ဂျာကာတာ၊ အံက်တဝ်ဗာ ၅
ကၠာကောံဓရီုအာဇြဳယာန် မကၠောန်ဗဒှ်အာ သတ္တာဟဂတဏံ ဟွံဂွံစိုပ်ဏီ ပေါဲသဳကၠဳဆေၚ်စပ်ကဵု ပၞာန်အပ္ဍဲဍုၚ်ဗၟာဂှ် အေန်ဒိုဝ်နဳယှာ ဒုၚ်တဲကၠောန်အာဏောၚ် ဒဒှ်ရဟီုလဝ်ဂှ် ကလုတ်တမာန်အေန်ဒိုဝ်နဳယှာ ကဆံၚ်လ္တူမွဲတၠ ဟီုလဝ်ကဵု ဌာန်ပရိုၚ်အေအေပ်ပဳ ပ္ဍဲဂိတုအံက်တဝ်ဗာ ၃ တေံရ။
ပေါဲသဳကၠဳကၠောန်ဗဒှ်အာ ပ္ဍဲဂိတုအံက်တဝ်ဗာ ၄ ကဵု ၅ ဂှ် အေန်ဒိုဝ်နဳယှာ၊ အာဇြဳယာန်၊ ကုလသမဂ္ဂ၊ ဥရဝ်ပသမဂ္ဂ ကေုာံ ဂကောံဇြဟတ်ပၠန်ဂတးဍုၚ်ဗၟာတံ တိုန်စိုပ်အာဏောၚ် ကလုတ်ဟွံမိက်ထ္မံက်ယၟုမွဲတၠ ဟီုလဝ်ရ။ ကံၚ်ဇြဳပၞာန်ဂှ်တှ်ေ ဂွံပါလုပ်အာ ပ္ဍဲပေါဲသဳကၠဳဏံ ဟွံမွဲပုဟ်ဂှ်လေဝ် သ္ဂးရ။
ကၠာဟွံဂွံစိုပ် ကောံဓရီုအာဇြဳယာန် မကၠောန်ဗဒှ်အာ ပ္ဍဲလာအိုဝ် သတ္တာဟဂတဏံ နူဂိတုအံက်တဝ်ဗာ ၆ စဵုကဵု ၁၁ ဂှ် အေန်ဒိုဝ်နဳယှာ ဒုၚ်တဲကၠောန်ဗဒှ်လဝ်ကဵု ပေါဲသဳကၠဳသာ်ဏံရ။
ပ္ဍဲကောံဓရီုအာဇြဳယာန်ဂှ်လေဝ် စပ်ကဵုပၞာန်အပ္ဍဲဍုၚ်ဗၟာတုဲ စွံအဓိက သ္ဇက်ဂွံသဳကၠဳအာ နွံဒၟံၚ်ရ။
အာဇြဳယာန်ဂှ်တှ်ေ ညံၚ်ပဋိပက္ခဍုၚ်ဗမာ ဂွံပြေပြံၚ်အာဂှ် ကဵုလဝ်ဇြဟတ်ဂရိုဟ် နကဵုဂၠံၚ်တရဴကလုတ်တမာန်တံ တၟာဂလိုၚ်ကီုလေဝ် ကလိဂွံလဝ် ပရေၚ်တောတက် ညိညဓဝ်ရ။
နူကဵုကောံဓရီုအာဇြဳယာန် ကဆံၚ်သၠုၚ်ဏံ တာဒၞါလဝ် သၞာဲဒဴကံၚ်ဇြဳပၞာန်ဗၟာတံကီုလေဝ် ကံၚ်ဇြဳပၞာန်ဂှ်တှ်ေ ပ္ဍဲကောံဓရီုအာဇြဳယာန်ဂတဏံဂှ် ဗလးအာ သၞာဲဒဴကဆံၚ်လ္တူ နူကဵုဌာနဝန်ဇၞော်ကာဍုၚ်သ္အာၚ် မွဲတၠတုဲ သွက်ဂွံကလေၚ်ပ္ညဳပ္ညပ်ကဵု အာဇြဳယာန်ဂှ် ချပ်ဒၟံၚ်ရ။
ပ္ဍဲကဵုပေါဲသဳကၠဳကၠာတေံဂှ်တှ်ေ စပ်ကဵုက္ဍိုပ်သ္ကိုပ်ပၞာန်သီအဝဵုတံတုဲ သွက်ဂွံကၠောန်ဗဒှ် ပရေၚ်ရေၚ်တၠုၚ်ကေတ်အရေဝ် မသာသ္ကာတ်မြဟ်တံဂှ် အေန်ဒိုဝ်နဳယှာ၊ မလေဝ်ယှာ ကေုာံ ဖဳလေတ်ဖေန်တံ ဖ္တိုက်ဖ္အောဝ်လဝ်ရ။
ဍုၚ်သေံဂှ်လေဝ် မ္ၚးနူသဳကၠဳကဵု သ္ကိုပ်ဗိုလ်ပၞာန်တံဂှ် ကဵုက္ဍိုပ်သ္ကိုပ်ညးဍုၚ်ကွာန် ဒးဒုၚ်ရပ်လဝ် ဒဝ်အံၚ်သာန်သုကျဳဂှ်လေဝ် ကၠောန်သ္ပသဳကၠဳလဝ်ရ။
နကဵုကံၚ်ဇြဳပၞာန် အခိၚ်ဒးဆေၚ်ဒၟံၚ်မုက် ပရေၚ်ကျဗြံ ဗွဲမဂၠိုၚ်ဂှ် ညံၚ်ပဋိပက္ခ ဂွံပြေပြံၚ်ဂှ် ဇြဟတ်ဂရိုဟ် နူကဵုပရေၚ်ကလုတ်တမာန် အေန်ဒိုဝ်နဳယှာတံ မံက်တိတ်ကၠုၚ်လဝ်ရ။
နကဵုတၚ်ထ္ၜးဟိုတ် ကံၚ်ဇြဳပၞာန် ပလေဝ်ပလေတ်ဒၟံၚ် သွက်ဂွံကၠောန်ဗဒှ် ပေါဲရုဲမာဲဂှ်တုဲ နူကဵုကောံဓရီုအာဇြဳယာန်တံဂှ်မွဲကဆံၚ် သွက်ဂွံကလေၚ်ဒုၚ်တဲ ကုညးတံဂှ် ပ္တိတ်ကၠုၚ်ဇြဟတ် သာ်ဏံ ဒှ်မာန်ရောၚ် ညးလ္ၚတ်သ္ၚဳဂၠိပ်ပရေၚ်ဗၟာလ္ၚဵုတံ ဟီုလဝ်ရ။
Ref: AFP