နေဗျဳဒဝ်၊ သေပ်တေမ်ဗာ ၃
လိက်ဒုၚ်စဳရေၚ်လၟေၚ်သၞာံ IIMM မရနုက်ကဵု ၆ ဝါ မပၠောပ်ပ္တိုန်လဝ် ပ္ဍဲကံၚ်ဇြဳအခေါၚ်အရာမၞိဟ် ကုလသမဂ္ဂဂှ်ကီု လိက်ဒုၚ်စဳရေၚ်သီုဖအိုတ်ဂှ် ဒစဵုဒစး သ္ကာတ်တ်မြဟ်ဟ်ရောၚ် ဌာနကာဍုၚ်သ္အာၚ် ကံၚ်ဇြဳပၞာန် လလောၚ်ပ္တိတ်လဝ် လစွံစိုတ် ပ္ဍဲဂိတုသေပ်တေမ်ဗာ ၁၀ တေံရ။
အပ္ဍဲကာလကောံဓရီုဗွဲလၟေၚ် ကံၚ်ဇြဳအခေါၚ်အရာမၞိဟ် မရနုက်ကဵု ၅၇ ဝါဂှ် စပ်ကဵုလိက်ဒုၚ်စဳရေၚ် ဂကောံဂၠိုက်ဂၠါဲစၟဳတ်ဗၠးၜး စပ်ကဵုဍုၚ်ဗၟာ IIMM ဂှ်တုဲ ပ္ဍဲဂိတုသေပ်တေမ်ဗာ ၉ တေံ ကၠောန်လဝ် ပေါဲသဳကၠဳရ။
အတိုၚ်လိက်ဒုၚ်စဳရေၚ် IIMM ဂှ်မ္ဂး ဒပ်ပၞာန်ဗၟာ ဒဒှ်ရကလိလောန်ဒၟံၚ် အမှုရာဇဝတ်ပၞာန် မကြံကြဓဇန် အလုံဍုၚ်မွဲကဵု အမှုရာဇဝတ်ပၞာန် ကလိလောန်လဝ် လ္တူဂကူမၞိဟ်တံ ဗွဲမသ္ကာတ်မြဟ်ဂှ် သက်သဳနွံဒၟံၚ်ဗွဲမဂၠိုၚ်ဂၠေၚ်ရောၚ် ပ္ဍဲဂိတုအဝ်ဂါတ် ၁၃ တေံ လလောၚ်ပ္တိတ်လဝ်ရ။
စပ်ကဵုလ္တူဏံတုဲ ကံၚ်ဇြဳပၞာန်တံဂှ်တှ်ေ ဒဒှ်မခၞံဗဒှ်ဒၟံၚ် အကာဲအရာဍုၚ်ဗၟာ ဗွဲမဗၠေတ်မှာဂှ်ဝွံ မ္ၚးနူ ကဵုဇြဟတ် ကုဝါဒပကီုပရာပ်ဂှ် ဖန်ဗဒှ်ကဵု ပွပကီုပရာပ် ကေုာံ အရာဟွံညိၚ်ဝတ်တံ ညံၚ်ဂွံဂၠိုၚ်တုဲ ပ္ဍဲအရာအလဵုအသဳ ပ္တိတ်ဇြဟတ် သွက်ဂွံထိၚ်ဒက် ပရေၚ်ညိၚ်ဝတ်ကၟိန်ဍုၚ်ဂှ် ဒှ်ကၠုၚ်ပလာပ်ပထုဲရောၚ် သ္ဂးရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် လိက်ဒုၚ်စဳရေၚ် IIMM ဂှ်ဝွံ ကမၠောန်ပကီုပရာပ်ကံၚ်ဇြဳပၞာန်တံ ပြာကတ်တုဲ မၞုံကဵုသက်သဳဍိုက်က်ပေၚ်ၚ်ဂှ်ရ ဖေက်ဍုၚ်သ္အာၚ်တံ သ္ပကၠုၚ်အာရီုဂှ်ရ ဂ္စါန်တးပါဲဒၟံၚ်ရောၚ် သ္ၚဳဂၠိပ်လဝ်ရ။
“လိက်ဒုၚ်စဳရေၚ် IIMM ညးတံဂှ် ကမၠောန်ပကီုပရာပ်မေန်အံၚ်လှာၚ်တံ ပြာကတ်မံက်ကၠးတုဲ သက်သဳဍိုက်ပေၚ်တဴဂှ်ရ ဍုၚ်သ္အာၚ်တံ သ္ပကၠုၚ်အာရီုဂှ် ဂွိၚ်တုဲ ပ္တိတ်ဒၟံၚ်ဇြဟတ် သွက်ဂွံတးပါဲ လိက်ဒုၚ်စဳရေၚ်ဏံရ။ ဆ္ဂး ဣဏံဝွံ သာ်လဵုမှ ဒှ်ဟွံမာန်ပုဟ်။ လိက်ဒုၚ်စဳရေၚ်တံဏံ စိုပ်ကုလသမဂ္ဂဏောၚ်။ နူကဵုဏံ ကၠောန်အာပရေၚ်ကေတ်အရေဝ် မနွံပၟိက်တံဏောၚ်။ ဒှ်လိက်ဒုၚ်စဳရေၚ် ဒးအာ(စကစ) တဝ်ဝ်ဂှ်ရ လ္ပာ်ကံၚ်ဇြဳပၞာန် ဒစဵုဒစးဒၟံၚ် ဗွဲမသ္ကာတ်မြဟ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ နူစဒက်ပ္တန်လဝ် ဂကောံဂၠိုက်ဂၠါဲစၟဳတ်ဗၠးၜး စပ်ကဵုဍုၚ်ဗၟာ IIMM ဏံ နူသၞာံ ၂၀၁၉ တေံဂှ်ရ နကဵုဍုၚ်ဗၟာ ဒုၚ်တဲသ္ပလဝ်စၟတ်သမ္တီ ဟွံမွဲပုဟ်ဂှ် သ္ဂးရ။
သ္အာၚ်နူဂှ်ပၠန် တၚ်သ္ဂုတ်သွာတ် ကံၚ်ဇြဳအခေါၚ်အရာမၞိဟ် စၟတ် ၃၉/၂ မခၞံဗဒှ်လဝ် အခေါၚ်ကၠောန် IIMM ဂှ်လေဝ် ဒှ်တဴတၚ်သ္ဂုတ်သွာတ် သ္ပဒတန်လဝ် နကဵုဆန္ဒသီုညးဖအိုတ်မွဲ ဟွံသေၚ်ပုဟ်ဂှ် ထ္မံက်ထ္ၜးလဝ် ပ္ဍဲကဵုလိက်လစွံစိုတ် ကံၚ်ဇြဳပၞာန် ဒစဵုဒစးလဝ်ဂှ်ရ။
တၚ်သ္ဂုတ်သွာတ် စၟတ် ၃၉/၂ ဂှ်ဝွံ ကြဴနူသၞာံ ၂၀၁၁ တုဲ ဂၠိုက်ဂၠါဲစၟဳတ်လဝ် အမှုရာဇဝတ်ပၞာန် မကလိလောန်လဝ် အပ္ဍဲဍုၚ်ဗၟာကီု၊ အမှုရာဇဝတ် ကလိလောန်လဝ် လ္တူဂကူမၞိဟ်တံ ကေုာံ ပရေၚ်ကမၠက်ကၠေံဂကူတံဂှ်တုဲ သွက်ဂွံကေတ်အာအရေဝ် ကုညးမကလိလောန်လဝ်ဂမၠိုၚ် သွက်ဂွံပလေဝ်ပလေတ် ဂဗုတ်တံဂှ် ဒက်ပ္တန်လဝ် IIMM ရ။
တၚ်ဂွံဆဵုကေတ် ပ္ဍဲကဵုလိက်ဒုၚ်စဳရေၚ် IIMM မပ္တိုန်ထ္ၜးလဝ် ကံၚ်ဇြဳအခေါၚ်အရာမၞိဟ်တံဂှ်ဝွံ သီုကဵုဂလာန် နူကဵုသက်သဳဂွံညာတ်ကေတ်နမတ် ၄၀၀ ပြၚ် မပါလုပ် ဒုၚ်လဝ်သ္ဇိုၚ် တၚ်နၚ် ကေုာံ သက်သဳ ပ္ကောံပ္ကေဝ်ဂွံလဝ် နူကဵုတမ်ရိုဟ်ပရိုၚ် ၉၀၀ ပြၚ်တံဂှ်ရောၚ် သ္ဂးရ။
ဒါရိုက်တာ ဂကောံအခေါၚ်အရာမၞိဟ်ကရေၚ်ဍာဲ ဥူဗညာဂှ် ပ္ဍဲဒေသညးတံ ကံၚ်ဇြဳပၞာန် ဟိုတ်နူကလိလောန်ဒၟံၚ် အခေါၚ်အရာမၞိဟ် ဗွဲမဂၠိုၚ်ဂၠေၚ်ဂှ်တုဲ ကယျာန်ပါဲဒၟံၚ် စပ်ကဵုလိက်ဒုၚ်စဳရေၚ် IIMM ဏံ ဇၞော်ကဵုဇြဟတ်ရောၚ် ဟီုလဝ်ရ။
“ပ္ဍဲဒေသပိုယ်တံလေဝ် ထောံမခတိုဟ် နကဵုက္ၜၚ်ကျာဂှ် ဒှ်ပြဝလုလောန်လဝ် အမှုရာဇဝတ်တံရဏောၚ်။ တုဲတှ်ေ ရပ်ဒက်ဂစိုတ်မၞိဟ်တံဂှ် ဂွံဆဵုကေတ်ရ။ စံၚ်ပလီုပလာ်ဒၟံၚ် သ္ၚိဒၟံၚ်တံ။ အရာတံဏံဂှ် အမှုရာဇဝတ်ပၞာန်နတဲဍာံဍာံကီု ကဵုဂျဳနဳဗာကောန်ဝေန်ယှေန် ကလိလောန် အမှုရာဇဝတ်ဍုၚ်သ္အာၚ်လ္ၚဵုတံဂှ်လေဝ် ဒးမံၚ်တၟာဂလိုၚ်နွံရ။ ဟိုတ်ဂှ်ရ ဍေံတံ ဒစဵုဒစးဒၟံၚ် အိုတ်ဍာ်ဂှ် ပိုယ်တံ ဟီုဂွံရ” သာ်ဝွံ သ္ဂးရ။
လိက်ဒုၚ်စဳရေၚ် IIMM ဝွံ ပကောံပကေဝ်လဝ် အကာဲအရာ လ္ပာ်ကံၚ်ဇြဳပၞာန် ကလိလောန်လဝ် နူသၞာံ ၂၀၂၃ ဂိတုဂျူလာၚ် ၁ ပဋိပက္ခရပ်လွဟ်အလုံဍုၚ်မွဲ အသိၚ်သ္ကာတ်ဒၟံၚ်ဂှ် စဵုကဵုသၞာံဏံ ဂိတုဂျောန်အိုတ်ဏံရ။
ပ္ဍဲကဵုဏံ လ္တူကောန်အရာပ် ပွန်ပၞာန်ဟွံသေၚ်တံဂှ် ဍဵုဍိုက်ပျဲပျာံ ဗွဲမစှ်ေကဵုသၞောတ်ကီု၊ ဒက်ဂကောံတုဲ ပလီုကောန်သမ္ဘာတံ၊ ပွမဖ္ဍိုက်ဂရိုက် လ္တူကောန်ၚာ်သၟတ်တံဂှ်ဝွံ လက်ထက်ကံၚ်ဇြဳပၞာန်ဏံ သာဂၠိုၚ်ကၠုၚ်ရောၚ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် ဗ္တိုက်ဒၟံၚ် ဘာဗ္တောန်လိက်တံ၊ စမြိုၚ်ဘာသာ ကေုာံ ရုၚ်ဂဥုဲ နူကဵုတရဴကျာတံ၊ ရပ်ဒက်ပြိုက်ဂစိုတ် ဟွံမွဲကဵုဓဝ်ဗ္စာရဏာမၞိဟ်တံ ကေုာံ ရပ်ဒက်ဖျေံထံၚ် ဟွံဗဗွဲကဵုသၞောဝ်ဓဝ်တံလေဝ် ပါလုပ်ဂှ် ဂွံတီကေတ်ရ။
မွဲလ္ပာ်ဂှ်ပၠန် အမှုရာဇဝတ် ဂကောံရပ်လွဟ် ဗ္တိုက်ဒၟံၚ်ကံၚ်ဇြဳပၞာန်တံဂှ် သက်သဳဗွဲမဂၠိုၚ်ဂၠေၚ် ကလိဂွံလဝ်တုဲ ပ္ဍဲကဵုဏံ ဂစိုတ်လဝ် ကောန်အရာပ်ဒှ်သံသယ ညးကဵုပရိုၚ်ဒပ်ပၞာန် ကေုာံ ညးပံၚ်တောဲကဵုဒပ်ပၞာန်တံ ဟွံဗဗွဲကဵုသၞောဝ်ဂှ်လေဝ် ပါလုပ်ရောၚ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−IIMM