မတ်မလီု၊ အံက်တဝ်ဗာ ၈
ကိုန်အစဳဇန်သၞေဟ်က္ၜၚ်ကျာ ကေုာံ သၞေဟ်က္ၜၚ် ကဆံၚ်ဂၠးတိ ကံၚ်ဇြဳပၞာန်သီအဝဵု မသိုၚ်ခၞံအာ ဗ္ဒါဲဍုၚ်မတ်မလီု တွဵုရးဍုၚ်မန်ဂှ်ဝွံ ဂွံကၠုၚ်ပွိုၚ်ပိသၞာံကီုလေဝ် ဒဵုကဵုအခိၚ်လၟုဟ် စကမၠောန်ဟွံမာန်ဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ဗ္ဒါဲဍုၚ်မတ်မလီုဂှ် သွက်ဂွံသိုၚ်ခၞံအာ သၞေဟ်က္ၜၚ်ကျာ ကေုာံ သၞေဟ်က္ၜၚ် ကဆံၚ်ဂၠးတိဂှ် သၞာံတုဲကၠုၚ် ၂၀၂၁ ဂိတုဒဳဇြေမ်ဗာ ၁၀ တေံ ဒက်ပ္တန်လဝ် ကမ္မတဳဗဟဵု ကောပ်ကာဲသ္ဂောံထ္မံက်ရုပ်ရဴကိုန်အစဳဇန် ဝန်ဇၞော်ကၟိန်ဍုၚ်တံ မပါလုပ်တံဂှ်ရ။
ကိုန်အစဳဇန်ကံၚ်ဇြဳပၞာန်ဝွံ ဂွံကၠုၚ်ကြပ်ပိသၞာံကီုလေဝ် ၜိုတ်သီတိဗ္ၚ၊ ၜိုတ်ကဵုသြန်လေဲတံသၟးရ နွံဒၟံၚ်တုဲ မုကမၠောန်မှ စဟွံမာန်ဏီပုဟ်ဂှ် ညးဒေသတံ ဟီုအိုတ်ရ။
ညးဒေသမွဲတၠဂှ်တှ်ေ စပ်ကဵုကိုန်အစဳဇန်ဏံတုဲ ထ္မံက်ရုပ်ရဴ ရေၚ်တၠုၚ်လဝ်ဂှ် ဟွံဂွံဆဵုကေတ်တုဲ တိဗ္ၚသီလဝ်တံဂှ်တှ်ေ ကေတ်ၚုဟ်တုဲ ကဵုကၠောန်ဒၟံၚ်သြောံတံရောၚ် ဟီုရ။
“လ္ပာ်ဏံဂှ် ထ္မံက်လဝ်ရုပ်ရဴ မုမှဟွံဆဵုဏီပုဟ်။ ဍေံတံ ကဵုကၠောန်လဝ်သြောံ။ မွဲဨက ၜိုတ်ပိဠက် ကဵုတဵုလွဳလဝ်သြောံတံတုဲ အခိၚ်ရတ်သြောံမှ ဍေံတံကၠောန်ဏောၚ် ဟီုမံၚ်ဂှ် ဂွံမိၚ်ကေတ်ရ။ ပြဟ်ဟ်ဂှ်တှ်ေ ရဲကြပ်ဂှ် ကၠောန်ဒၟံၚ်တုဲ အရေဝ်ဂၠိုၚ်တိုန်ညးသ္ကအ်တုဲ လက္ကဴဏံ တၠတမ်မူလတံရ ဒးကၠောန်ဂှ်ဂၠိုၚ်ကၠုၚ်။ ကိုန်အစဳဇန်ဍေံတံဂှ် ဟွံဂွံကၠောန်ဏီပုဟ်” သာ်ဝွံ သ္ဂးရ။
ကံၚ်ဇြဳပၞာန်ဂှ် ရန်လဝ် သွက်ဂွံသိုၚ်ခၞံ သၞေဟ်က္ၜၚ်ကျာဍုၚ်နာနာ ဗ္ဒါဲကွာန်ကအ်ပြာၚ် ပွိုၚ်ဍုၚ်မုဟ်ဍုၚ် ခရိုၚ်မတ်မလီုဂှ်တုဲ သၞေဟ်က္ၜၚ်ကဆံၚ်ဂၠးတိဂှ်တှ်ေ ရန်လဝ် အကြာကွာန်ဝါကလိကဵု ကွာန်ဘလောက်ညံၚ်ဝိုၚ် မကြပ်ကဵုပၞော်ၜဳ ပွိုၚ်ဍုၚ်မုဟ်ဍုၚ်ဂှ်ရ။
တၠကမၠောန်ပရေၚ်ပိုန်ဒြပ်မွဲတၠဂှ်တှ်ေ ကိုန်အစဳဇန်ကံၚ်ဇြဳပၞာန် မဒက်ပ္တန်အာဂှ်ဝွံ ပါဲနူပရေၚ်ပိုန်ဒြပ်တုဲ ရံၚ်ကဵုအကာဲအရာတိဍာ်တုဲ ကိုန်အစဳဇန်ဏံ ဒှ်ကၠုၚ်မာန်ဟွံသေၚ်ပုဟ်ဂှ် ထံက်ထ္ၜးလဝ်ရ။
“ ရံၚ်ကဵုတိဍာ်တုဲမ္ဂးလေဝ် ဂွံလုပ်ကၠုၚ် နူကဵုဂၠံၚ်ဏံဟီုဂှ် လ္ပာ်သေံဂှ်လေဝ် ဒှ်ဒၟံၚ်ဍုၚ် ဂၠံၚ်တိလေဝ် အာဂွံဒၟံၚ်ဟီုတှ်ေ သၞေဟ်က္ၜၚ်ကျာတံဏံ သၞေဟ်က္ၜၚ်တံဏံဂှ် စိုပ်အာတရဴကွေံကွေံဟွံသေၚ်ပုဟ်။ ဒးဟီုတပ်ပ်မ္ဂး ဒှ်ဟွံမာန်ပုဟ်” သာ်ဝွံ သ္ဂးရ။
သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန် ခါန်ကၞက်လဝ် ဥူအံၚ်ကျဳတုၚ်ဂှ် သွက်ဂွံကၠောန် ညံၚ်သၞေဟ်က္ၜၚ်ကျာ ကေုာံ သၞေဟ်က္ၜၚ်ကဆံၚ်ဂၠးတိတံ ဂွံအံၚ်ဇၞးဂးတုဲ ပ္ဍဲဂိတုဖေဖဝ်ဝါရဳ ၃ တေံ ကၠောန်ဗဒှ်လဝ် ကောံဓရီု ကုဂကောံဌာနမဆေၚ်စပ်တံရ။
ပ္ဍဲကဵုကောံဓရီုဂှ်တှ်ေ စပ်ကဵုကိုန်အစဳဇန်တုဲ တိဗ္ၚကဵု တိတၞဟ်ဟ်တံဂှ် ကဵုလဝ်သြန်လေဲတုဲတုဲဂှ်ရ ဗွဲမဗဗွဲကဵုလၟေၚ်ကမၠောန် သွက်ဂွံဂွံအခေါၚ်ရပ်စပ်အာဂှ် ကၠောန်လဝ်တုဲယျတုဲ စပ်ကဵုသွက်ပရေၚ်ပိုၚ်ပြဳတိဗ္ၚဂှ်တုဲ ဗွဲမဗဗွဲကဵုလၟေၚ်ကမၠောန် ညံၚ်ဂွံတုဲဒှ်ဗွဲမပြဟ် ရေၚ်တၠုၚ်ကဵုဒၟံၚ်ရောၚ် သ္ဂးရ။
တုဲကၠုၚ် ပ္ဍဲဂိတုဨပရဴ ၆ တေံဂှ်လေဝ် ကိုန်စဳမာန်သၞေဟ်က္ၜၚ်ကျာ ကံၚ်ဇြဳပၞာန် မသိုၚ်ခၞံအာတံဂှ် သ္ကိုပ်ဗိုလ်ဇၞော် မျထောန်ဥူ ဝန်ဇၞော်ကၟိန်ဍုၚ်ပရေၚ်ပလံၚ်ဗစိုပ်ဆက်စၠောံ ကံၚ်ဇြဳပၞာန်ခါန်ကၞက်ပ္တိုန်လဝ်ဂှ်ကီု၊ ဒုတိယဝန်ဇၞော် ဥူအံၚ်ကျဝ်ထောန် ကေုာံ သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ်တံ အခိၚ်အာစိုပ်ကျောဝ်ရံၚ်လဝ်ဂှ် ဒးဒုၚ်ဗ္တိုက်လဝ် ကဵုဒရုၚ်ရ။
ကမ္မတဳသ္ပစၞး ကၠတ်ထဝ်တွဵုရးဍုၚ်မန်ဂှ်တှ်ေ ကိုန်အစဳဇန်ကံၚ်ဇြဳပၞာန်ဝွံ ညံၚ်မၞိဟ်မွဲဂကောံ ဂွံခိုဟ်စ ဒှ်ကိုန်အစဳဇန် သွက်တၠအဝဵုပၞာန်တံရတုဲ ဟိုတ်နူဒှ်အလဵုအသဳ လုပ်သၞောဝ်ဟွံသေၚ်ဂှ်ရ ပြဝဍေံတံ သီတိဗ္ၚ၊ သွံတြး၊ လှာဲတၠတံဂှ်ဝွံ ဟွံလုပ်သၞောဝ်ပုဟ်ဂှ် တုဲကၠုၚ်ပ္ဍဲဂိတုဂျူလာၚ် ၁၁ သၞာံ ၂၀၂၂ တေံ လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Google