သဓီု၊ အံက်တဝ်ဗာ ၃
တွဵုရးဍုၚ်မန် ပွိုၚ်ဍုၚ်သဓီု ထံၚ်သဓီု နွံပ္ဍဲကွာန် (စျေးမသွယ်) ဂှ် ဂွံဂွံအခေါၚ်ပလံၚ်ကပေါတ် ပ္ဍဲထံၚ်တံကဵု ဂွံဂွံအခေါၚ်ဆဵုဂဗတံဂှ် ညးဇၞော်ထံၚ်တံ အာတ်မိက်ဒၟံၚ်သြန် ဂၠိုၚ်ကဵုဆတံ နွံဒၟံၚ်ရောၚ် ညးမစုက်လုက်ကဵုထံၚ်စာတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဇၞော်ထံၚ်ကံၚ်ဇြဳပၞာန်တံဝွံ ဂြောဝ်ဂတာကောန်ထံၚ်တံ ကၠုၚ်စိုပ်ပလံၚ်ကပေါတ်မ္ဂး ပါဇြေဝ်မွဲဂွဳမ္ဂး အကြာ ၅၀၀၀ ကဵု ၁၀၀၀၀ ဒ္ကေဝ်၊ သွက်အခေါၚ်ဆဵုဂဗကောန်ထံၚ်တံဂှ်တှ်ေ အာတ်မိက်ဒၟံၚ် နူ ၅၀၀၀၀ ဒ္ကေဝ် စဵုကဵု ကဵုကိုဋ်ရ။
သ္အာၚ်နူဂှ်ပၠန် သၟိၚ်တၠအဝဵုထံၚ်ကံၚ်ဇြဳပၞာန်တံဝွံ အာတ်မိက်ဒၟံၚ်သြန် စနူကဵုၚုဟ်ဍာ်၊ ၚုဟ်ပၟတ်၊ ၚုဟ်ဂဥုဲတံဂှ် နွံတုဲ ကောန်ထံၚ်ကဵုသြန်ဟွံမာန်တံဂှ်တှ်ေ ဖ္ဍဵုဖ္ဍိုက်ဒၟံၚ်တံ နွံဒၟံၚ်ရောၚ် ညးမစုက်လုက်ကဵုထံၚ်စာတ်တံ ဟီုရ။
ကၠုၚ်ပလံၚ်ကပေါတ် သွက်ကောန်ထံၚ်တံမ္ဂးလေဝ် တ္ၚဲၜက်တုဲမှ ညးဇၞော်ထံၚ်တံ ကဵုဒၟံၚ်ကောန်ထံၚ် နွံဒၟံၚ်တုဲ မွဲဏှမွဏှ က္တဵုဒှ်ဒၟံၚ်ယဲဂၞဴလီုတံ နွံဒၟံၚ်ရောၚ် ဂွံတီကေတ်ရ။
ကောန်ထံၚ်တံ မံၚ်ဟွံခိုဟ်မ္ဂး အခိၚ်အာစိုပ်ကဵုပရိုၚ် ဇရေၚ်သၟိၚ်တၠအဝဵုထံၚ် အံၚ်ခိုၚ်လက်ဂှ်လေဝ် ဂွံလွဳကဵုဂှ် ကဵုလဝ်စၞောန်ဟွံမွဲတုဲ ချိုတ်မ္ဂး ၜံက်တိတုဲ တိုပ်ထောံဂးတုဲ ဟွံမွဲကဵုဓဝ်ဗ္စာရဏာ ဟီုဂးဒၟံၚ်တံ နွံဒၟံၚ်ရောၚ် ညးမစုက်လုက်ကဵု ကောန်ထံၚ်တံ ဟီုအိုတ်ရ။
တုဲကၠုၚ်ပ္ဍဲဂိတုအံက်တဝ်ဗာ သၞာံတုဲတေံဂှ်လေဝ် ပ္ဍဲထံၚ်သဓီု ကောန်ထံၚ်ပရေၚ်ဍုၚ်ကွာန် ဥူတဇြေန် ဒၟါနူယဲယီုဂြက် ဟွံဂွံအခေါၚ်လွဳယဲ ဗွဲမဂတာပ်အခိၚ်တုဲ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဇာဇၞိက်ကောန်ထံၚ်အလုံဍုၚ်ဗၟာ PPNM ရ။
အခိၚ်လၟုဟ် ကောန်ထံၚ်တံဝွံ ယဝ်ရဒှ်ကၠုၚ်ယဲမ္ဂး နကဵုဂဥုဲ ဂြောဝ်ဂတာကောန်ထံၚ်တံ ပလံၚ်ဗစိုပ်နၚ်တံဂှ် ကောန်ထံၚ်တံ ကလေၚ်ပါ်ပရအ်ညးသ္ကအ်တုဲ ဒးရပ်စပ်ဒၟံၚ်ရောၚ် ဂွံတီကေတ်ရ။
စပ်ကဵုအာတ်ဒၟံၚ်သြန်တံကီု ပရေၚ်ဖ္ဍဵုဖ္ဍိုက် မက္တဵုဒှ်ဒၟံၚ် ပ္ဍဲထံၚ်စာတ်တံဂှ်တုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ညးမၞုံအခေါၚ်ဟီုဂး ကံၚ်ဇြဳပၞာန် တွဵုရးဍုၚ်မန် ဒံက်တာအံၚ်မျာတ်ကျဝ်ဇြုၚ် နကဵုဖုၚ် ဟွံအောန်နူကဵုပိဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပ္ဍဲထံၚ်သဓီုဂှ် ကောန်ထံၚ် ၇၀၀ ပြၚ် နွံဒၟံၚ်တုဲ ကောန်ထံၚ်ပရေၚ်ဍုၚ်ကွာန် ၂၂၅ တၠ ပါလုပ်ဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ