ရာသဳဗြဲကျာတၟးဇးဏံ ပံၚ်တောဲကၠောန်အာ ပရေၚ်ပြုပြေၚ်ပၞာန် မစှ်ေကဵုဗျူဟာတံဏောၚ် ဂကောံပၠန်ဂတးမန်ဂမၠိုၚ် ဟီု

ရေဝ်၊ သေပ်တေမ်ဗာ ၂၂

ရာသဳဗြဲကျာတၟးကၠုၚ်စိုပ်ဏံ ပ္ဍဲဒေသချဳဒရာၚ်ဒၟံၚ် ကရောံမဟာမိတ်တံဂှ် ပံၚ်တောဲကၠောန်အာ ပရေၚ်ပြုပြေၚ်ပၞာန်စှ်ေကဵုဗျူဟာတံဏောၚ် ဂကောံပၠန်ဂတးရပ်လွဟ်မန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဆ္ဂး ပရေၚ်ပြုပြေၚ်ပၞာန် စှ်ေကဵုဗျူဟာ ဗီုပြၚ်သာ်လဵု ကၠောန်အာရော ပလေဝ်ပလေတ်ဒၟံၚ် သာ်လဵုရောဟီုဂှ် ဟိုတ်နူဂီုကၠီုစပ်ကဵုပရေၚ်ပၞာန်တုဲ ဟီုပ္တိတ်လဝ်ဂှ် ဟွံမွဲရ။

နကဵုဂကောံဇြဟတ်ပၠန်ဂတးရပ်လွဟ် အပ္ဍဲတွဵုရးဍုၚ်မန်တံ သွက်ဂွံဆက်စၠောံပံၚ်တောဲကၠောန်အာ ညံၚ်ရဴဒပ်ပံၚ်ကောံဂှ် နဒဒှ်တၚ်တုပ်စိုတ်မွဲ နူကောံဓရီုပရေၚ်ဍုၚ်ကွာန်သၟတ်မန် ဖ္တိုက်ဖ္အောဝ်လဝ် ပ္ဍဲဂိတုသေပ်တေမ်ဗာ ၂၀ တေံရ။

ဒံက်တာသဳရိမန်ဆာန် သ္ကိုပ်ဒပ် ဒပ်စဵုဒၞါဍုၚ်မန် MSDF ဂှ် ဂကောံပၠန်ဂတးရပ်လွဟ်မန်တံ သွက်ဂွံဝေၚ်ပရေၚ်ပၞာန် စှ်ေကဵုဗျူဟာတံဂှ် သဳကၠဳလဝ်တုဲ အကြာသ္ကိုပ်ဒပ် ကဆံၚ်သ္ဇိုၚ်တံလေဝ် ညံၚ်ဂွံပံၚ်တောဲလုပ်ပေါဲဗ္တိုက် သိပ်ပ်ဂၠိပ်ပ်မာန်ဂှ်လေဝ် သဳကၠဳသ္ဂုတ်သွာတ်လဝ်ရောၚ် ဟီုရ။

 “ ပ္ဍဲကဵုဂကောံပ္ညဳပ္ညပ် MSFC, NMSP-AD ဂှ် နူကဵုပရေၚ်ပံၚ်တောဲ စှ်ေကဵုမဟာဗျူဟာမွဲကဆံၚ် ဂွံဝေၚ်ပရေၚ်ပၞာန် မစှ်ေကဵုဗျူဟာတံမာန် သဳကၠဳသ္ဂုတ်သွာတ်လဝ်တုဲ အကြာသ္ကိုပ်ဒပ်ကဆံၚ်သ္ဇိုၚ်တံလေဝ် ပ္ဍဲအရာထ္မံက်ပေါဲဗ္တိုက်တံဂှ် ဂွံပံၚ်တောဲလုပ်အာပေါဲဗ္တိုက် သိပ်ပ်ဂၠိပ်ပ်မာန် သဳကၠဳသ္ဂုတ်သွာတ်လဝ်ရ။ ဟိုတ်ဂှ်ရ ပ္ဍဲရာသဳဗြဲကျာတၟး ကၠုၚ်စိုပ်ဏံ အကြာ MSDF, MSRF, NMSP-AD တံဂှ် ပရေၚ်ပံၚ်တောဲရေၚ်တၠုၚ် စပ်ကဵုပရေၚ်ပၞာန် ပရေၚ်ပြုပြေၚ်ပၞာန် စှ်ေကဵုမဟာဗျူဟာတံ ကၠောန်အာမာန်ဏောၚ်” သာ်ဝွံ သ္ဂးရ။

MSDF ဝွံ ကြဴနူဒပ်ပၞာန်သီအဝဵုတုဲ ဒှ်ဒပ်ပၠန်ဂတးရပ်လွဟ်မန် ဒက်ပ္တန်လဝ်မွဲတုဲ သွက်ဂွံပံၚ်တောဲအာ ပရေၚ်ဍုၚ်ကွာန်၊ ပရေၚ်ပၞာန် ကရောံကံၚ်ဇြဳဖေဝ်ဒရာဍုၚ်မန် MSFC ၊ ဒပ်ပၠန်ဂတးဍုၚ်မန် MSRF တံဂှ် သၞာံ ၂၀၂၄ ဂိတုဨပရဴတေံ လလောၚ်တြးလဝ်ရ။

လအာတုပ်သာ်ဂှ်ကီု ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ကဵု ကံၚ်ဇြဳဖေဝ်ဒရာဍုၚ်မန် MSFC တံ ပ္ဍဲကဵုပရေၚ်ဍုၚ်ကွာန်၊ ပရေၚ်ပၞာန် ကေုာံ ပ္ဍဲကဵုကဏ္ဍတၞဟ်သ္အာၚ်တံဂှ် သွက်ဂွံပံၚ်တောဲရေၚ်တၠုၚ်အာဂှ် ကလိဂွံလဝ်တၚ်တုပ်စိုတ်ရောၚ် သီုၜါလ္ပာ် ပံၚ်တောဲလလောၚ်တြးလဝ်ရ။

စပ်ကဵုတၚ်နၚ်တံဏံတုဲ ပ္ဍဲကဵုရာသဳဗြဲကျာတၟးဏံ နကဵုဗော်ဍုၚ်မန်တၟိ AD ပရေၚ်ပံၚ်တောဲပရေၚ်ပၞာန် နွံသာ်လဵုရော နူကဵုသြၚ်လောန်တိုၚ်(မ်) သၟာန်ဏာလဝ်ဂှ် ညးမၞုံအခေါၚ်ဟီုဂး ဗော် နာဲဗညာမန် ဟီုလဝ် သာ်ဏံရ။

“ပ္ဍဲအရာပံၚ်တောဲရေၚ်တၠုၚ် ပရေၚ်ပၞာန်ဂှ် ပိုယ်တံ သဳကၠဳဒၟံၚ်တံ နွံဒၟံၚ်ရ။ ၜိုတ်ဏံရ အဲဟီုဂွံ။ သ္ကုတ်သှ်ေဂှ်တှ်ေ ဟီုဟွံဂွံဏီပုဟ်” သာ်ဝွံ သ္ဂးရ။

အခိၚ်လၟုဟ် ပ္ဍဲတွဵုရးဍုၚ်မန် ပ္ဍဲကဵုပွိုၚ်ဍုၚ်ရေဝ်၊ ဇြပ်ဗု၊ မုဟ်ဍုၚ် ကေုာံ ပ္ဍဲပွိုၚ်ဍုၚ်ကျာ်မြဟ်တံဂှ် ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးရပ်လွဟ် MSRF ၊ ဒပ်ပၞာန်ဗၠးၜးဍုၚ်မန် MLA ကေုာံ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD တံ ဗက်ကဵုဒေသမဆက်စပ်တံတုဲ ချဳဒရာၚ်ဒၟံၚ်ရ။

သ္အာၚ်နူဂှ်ပၠန် မ္ၚးနူကဵု ဂကောံဒပ်ပၠန်ဂတးရပ်လွဟ် အပ္ဍဲဒေသတၞဟ်သ္အာၚ်တံဂှ် ဒက်မဟာမိတ်ကဵု ကရောၚ်ပၞာန် သၟဝ်ဌာနဝန်ဇၞော်ကာစဵုဒၞါ NUG တံတုဲ ချဳဒရာၚ်ဒၟံၚ်စပ်ကဵုပရေၚ်ပၞာန်တံလေဝ် နွံဒၟံၚ်ရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန်ဂှ်တှ်ေ ပ္ဍဲရာသဳတိကှ်ဏံ သ္ပသ္ဇိုၚ်ကဵု တမ်ရိုဟ်ၜိုတ်ပ္ကောံဂွံတံဂှ်တုဲ ဗွဲမပြဟ် သွက်ဂွံထ္မံက်အာပရေၚ်ပၞာန်တံဂှ် ပ္တိတ်ဒၟံၚ်ဇြဟတ်ရောၚ် ဟီုရ။

“ပ္ဍဲကဵုရာသဳတိကှ်ဏံ ၜိုတ်ပိုယ်တံပ္ကောံဂွံ သ္ပသ္ဇိုၚ်ကဵုတမ်ရိုဟ်တံဏံတုဲ ဗွဲမပြဟ် သွက်ဂွံကၠောန်ၜိုတ်ထ္မံက်အာပရေၚ်ပၞာန်တံဂှ် ပ္တိတ်ဒၟံၚ်ဇြဟတ်ဒၟံၚ်ရ။ ပ္ဍဲအရာကၠောန်ၜိုတ်အာသာ်ဏံဂှ်လေဝ် ကဵုဂကောံပၠန်ဂတးမဟာမိတ်ပိုယ်တံ မပ္တံကဵု ကရောၚ်ပၞာန်ဒဝ်န၊ YGF ၊ ရေးသိမ်းငှက်၊ ABSDF ၊ ရေးကံပေါက် PDF တံ ကဵုဂကောံပၠန်ဂတးမကြပ်တံဂှ် သ္ဂောံပံၚ်တောဲရေၚ်တၠုၚ်အာနွံတုဲ ကဵုဂကောံရပ်လွဟ်မန်တၞဟ်ဟ် MSDF, MLA, NMSP-AD တံလေဝ် ဂွံပံၚ်တောဲရေၚ်တၠုၚ်အာဂှ် ပိုယ်တံ စဳဇန်လဝ်နွံရ” သာ်ဝွံ သ္ဂးရ။

ပ္ဍဲတွဵုရးဍုၚ်မန် အပ္ဍဲကာလသီအဝဵု လောန်ၜက်ကၠုၚ်တေံ ဒၟါနူနွံပၟိက်ကဵုဇြဟတ် ကေုာံ မကမ်လွဟ်လက်နက်တံတုဲ ညံၚ်ရဴဒေသကောန်ဍုၚ်အရၚ်တၞဟ်ဟ်တံဂှ် ထ္ပက်ပၞာန် ကုဗ္ဒိုပ်ဒပ်ကံၚ်ဇြဳပၞာန်တုဲ လုပ်လဝ်ပေါဲဗ္တိုက်သီဗ္ဒိုပ်သီဍုၚ်တံ ဟွံမွဲရ။

သၞေဟ်ကၚ်စၟဳတ် ကေုာံ ဗ္ဒိုပ်ဗၠာဲသၟိၚ်တိဍာ် ဒပ်ကံၚ်ဇြဳပၞာန်တံကဵု ဗၠာဲသၟိၚ်သၟဝ်တဲတံ ဖျေံလဝ်ဗ္ဒိုပ်တံဂှ်တှ်ေ လုပ်စိုပ်ဗ္တိုက်သီလဝ်ကီု ကြတ်ဗ္တိုက်လဝ်တံကီု နွံလဝ်တုဲ ထ္ပက်ကၠုၚ်ကရောၚ်ပၞာန်မ္ဂး ၜိုတ်ပေါဲဗ္တိုက်ဆေၚ်မုက်တံဂှ် က္တဵုဒှ်လဝ် နွံရ။

ညးခါတ်အကာဲပရေၚ်ဍုၚ်ကွာန်မန်မွဲတၠဂှ် ဂကောံပၠန်ဂတးရပ်လွဟ်မန်တံကဵု ဂကောံပၠန်ဂတးအပ္ဍဲဒေသတံ ပံၚ်တောဲဗ္တိုက်အာ ကံၚ်ဇြဳပၞာန်မ္ဂး ပ္ဍဲဒေသမန်ကဵု ဒေသကရေၚ် ကၠောံဍဂှ် ဒးပံက်အာမုက်ပၞာန်ဏောၚ် ထံက်ထ္ၜးလဝ်ရ။

“ ဂကောံပံၚ်တောဲတံ ထ္ပက်အာပၞာန်မ္ဂး ဒေသမန်−ကရေၚ်ကၠောံဍ ဒးပံက်အာမုက်ပၞာန်ဏောၚ်။ ဗ္တိုက်အတေံညိ အဏံညိတှ်ေ ဒးဂိဂၠိုၚ်တုဲ ဂွံထိၚ်လအ်လအ်ဂှ် ဟွံလောဲပုဟ်။ နကဵုဂကောံပၠန်ဂတးဂမၠိုၚ် မကမ်လွဟ်လက်နက် ကွက်တြဴဂိတု−မွဲသၞာံ ဒးနွံ ရုမ်မ်ဂပ်ပ်တုဲ ဂၠံၚ်ဍာန်ပလံၚ်ဗစိုပ်တံလေဝ် ဒးကၠောံဒၟံၚ်ဂှ်လေဝ် နွံပၟိက်ရ” သာ်ဝွံ သ္ဂးရ။

ဆ္ဂး လုပ်ကဴပေါဲဗ္တိုက်သီဍုၚ်မာန္တလေဝ် ဟွံက္တဵုဒှ်မ္ဂး ဂကောံပၠန်ဂတးမန်တံ စဵုကဵုဂွံသီဍုၚ်ရေဝ်၊ ဇြပ်ဗုတံဂှ် ဗ္တိုက်အာဏောၚ်ဂှ် ဟွံညာတ်ဏီတုဲ ပ္ဍဲဍုၚ်လ္ဂုၚ် ဟွံဒှ်ဗလးပၞာန်မ္ဂး မတ်မလီုကဵု ဘာအၚ်လေဝ် ပေါဲဗ္တိုက်ဒှ်အာဟွံသေၚ်ဏီပုဟ်ဂှ် ညးသ္ၚဳဂၠိပ်လဝ်ရ။

အတိုၚ်တၚ်နၚ် ဂကောံသုတေသန ဗၠးၜးတံဂှ်မ္ဂး နကဵုကံၚ်ဇြဳပၞာန် ဟိုတ်နူပၞာန်ထ္ပက်ပၠန်ဂတး အလုံဍုၚ်မွဲတံတုဲ ဒးဆေၚ်ဒၟံၚ်မုက် ပရေၚ်ကျဗြံ ပ္ဍဲပရေၚ်ပၞာန်တံ အဆက်က်တုဲ ဒးဗလးလဝ်တဲ ဗ္ဒိုပ်ဒပ်အပံၚ် ၂၅၀၀ ပြၚ်ကဵု ဍုၚ် အပံၚ် ဗ္ဒါဲ ၈၀ ရ။

ဒံက်တာသဳရိမန်ဆာန်ဂှ် အခိၚ်ကာလလၟုဟ် ယဝ်ရပံၚ်တောဲကၠောန်အာ ပရေၚ်ပၞာန် မစှ်ေကဵုမဟာဗျူဟာတံ ဟွံမာန်မ္ဂး အခိၚ်လဵုမှ ကၠောန်မာန်ဟွံသေၚ်ရတုဲ ပရေၚ်ပၞာန်ပံၚ်တောဲတံဂှ် ကၠောန်အာတွဵုဏောၚ် ဟီုလဝ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media