ္တိုက်ဒၟံၚ် နကဵုလွဟ်ဇၞော် ကေုာံ ပၞာန်ကျာတံ ဗွဲမသ္ကာတ်မြဟ်ကီုလေဝ် အခါလၟုဟ် ဒးဆောံလေၚ်လဝ် ဗ္ဒိုပ်လောတ်ယှာန်ရ။
ဟိုတ်နူပရေၚ်ဗ္တိုက် ဒပ်ကံၚ်ဇြဳပၞာန်တုဲ ကွာန်အနာန်ကွေန် ကြပ်အလုံကွာန်မွဲ လီုလာ်အာတုဲ အပ္ဍဲကဵုကွာန်လောတ်ယှာန် ဘာလကျာ် ကေုာံ စမြိုၚ်သ္ၚိဒၟံၚ်လ္ၚဵုတံ ဇီုကပိုက်လီုလာ်အာလဝ်ရောၚ် ဂွံတီကေတ်ရ။
ဟိုတ်နူပေါဲဗ္တိုက်ဏံတုဲ ညးဍုၚ်ကွာန်ဒေသ နူကဵုကွာန်အနာန်ကွေန်၊ လောတ်ယှာန် ဟွံအောန်နူကဵု ၅ ကွာန်တံဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံတုဲ ဟိုတ်နူပေါဲဗ္တိုက်တုဲ ဘာဗ္တောန်လိက် မၞုံအပ္ဍဲဒေသတံ ဒးကၟာတ်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− Social Media