ထဝါဲ၊ အံက်တဝ်ဗာ ၁
ကံၚ်ဇြဳပၞာန် ကံက်စရၚ်လၟိဟ်မၞိဟ်သ္ဂာဗ္တံဂှ် နကဵုညးဍုၚ်ကွာန်တံ လ္ပရေၚ်တၠုၚ်ဗက်တုဲ သွက်ဂွံဘိုၚ်ဒစဵုဒစးအိုတ်ဂှ် ကမ္မတဳဗကပ်ဗဗေၚ် ချဳဒရာၚ်ပရေၚ်ဒဳမဝ်ကရေဇြဳ ခရိုၚ်ထဝါဲ DDMSC ဖ္တိုက်ဖ္အောဝ်လဝ်ရ။
ညးဍုၚ်ကွာန် အလုံဍုၚ်မွဲတံဝွံ ဟိုတ်နူဘဲပၞာန်၊ ဘဲဍာ်တုဲ အခိၚ်ဒှ်ဒၟံၚ်ဒဒိုက်ဂှ် ကံၚ်ဇြဳပၞာန် ပလေဝ်ပလေတ်လဝ် သွက်ဂွံကံက်အာစရၚ်လၟိဟ်မၞိဟ်သ္ဂာဗ္တံ အလုံဍုၚ်မွဲ နူဂိတုအံက်တဝ်ဗာ ၁ စဵုကဵု ဂိတုအံက်တဝ်ဗာ ၁၅ ရ။
ညံၚ်ဟွံဂွံဒုၚ်တဲ စရၚ်လၟိဟ်မၞိဟ်သ္ဂာဗ္တံ ကံၚ်ဇြဳပၞာန်ဂှ်ကီု ပရေၚ်ချဳဒရာၚ်ဗကပ်ဗဗေၚ် ဒစဵုဒစးပေါဲရုဲမာဲအလီတံဂှ် ကမ္မတဳချဳဒရာၚ်ဗကပ်ဗဗေၚ် ဒဳမဝ်ကရေဇြဳ ခရိုၚ်ထဝါဲ သ္ကိုပ်သ္ကတုဲ ကၠောန်ဒၟံၚ်အဆက်က်ရ။
ညးဒုၚ်တာလျိုၚ် လလောၚ်ပရိုၚ် ကမ္မတဳဗကပ်ဗဗေၚ် ခရိုၚ်ထဝါဲဂှ်တှ်ေ ကံၚ်ဇြဳပၞာန်ဝွံ ၜိုတ်လ္တူဍုၚ် အပ္ဍဲခရိုၚ်ထဝါဲ ညးတံထိၚ်ဒက်လဝ်ဂှ်ရ ကံက်အာစရၚ်လၟိဟ်မၞိဟ်သ္ဂာဗ္တံဂွံဏောၚ်ကီုလေဝ် ပ္ဍဲကဵုကွာန်တံဂှ်တှ်ေ ကံက်ဂွံအာဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒေသဍေံတံထိၚ်ဒက်လဝ်ဂှ်တှ်ေ ပ္ဍဲထဝါဲတှ်ေ ညးဍုၚ်ကွာန် လ္တူဍုၚ်ထဝါဲတံဂှ် ပါဲဟွံဗၠး ကၠုၚ်ကံက်စရၚ်တှ်ေ ဒးကဵုဏာစရၚ်ဏောၚ်။ ညအ်ဂှ် ပိုယ်တံ ကၠိုဟ်လဝ်တုဲတုဲရ ပံၚ်တောဲပါလုပ်ကဵု ကံၚ်ဇြဳပၞာန် ဟွံသေၚ်ပုဟ်ဂှ်။ ညးတံဂှ်တှ်ေ ပါဲဟွံဗၠး ဒှ်ဒၟံၚ်အကာဲအရာဏံ ဒှ်ဒၟံၚ်ဍာ်ပ္ဍဲတဲဍေံတံဏောၚ်။ ဆ္ဂး ဒၞါဲဍေံတံထိၚ်ဒက်ဟွံမာန် လ္ပာ်ကွာန်တံဂှ်တှ်ေ လ္တူနူကဵုဒစဵုဒစးဂှ် ဍေံတံ ကၠုၚ်ကံက်ဟွံဂွံပုဟ်” သာ်ဝွံ သ္ဂးရ။
ပ္ဍဲလ္တူဍုၚ် ကံၚ်ဇြဳပၞာန် ထိၚ်ဒက်လဝ်တံဂှ် သွက်ဂွံကံက်စရၚ်လၟိဟ်မၞိဟ်သ္ဂာဗ္တံဂှ် ကဵုဒၟံၚ်တန်ဗ္တောန် ကုအ္စာ၊ အ္စာၝောံတံ နွံတုဲ ပ္ဍဲကဵုပွိုၚ်ဍုၚ်လ္ၚဵုတံဂှ်တှ်ေ လိက်တၞး သ္ဒးဗပေၚ် ပ္ဍဲအရာကံက်စရၚ်လၟိဟ်မၞိဟ်သ္ဂာဗ္တံတံဂှ် ပလံၚ်ဗစိုပ် စဵုကဵုစိုပ်သ္ၚိ နွံဒၟံၚ်ရောၚ် ညးဆက်ဟီုရ။
ဒပ်စဵုဒၞါ ညးဍုၚ်ကွာန် ထဝါဲ DDT ဂှ်လေဝ် ဆန္ဒညးဍုၚ်ကွာန်ဟွံပါမွဲသာ် ညံၚ်ပေါဲရုဲမာဲအလီ ကံၚ်ဇြဳပၞာန်တံ ကၠောန်ဗဒှ်အာဏံ ဂွံဒှ် ရဲညးမကံက်ကဵုစရၚ်လၟိဟ်မၞိဟ်သ္ဂာဗ္တံ အတိုၚ်ပၟိက်ကံၚ်ဇြဳပၞာန်တံဂှ် ကေတ်အာအရေဝ် ဗွဲမစိုပ်တရဴဏောၚ် လလောၚ်ပ္တိတ်လဝ်ရ။
ကံက်စရၚ်လၟိဟ်မၞိဟ်သ္ဂာဗ္တံတုဲ ဒုၚ်သ္ဇိုၚ်ကဵုတၚ်နၚ်လၟိဟ်မၞိဟ် ကလိဂွံနၚ်တံဂှ်တုဲ က္ဍိုပ်သ္ကိုပ်ပၞာန်ဝွံ ညံၚ်အဝဵုညးဂွံတန်ကြန် စဳဇန်ဒၟံၚ် သွက်ဂွံကၠောန်ဗဒှ် ပေါဲရုဲမာဲ မထ္မံက်ကဵုရုပ်ရဴဂှ်ရ။
ပေါဲရုဲမာဲ ကံၚ်ဇြဳပၞာန် မကၠောန်ဗဒှ်ကဵုဂှ်ဝွံ သောၚ်ကလးကဵု ပဋိပက္ခပရေၚ်ဍုၚ်ကွာန်ဍုၚ်ဗၟာလၟုဟ် မာန်ဟွံသေၚ်တုဲ ဒှ်ဆၜိုတ်ပေါဲရုဲမာဲထ္ၜးစ သ္ဂောံသုၚ်စောဲအာ နဒဒှ်ပၞော်တိတ်ပရေၚ်ဍုၚ်ကွာန် ဂကောံပၞာန်တံရဏောၚ်ဂှ် DDMSC သ္ဂးရ။
ဟိုတ်ဂှ်ရ ကံၚ်ဇြဳပၞာန် ကေတ်လဝ်အဝဵု ဟွံဗဗွဲကဵုသၞောဝ်ဂှ် ပေါဲရုဲမာဲကီု ပွမကံက်စရၚ်လၟိဟ်မၞိဟ်သ္ဂာဗ္တံကီု မဒှ်အထံက်အရီု ညံၚ်အာယုက်ဂွံဂၠိၚ်တံဂှ် နကဵုညးဍုၚ်ကွာန် အခေါၚ်အရာနွံတံ သွက်ဂွံဒစဵုဒစးအာအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ