မဝ်သကိုဝ်၊ သေပ်တေမ်ဗာ ၁၄
ရပ်စပ်လွဟ်လက်နက် ပန်ခြာဇမ္ၚောဲ မကၠောန်ပ္တိတ်လဝ် နူဍုၚ်ပလိုတ်တံဂှ်တုဲ ယဝ်ရကဵုအခေါၚ်ဗ္တိုက်အာ စဵုကဵုအပ္ဍဲဍုၚ်ရုယှာဂှ်မ္ဂး နကဵုဍုၚ်ပလိုတ် ဒးဗ္တိုက်အာ ကုရုယှာ တိုက်ရိုက်ဏောၚ်ဂှ် သမ္မတဗလာဒဳမာပူတေန် ကဵုသတိ ဟီုလဝ် ပ္ဍဲဂိတုသေပ်တေမ်ဗာ ၁၂ တေံရ။
ယူကရုၚ်ဂှ် အာတ်မိက်လဝ် သွက်ဂွံဖအောန်ဖျေံကဵု တၚ်သၞောတ်ဗ္ၜတ် ဒဒှ်ရရပ်စပ်ကမ်လှောဝ် ပန်ခြာဇမ္ၚောဲ ဍုၚ်ပလိုတ်တံတုဲ ဗ္တိုက်အပ္ဍဲဍုၚ်ရုယှာဟွံဂွံဂှ်တုဲ ဗျိတိၚ် ကေုာံ အမေရိကာန်တံဂှ်တှ်ေ ခြာဟွံလအ် ကဵုအာသွဟ်ဏောၚ်ဂှ် ဟီုလဝ်ရ။
ယဝ်ရ ဍုၚ်ပလိုတ်တံ ကဵုအာအခေါၚ် ကုယူကရုၚ်မ္ဂး သဘဴဓဝ်ပေါဲပၞာန် ကေုာံ ဗ္ၜတ်ဍေံ ပြံၚ်လှာဲအာမာန်ဏောၚ် သမ္မတပူတေန် ဟီုရ။
သွက်ဂွံတာဒၞါ အစောံဇြဟတ်ပရေၚ်ဗ္တိုက် မဝ်သကိုဝ်ဂှ် ရပ်စပ် သၞောတ်ကမ်လှောဝ် ပန်ခြာဇမ္ၚောဲ ATACMS ပ္တိတ်နူအမေရိကာန်ကဵု သၞောတ်ကမ်လှောဝ် Storm Shadows ပ္တိတ်နူဍုၚ်ဗျိတိၚ်တံတုဲ သွက်ဂွံကဵုအခေါၚ်ဗ္တိုက် စဵုကဵုအပ္ဍဲတိဍာ်ဍုၚ်ရုယှာဂှ် ယူကရုၚ် အာတ်မိက်လဝ် ဇရေၚ်မဟာမိတ် ဍုၚ်ပလိုတ်တံဂှ် လအ်ဒၟံၚ်ကဵုဂိတုယျ မဒှ်ရ။
အတိုၚ်ယူကရုၚ်အာတ်မိက်လဝ် ယဝ်ရကဵုအာအခေါၚ်မ္ဂး တုပ်တဴညံၚ်ရဴ ဓဇက်ပၠောပ် ကၟိန်ဍုၚ်မရီုဗၚ်ထံက်ပၚ်ကဵုဒၟံၚ် ကမ်လှောဝ် ကုယူကရုၚ်တံရဏောၚ်ဂှ် သမ္မတပူတေန် ဟီုရ။
နကဵုယူကရုၚ် ရပ်စပ်ကမ်လှောဝ် ပန်ခြာဇမ္ၚောဲ ဍုၚ်ပလိုတ်တံဂှ်တုဲ ကၠောန်သ္ပကၠုၚ်ပရေၚ်ဗ္တိုက် အပ္ဍဲဍုၚ်ရုယှာမ္ဂး ပ္ဍဲကဵုညးတံဂှ် လ္ပာ်အစောံစရာဲ ဟွံဍိုက်ပေၚ်ဂှ်ရ ဒးကေတ်အာ အရီုဗၚ်ကောန်ဒပ် နေတဝ်တံဏောၚ်ဂှ်လေဝ် ပူတေန် ဟီုလဝ်ရ။
ယူကရုၚ် ရပ်စပ်လွဟ်လက်နက်တံဏံတုဲ ကဵုအခေါၚ်ဗ္တိုက်ရုယှာဟာ၊ ဟွံကဵုအခေါၚ်ဟာဟီုဂှ် ဟွံဒးသၟာန်တုဲ ဂကောံနေတဝ် ပါလုပ်ကၠုၚ်တိုက်ရိုက်ဟာရ ဒးသၟာန်တုဲ ယဝ်ရပါလုပ်ကၠုၚ်မ္ဂး ဍုၚ်ပလိုတ်ကဵု ညးတံ ဒးဗ္တိုက်အာ တိုက်ရိုက်ဏောၚ်ဂှ် ပူတေန် ဟီုရ။
ယဝ်ရသ္ဂုတ်သွာတ်ကၠုၚ် ကဵုအခေါၚ်ဗ္တိုက်မ္ဂး ဒှ်သဘဴ ဂကောံနေတိုဝ် ပါလုပ်ကၠုၚ် တိုက်ရိုက်ရဏောၚ်တုဲ ဍုၚ်အမေရိကာန် ကေုာံ ဍုၚ်ဥရဝ်ပတံဝွံ ဒှ်သဘဴပါလုပ်ကၠုၚ် ပ္ဍဲပေါဲပၞာန်ယူကရုၚ် တိုက်ရိုက်ရဏောၚ်ဂှ် ညးဟီုဗပေၚ်လဝ်ရ။
လ္တူဂၠးတိဏံ ရုယှာ မဒှ်ဍုၚ်ဇြဟတ်လွဟ်လက်နက် နျူကလဳယျာ ဇြဟတ်ခိုဟ်အိုတ်မွဲဂှ် တၚ်စၟတ်သမ္တီ စပ်ကဵုပရေၚ်ရပ်စပ်လွဟ်လက်နက်နျူကလဳယျာညးတံဂှ် ဗွဲဗဗွဲကဵုအကာဲအရာလၟုဟ်တုဲ ပြံၚ်လှာဲအာဏောၚ်ဂှ်လေဝ် ဟီုလဝ်ရ။
Ref: Reuters