ဘာပန်၊ အံက်တဝ်ဗာ ၉
ပ္ဍဲတိဍာ်ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်ပၞာန်ကျာ ဒပ်ကံၚ်ဇြဳပၞာန်တုဲ အပ္ဍဲပွိုၚ်မွဲသတ္တာဟ ကောန်အရာပ်ပိတၠ ပါလုပ်သီုကဵု ကောန်ၚာ်သၟတ်မွဲတၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။
တုဲကၠုၚ် ပ္ဍဲဂိတုအံက်တဝ်ဗာ ၅ တေံ ဒပ်ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ် လျိုၚ်ပံၚ် ၅၀၀ (၂) မ ပ္ဍဲကွာန်ဒေလဝ်ပူ ခရိုၚ်ဘာပန် KNU နကဵုက္ၜၚ်ကျာတုဲ မၞိဟ်တြုံအာယုက် ၂၅ သၞာံ မွဲတၠကဵု ကောန်ၚာ်သၟတ် အာယုက် ၃ သၞာံမွဲတၠ အပံၚ်ဖအိုတ် ကောန်အရာပ် ၂ တၠ ချိုတ်အာလဝ် ပ္ဍဲဒၞါဲဒှ်ပရူဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အပ္ဍဲပရေၚ်ဗ္တိုက်ပၞာန်ကျာ ဒပ်ကံၚ်ဇြဳပၞာန်ဂှ် သၟတ်ဗြဴ အာယုက် ၁၄ သၞာံမွဲတၠလေဝ် ကလိဂွံအာလဝ်ဝပ်ရောၚ် သ္ဂးရ။
သ္အာၚ်နူဂှ်ပၠန် တုဲကၠုၚ် ပ္ဍဲဂိတုအံက်တဝ်ဗာ ၂ တေံဂှ်လေဝ် ဒပ်ကံၚ်ဇြဳပၞာန် ထောံဏာလဝ်မခတိုဟ် ၁၀ မ ပ္ဍဲကဵုအရာပ် (၁) ကဵု အရာပ် (၂) လ္တူဍုၚ်ဘာပန်ဂှ်တုဲ ညးဗြဴမွဲတၠ အာယုက် ၅၀ သၞာံ ၜှ်ဒၟံၚ်သၞေဝ်ကေဝ် ဗ္ဒါဲသ္ၚိတာဲတြေံတြေံဂှ် ဒးကဝေက်မာၚ်တုဲ ချိုတ်အာလဝ် ပ္ဍဲဒၞါဲဂှ်ရ။
ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန် ပ္ဍဲကဵုတိဍာ်ဒပ်မဟာ ၅ ခရိုၚ်ဘာပန် KNU တံဂှ်တုဲ အပ္ဍဲဂိတုသေပ်တေမ်ဗာ ပွိုၚ်မွဲဂိတုတုဲကၠုၚ်တေံ ကောန်အရာပ်မွဲတၠ ချိုတ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ဌာန်ဂအုပ် ဒပ်မဟာ ၅ KNU ရ။
ပ္ဍဲတိဍာ် KNU ဂှ် ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံတုဲ သာတုဲကၠောန်ကၠုၚ်ဒၟံၚ် ပရေၚ်ဗ္တိုက်ပၞာန်ကျာ ပရေၚ်ပန်ပှော်လွဟ်ဇၞော် ကေုာံ ပရေၚ်ဖံက်ပ္ကဝ်အခေါၚ်အရာမၞိဟ်တံဂှ်တုဲ ညးဍုၚ်ကွာန်ကောန်အရာပ်တံ ဇီုကပိုက်ချိုတ် ဒးဂြိပ်ဒဴပါဲဒလေတ်အာတံ သာဂၠိုၚ်ကၠုၚ်ဂှ် ဂကောံအခေါၚ်အရာမၞိဟ်ကရေၚ် KHRG သ္ဂးလဝ်ရ။
အခိၚ်လၟုဟ် ဒပ်ပံၚ်ကောံပၠန်ဂတး KNLA တံ ဘိုင်ကၟာတ်လဒဵုလဝ် ဗ္ဒိုပ်တမ်ဒပ် ပါလုပ်သီုကဵု ဗျူဟာပၞာန်ဖျေံသ္ဇိုၚ်ဘာပန် ကံၚ်ဇြဳပၞာန်တံဂှ်တုဲ ကံၚ်ဇြဳပၞာန်ဝွံ ဗွဲအဓိက ဒးသ္ပပဓာန်ဒၟံၚ် ကုပၞာန်ကျာသၟးရ။
ပရိုၚ်−သြၚ်လောန်တိုၚ်(မ်)
ဗီု−KPSN