ညံၚ်လေဝ်ပေန်၊ သေပ်တေမ်ဗာ ၂၄
ပ္ဍဲခရိုၚ်ညံၚ်လေဝ်ပေန် ကေုာံ ခရိုၚ်တံၚ်ဥူ ဗော်သွးကောန်ဂကူကရေၚ် KNU ဂှ် ဟိုတ်နူဍာ်ဇၞော်က္တဵုဒှ်လဝ်တုဲ အပ္ဍဲခရိုၚ် ၂ ဏံ ညးဍုၚ်ကွာန် ၉ တၠ ချိုတ်အာလဝ်တုဲ ညးဍုၚ်ကွာန် ၃၀၀၀၀၀ ပြၚ် ဒးဒၟံၚ်ဘဲဍာ်ဂှ်ရ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်ကာမံက်တိုန်တံကဵု ဂဥုဲဇဗတံရောၚ် KNU ဗဟဵု လလောၚ်ပ္တိတ်လဝ်ရ။
ပ္ဍဲဒပ်မဟာ ၃ ခရိုၚ်ညံၚ်လေဝ်ပေန် KNU တိဍာ်အုပ်ဓုပ်ကဝ်တူလေဝ်ဂှ် တုဲကၠုၚ် နူဂိတုသေပ်တေမ်ဗာ ၁၃ စဵုကဵုအခိၚ်လၟုဟ် ဗြဲဇၞော်ဂူလဝ်တုဲ တၟိုန်ဍာ်နူဍုၚ်ဗၟာသ္ကုတ်လ္တူတံ ဗလးလဝ်ဍာ်တုဲ အပ္ဍဲကွာန်တံဂှ် ဍာ်ဇၞော်က္တဵုဒှ်ဒၟံၚ်ရ။
ခရိုၚ်ညံၚ်လေဝ်ပေန် KNU ပ္ဍဲကဵုပွိုၚ်ဍုၚ်ကျံက်ကျဳ၊ ယှိုဲကျေန် ကေုာံ ပ္ဍဲကဵုပွိုၚ်ဍုၚ်မုၚ်တံဂှ် ဟိုတ်နူဍာ်ဇၞော်တုဲ ၂၈၉ ကွာန်၊ သ္ၚိ ၃၂၂၄၆ မ၊ လၟိဟ်မၞိဟ် ၁၆၈၄၂၇ တၠတံဝွံ ဒးဒုၚ်စသိုၚ်ဒၟံၚ် ဘဲအန္တရာယ်သဘာဝ ဇၞော်ကဵုဇြဟတ်တုဲ ဗြဲဇၞော်ဂူတုဲ ဟိုတ်နူဍာ်ဇၞော်ဍာ်ကလိုပ်က္တဵုဒှ်လဝ်တုဲ တၞံသြောံတံလေဝ် ဍာ်ဗၠိုက်၊ လီုလာ်တုဲ ဒးဒၟံၚ်စၟတံရောင် သ္ဂးရ။
ဟိုတ်နူဍာ်ဇၞော်တုဲ သွက်ညးဍုၚ်ကွာန် မံၚ်ဒၟံၚ်အပ္ဍဲကွာန် ခရိုၚ်ညံၚ်လေဝ်ပေန်တံ၊ ညးပါဲဒဴဘဲပၞာန်တံ ကေုာံ သွက်တိရစ္ဆာန်တံဂှ် ဒးဂဗဒၟံၚ်ကဵု အခက်အခုဲဒၞါဲ ကေုာံ အခက်အခုဲပရေၚ်စသုၚ်မံၚ်စံၚ် ဗွဲမဂၠိုၚ်တုဲ ဟိုတ်နူဍာ်ဇၞော်တုဲ ညးဍုၚ်ကွာန်ၜါတၠ ဒးချိုတ်အာလဝ်ရောၚ် KNU သ္ဂးရ။
ကွာန်ဒးဒၟံၚ်ဘဲဍာ်တံဂှ် ကမ္မတဳရီုဗၚ်ဟံၚ်ပြာ်ကာမံက်တိုန် ကရေၚ် ကေုာံ ကောန်ဂကောံဂမၠိုၚ် ပလံၚ်ကဵုဂၠုင် လ္ပာ်သၠုၚ်ၚ်တံဂှ်တုဲ ထံက်ပၚ်ကဵုဒၟံၚ် အရီုဗၚ်ကာမံက်တိုန်တံကီုလေဝ် ဟွံရုမ်ဂပ်တုဲ နွံပၟိက်ဒၟံၚ်ကဵု အရီုဗၚ်ကာမံက်တိုန်တံကဵု ဂဥုဲဇဗတံဖိုဟ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲခရိုၚ်တံၚ်ဥူဂှ်လေဝ် စနူဂိတုသေပ်တေမ်ဗာ ၁၄ တုဲ ဟိုတ်နူဍာ်ဇၞော်တုဲ ကွာန် ၇၅ ကွာန် ဒးဗၠိုက်အာလဝ်ဍာ်တုဲ လၟိဟ်မၞိဟ် ၁၄၈၅၀၀ ဒးလဝ်ဘဲဍာ်တုဲ ဘာလီုအာမွဲမတုဲ မၞိဟ် ထပှ်တၠ ချိုတ်အာလဝ်ရောၚ် KNU ဗဟဵု လလောၚ်ပ္တိတ်လဝ်ရ။
အပ္ဍဲခရိုၚ်တံၚ်ဥူဂှ် ဟိုတ်နူဍာ်ဇၞော်တုဲ လ္ပာ်သ္ကုတ်ဗၟံက်သက်တိုၚ်ကဵု လ္ပာ်သ္ကုတ်သၠုၚ်ကျာ သယိတ်ကျဳဂှ် ဒးဆောံလေၚ်လီုလာ်လဝ် တိဗ္ၚ ၂၆၀၀၀ ဨကပြၚ်တုဲ ပြေၚ်ဂၠဴ ၁၄၀ ပြၚ် ချိုတ်အာလဝ်ရောၚ် သ္ဂးလဝ် ပ္ဍဲတၚ်လလောၚ်တြးဂှ်ရ။
ဍာ်ဇၞော်ဍာ်ကလိုပ် အပ္ဍဲသၞာံဏံဝွံ အပ္ဍဲပွိုၚ် ၅၈ သၞာံဂှ် ဒှ်ဍာ်ဇၞော်လဝ်ဂၠိုၚ်အိုတ်တုဲ အပ္ဍဲခရိုၚ်ညံၚ်လေဝ်ပေန်ဂှ် သၞာံဂတဏံ သွက်ဍုၚ်လ္တူဒဵုတံဂှ် အကာဲအရာဇွောံမစၞစပိုတ်တံ က္တဵုဒှ်ကၠုၚ်မာန်ရောၚ် KNU ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−CJ