လာယှိုဝ်၊ သေပ်တေမ်ဗာ ၂၀
နကဵုဂကောံကဝ်က MNDAA ပ္ဍဲပရေၚ်ပၞာန်ပရေၚ်ဍုၚ်ကွာန်တံဂှ် ဟွံပံၚ်တောဲကဵု NUG မွဲသာ် ဒေါအ်ပန်ပှော်တုဲ ဆဵုဂဗသဳကၠဳအာ နကဵုဂၠံၚ်တရဴပရေၚ်ဍုၚ်ကွာန်ဏောၚ် တၚ်ဒတူလိုၚ်ဏံဝွံ ဟိုတ်နူဇြဟတ်ဂရိုဟ် ဍုၚ်ကြုက်ဏောၚ်ဂှ် ညးခါတ်အကာဲပရေၚ်ဍုၚ်ကွာန်တံ ဟီုရ။
ဂကောံကဝ်က MNDAA မဒှ်ဂကောံရပ်လွဟ်ကောန်ဍုၚ်အရၚ် ဖျေံသ္ဇိုၚ်ရးသေံသ္ကုတ်သၟဝ်ကျာ ပယျဵုကြုက်−ဗၟာဂှ် ပြဟ်ဟ်ဏံ စပ်ကဵုအကာဲအရာပရေၚ်ဍုၚ်ကွာန်တုဲ ပ္ဍဲဂိတုသေပ်တေမ်ဗာ ၁၈ တေံ လလောၚ်ပ္တိတ်ကၠုၚ် လစွံစိုတ်ရ။
အတိုၚ်တၚ်လလောၚ်တြး ဂိတုသေပ်တေမ်ဗာ ၁၈ ဂှ်မ္ဂး နကဵုဍုၚ်ကြုက် သွက်ဂွံလုပ်စိုပ်ပ္ညဳပ္ညပ်ကဵု အကာဲအရာဍုၚ်ဗၟာ မပရေံစှ်ေဒၟံၚ်မွဲတ္ၚဲတုဲမွဲတ္ၚဲဂှ် အာတ်လဝ်မိက်ဗွဲတၟေၚ်ရ။
နကဵုညးတံလေဝ် ဒေါအ်ပန်ပှော်တုဲ ပံၚ်တောဲအာကဵု ကၟိန်ဍုၚ်ကြုက် ကတိုၚ်ကတိုၚ်ကၟဟ်ဟ်တုဲ သောၚ်ကလးဂၠါဲအာသွဟ် ပဋိပက္ခတံ နကဵုဂၠံၚ်တရဴပရေၚ်ဆဵုဂဗသဳကၠဳတံဂှ်ဏောၚ် MNDAA ဟီုပ္တိတ်ကၠုၚ်ရ။
ဒံက်တာလှကျဝ်ဇြဝ် ညးစိုန်သ္ကီုပရေၚ်ဍုၚ်ကြုက်ဂှ် ကြုက်လေဝ် ဓရိုဟ်ပ္တိုန်ဒၟံၚ် သွက်ဂွံသဳကၠဳပ္ညဳပ္ညပ်အာ ပရေၚ်ဍုၚ်ကွာန်တံကဵု သွက်ဂွံဒေါအ်ပန်ပှော်တံဂှ်ရ နကဵု MNDAA ဖ္ဍိုက်ဗပေၚ်လဝ် ဇြဟတ်ဂရိုဟ်ဏံဏောၚ်ဂှ် သ္ၚဳဂၠိပ်လဝ်ရ။
“ပဝ်လသဳကြုက်ဂှ်လေဝ် လ္ဂောံကဵုပရေၚ်ဍုၚ်ကွာန် သွက်ဂွံသဳကၠဳအာ ဝိုၚ်တက်ကျာသဳကၠဳပ္ညဳပ္ညပ်သီုညးဖအိုတ်ကီု သွက်ဂွံဒေါအ်ပန်ပှော်တံဂှ်ရတုဲ ကဝ်ကဂှ်လေဝ် ဒဒှ်ရညးတံ ဒေါအ်ပန်ပှော်ဂှ် ဒေါအ်ထ္ၜးလဝ်ရ။ လၟုဟ်ဂှ် သဘဴဓဝ်ဂှ်တှ်ေ စိုပ်အာလ္ပာ်ကံၚ်ဇြဳပၞာန်ရ။ ညးတံ ဖ္ဍိုက်ဗပေၚ် ဇြဟတ်ဂရိုဟ်ကြုက်တုဲ ပိုယ်တံ ဒေါအ်ပန်ပှော်ဏောၚ်။ ဒၞါဲပိုယ်တံစိုပ်ဒၟံၚ်ဂှ်ရ ကေတ်ရဏောၚ်ဂးတုဲ ညံၚ်ပေါဲသဳကၠဳပရေၚ်ဍုၚ်ကွာန်ဂွံဒှ် ညံၚ်ပရေၚ်ပန်ပှော်ဂွံဒေါအ်ဂှ် ဒှ်သဘဴကဵုထောံဇြဟတ်ဂရိုဟ်ဏောၚ် ထေၚ်ကေတ်ရ” သာ်ဝွံ သ္ဂးရ။
တုဲကၠုၚ် ပ္ဍဲဂိတုအဝ်ဂါတ်အိုတ်တေံ ညးစၞးတၟေၚ်ပရေၚ်အာယှ ဌာနဝန်ဇၞော်ကာဍုၚ်သ္အာၚ်ဍုၚ်ကြုက် မေဿတာ တုက်ယှဳကျွေန်ဂှ် ဆဵုဂဗသဳကၠဳလဝ် ကု EAOs သ္ကုတ်သၟဝ်ကျာ KIA, MNDAA, TNLA တံ နွံဂှ် ပရိုၚ်မံက်တိတ်ဒၟံၚ်ရ။
နကဵု MNDAA တၚ်ဒတူလိုၚ်ပရေၚ်ဍုၚ်ကွာန် ညံၚ်သ္ဂောံဂွံပရေၚ်အုပ်ဓုပ်အပိုၚ် မဍာံပြဂှ် ပြံၚ်လှာဲအာဟွံသေၚ်တုဲ ပါ်တိတ်ကီု၊ ပၠံၚ်ၜးအဝဵုကၟိန်ဍုၚ်ကီု၊ ကေတ်ဗၠးၜးတုဲ ပ္တန်ဍုၚ်တၟိတံကီုဂှ် ကၠောန်အာဟွံသေၚ်ပုဟ်ဂှ် သ္ဂးရ။
သ္အာၚ်နူဂှ်ပၠန် ဟွံပံၚ်တောဲ၊ ဟွံဆက်ဆောံ၊ ဟွံဒက်မိတ် ကုဂကောံဗွိုၚ်ဍုၚ်သ္အာၚ် မဒစဵုဒစးဍုၚ်ဗၟာ ဟွံသေၚ်မ္ဂး ဍုၚ်ကြုက်တံဂှ်ဝွံ ဒှ် Redline ပရေၚ်ဍုၚ်ကွာန် MNDAA ရောၚ် ကဵုလဝ်သမ္တီ လစွံစိုတ်တၚ်ဒတူလိုၚ်ရ။
နကဵုပရေၚ်ဍုၚ်ကွာန်ပရေၚ်ပၞာန်ဂှ် ပံၚ်တောဲကဵု NUG ကီု၊ သၠဲပ္တိုန်မုက်ပၞာန်ကီု၊ ထ္ပက်ပၞာန် မာန္တလေဝ် ကေုာံ ဒံၚ်ကျဳတံဂှ် ကၠောန်သ္ပအာဟွံသေၚ်ကီုလေဝ် ဆက်ရပ်စပ်အာအခေါၚ်စဵုဒၞါဇကုဇကုဏောၚ်ဂှ် သ္ဂးရ။
နကဵုသြၚ်လောန်တိုၚ်(မ်) ပ္ဍဲအရာသၟာန်လဝ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် NUG စပ်ကဵု MNDAA ဟွံပံၚ်တောဲကဵု NUG ဂှ်တုဲ ပြဟ်ဟ်ဏံ သ္ဇက်ဒးဟီုဂး ဟွံမွဲဏီပုဟ်ဂှ် ကလေၚ်လဝ်ပရိုၚ်ရ။
ဥူဖေတာန် သၟာပရေၚ်ဍုၚ်ကွာန်ဝှ်ကြံၚ်ဂှ် ပရေၚ်ထံက်ဂလာန်ကြုက် ဟွံပါမွဲသာ် ပရေၚ်အံၚ်ဇၞးတံ တန်ကြန်အာဍာ်ဇမၠိၚ်မာန် ဟွံသေၚ်တုဲ ဟိုတ်နူပြသၞာတၞဟ်သ္အာၚ်တံကဵု ပရေၚ်ကဵုဇြဟတ်ဂရိုဟ်တံဂှ်တုဲ ကိစ္စပရေၚ်ဟွံသဳကၠဳ ကု NUG ကြုက်ဟွံဒးဂၞပ်ဂှ် ဒှ်ကၠုၚ်ရောၚ် သ္ၚဳဂၠိပ်လဝ်ရ။
“ပရေၚ်ထံက်ဂလာန် ကြုက် ဟွံပါပုဟ်ဟီုမ္ဂး ပရေၚ်အံၚ်ဇၞးညးတံဂှ် အာဍာ်ဇမၠိၚ်မာန်ဟွံသေၚ်ပုဟ်။ ကိစ္စတၞဟ်ဟ်တံလေဝ် နွံဒၟံၚ်ဏီ။ ပြသၞာပယျဵုတံ တုဲတှ်ေ ပြသၞာပရေၚ်ပိုန်ဒြပ်တံ။ ဟိုတ်ဂှ်ရ ညးတံလေဝ် နူကဵုပရေၚ်ကဵုဇြဟတ်သာ်ဏံဂှ်မွဲဗီု၊ ပရေၚ်ဆက်ဆောံ ကုကြုက်ဂှ် ဟိုတ်နူဟွံမိက်ကဵုပိုတ်အာဂှ် မွဲသာ်၊ ဟိုတ်နူအခက်အခုဲသာ်ဏံတုဲ တၚ်လလောၚ်တြးတံ ပါကၠုၚ်ဂှ် ထေၚ်ကေတ်ရ။ ကြုက်ဂှ်တှ်ေ ဟွံဒးဂၞပ် NUG ပုဟ်။ စုက်လုက်ကဵု ဂကောံအမေရိကာန်တံဂးတုဲ ကိစ္စဟွံသဳကၠဳအာကဵု NUG တံလေဝ် ပါကၠုၚ်ရ” သာ်ဝွံ သ္ဂးရ။
နကဵု MNDAA သၞာံတုဲကၠုၚ် ဂိတုအံက်တဝ်ဗာကြပ်အိုတ်တေံ နကဵုယၟုပရေၚ်ပၞာန် ၁၀၂၇ ဂှ် လလောၚ်လဝ်ပၞာန် ကုကံၚ်ဇြဳပၞာန် ပ္ဍဲရးသေံသ္ကုတ်သၟဝ်ကျာ နဒဒှ်ဂကောံမဟာမိတ်ကောဒေံပိဂကောံ ကရောံဂကောံတအာၚ် TNLA, ဒပ်ပၞာန်ရခေၚ် AA တံဂှ်ရ။
ဟိုတ်နူပရေင်ပၞာန်ဏံတုဲ ကရောံအသိၚ်အလိုန်ပၠန်ဂတးက္ညၚ်ဂှ် မွဲဒမြိပ်ဝၚ်ဒပ်ပၞာန်ဗၟာ ပရေၚ်ကျဗြံစပ်ကဵုပရေၚ်ပၞာန် ဟွံကေၚ်ဂဗမွဲလှ်ေတံ ဒးဆေၚ်လဝ်မုက် ဗွဲမဂၠိုၚ်တုဲ စိုပ်လဝ် စဵုကဵုအကာဲအရာပရေံအိုတ်ရ။
ဟိုတ်နူအကာဲအရာတံဏံတုဲ ဂကောံဗ္တိုက်သရိုဟ်ပကီုပရာပ်ကံၚ်ဇြဳပၞာန်−ဗဟဵုဂှ် နကဵုတၚ်တုပ်စိုတ် ဂကောံအလဵုအသဳကၟိန်ဍုၚ်ဂှ် ပ္ဍဲဂိတုသေပ်တေမ်ဗာမံက်တေံ လလောၚ်တြးလဝ် MNDAA, TNLA, AA တံ နဒဒှ်ဂကောံပကီုပရာပ်ရ။
တၚ်ရန်တၟံ ပရေၚ်ပၞာန်ဂှ်ဝွံ သွက်ဂွံထိၚ်ဒက် ဒေသညးတံကီု၊ သွက်ဂွံထပိုတ်ရိုဟ်ကၞက်သၞောတ်တၠအဝဵုပၞာန် အလုံကောန်ဍုၚ်ဗမာ မနွံပၟိက်တံဂှ်ကီု၊ သွက်ဂွံဗ္တိုက်သရိုဟ်ကမၠောန်လီဠာန်ကျာဖျတံကီု၊ သွက်ဂွံဗ္တိုက်သ္အး ကံၚ်ဇြဳပၞာန် ကေုာံ ပၞာန်မၚ်ကွာန်တံဂးတုဲ လလောၚ်တြးလဝ်ရ။
ဥူဖေတာန်ဂှ်တှ်ေ နကဵု MNDAA ကိစ္စကၠောန်အာလၟုဟ်ကဵု ပရူပရာလလောၚ်တြးလဝ်ဂှ်ဝွံ ညံၚ်ဂွံဒှ်သဟဇာတ ဒးကၠောန်ဏောၚ်တုဲ ညံၚ်သၞောတ်တၠအဝဵုပၞာန် ဂွံသရိုဟ် ကၠောန်အာသာ်လဵုရောဟီုဂှ်လေဝ် လၟေၚ်ကမၠောန်မွဲ ဒးပါထေက်ရောၚ် ထံက်ထ္ၜးလဝ်ရ။
နကဵု MNDAA အပ္ဍဲပရေၚ်ပၞာန် ၁၀၂၇ ဂှ် သီဂွံလဝ် ဗ္ဒိုပ်ဒပ်ဗွဲမဂၠိုၚ် ပါလုပ်သီုကဵု ဌာန်ဂအုပ်ပၞာန်ရးမွဲတုဲ ထိၚ်ဒက်ဂွံလဝ် ဍုၚ် ဟွံအောန်နူကဵု ၁၀ ဍုၚ်တုဲ သၞေဟ်ကၚ်ပယျဵုဂမၠိုၚ် မပ္တံကဵု ရန်လုံကျိုင်း၊ ချင်းရွှေဟော်၊ မုံးကိုး၊ ကြူကုတ်တံဂှ်လေဝ် သီဂွံလဝ်ရ။
ပရိုၚ်−သြၚ်လောန်တိုၚ်(မ်)
ဗီု−The Kokang Media