လှာဒကှ်၊ အံက်တဝ်ဗာ ၁၅
ပေါဲဗ္တိုက်သီဗ္ဒိုပ် ဗျူဟာအနာန်ကွေန်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်လှာဒကှ် တွဵုရးကရေၚ်ဂှ်ဝွံ အပ္ဍဲဂိတုအံက်တဝ်ဗာ သတ္တာဟဒုတိယဂှ် ပေါဲဗ္တိုက်တံ ဆက်က္တဵုဒှ်ဒၟံၚ်တုဲ ထပ်သီဂွံလဝ် မကမ်လွဟ်လက်နက် ကေုာံ ကပေါတ်ဇွောံမလ္ၚဵုတံဂှ် ဂွံတီကေတ် အတိုၚ်ဂလာန် ကောန်သ္ဂံၚ်ပၠန်ဂတး ပါလုပ်ဗ္တိုက်ဒၟံၚ် ပ္ဍဲပေါဲဗ္တိုက်တံရ။
ကုန်ဗျူဟာအနာန်ကွေန်ကဵု ဗ္ဒိုပ်လောတ်ယှာန်ဒပ်ကံၚ်ဇြဳပၞာန် နွံလ္တူဂၠံၚ်ဇၞော် ကျာ်ပိ−ဇြပ်ဗု တိဍာ်ဒပ်မဟာ ၆ ပွိုၚ်ဍုၚ်ဝေန်ယျေ KNU ဂှ် စနူဂိတုအဝ်ဂါတ် သတ္တာဟဒုတိယတုဲကၠုၚ်တေံတုဲ ဒပ်ပံၚ်ကောံမဟာမိတ် ဂကောံဇြဟတ်ပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA တံ စဗ္တိုက်လဝ်ရ။
အကြာကံၚ်ဇြဳပၞာန် ဗ္တိုက်ထောံဒၟံၚ်မခတိုဟ်ဂှ် ပ္ဍဲဂိတုသေပ်တေမ်ဗာ ၁၂ တုဲကၠုၚ်တေံ ဂကောံဇြဟတ်ပၠန်ဂတး KNLA တံ သီဂွံလဝ် ဗ္ဒိုပ်ဒပ်လောတ်ယှာန် ကံၚ်ဇြဳပၞာန်တုဲ ဗျူဟာအနာန်ကွေန် လ္တူဂၠံၚ်ကွဳစက် ကျာ်ပိ−ဇြပ်ဗု သှ်ေဒၟံၚ်လက္ကရဴအိုတ်ဂှ် ဒပ်ပံၚ်ကောံတံ ဆက်ဗ္တိုက်ဒၟံၚ်ရ။
ညံၚ်ဗျူဟာအနာန်ကွေန် လ္တူဂၠံၚ်ကွဳစက် ကျာ်ပိ−ဇြပ်ဗု သှ်ေဒၟံၚ်လက္ကရဴအိုတ်ဏံ ဟွံဂွံစှ်ေအာဂှ် ဒပ်ကံၚ်ဇြဳပၞာန်လေဝ် ဆက်ကၠောန်သ္ပကၠုၚ်ဒၟံၚ် ပရေၚ်ဗ္တိုက်ထောံမခတိုဟ် နကဵုက္ၜၚ်ကျာတုဲ ကပေါတ်ဇွောံမတံဂှ်လေဝ် ဖျေံလဝ်ကဵုက္ၜၚ်ကျာတုဲ ကပေါတ်ဇွောံမတံဏံဂှ် ဂကောံဇြဟတ်ပၠန်ဂတးတံ သီဂွံလဝ်ရ။
သ္အာၚ်နူဂှ်ပၠန် နူကဵုဂၠံၚ်ကုန် ပွိုၚ်ဍုၚ်ဇြပ်ဗု တွဵုရးဍုၚ်မန်ဂှ်မွဲကဆံၚ် ဒပ်ကံၚ်ဇြဳပၞာန် ပ္ဍဲအရာပလံၚ်ပၞာန်ရီု လ္ပာ်ဗျူဟာအနာန်ကွေန်ဂှ် ဂကောံဇြဟတ်ပၠန်ဂတးတံ ဗ္တိုက်လဝ်တုဲ သီဂွံလဝ် လွဟ်လက်နက်မကမ်ဗွဲမဂၠိုၚ်ဂၠေၚ်ရ။
အခိၚ်လၟုဟ် သွက်ဂွံဗ္တိုက်သီကေတ် ဗ္ဒိုပ်ဗျူဟာအနာန်ကွေန် ဒပ်ကံၚ်ဇြဳပၞာန်ဂှ် ဒုၚ်ဍောၚ်ၜိုတ်ပ္တိတ်ဇြဟတ်တုဲ ညံၚ်ဂွံဂွံဗ္ဒိုပ်ဂှ် ဗ္တိုက်အာဏောၚ်တုဲ ခြာဟွံလအ် ဂွံမိၚ်ကေတ်ပရိုၚ်ခိုဟ် နွံဂှ်လေဝ် ကောန်သ္ဂံၚ်မွဲတၠ နူကဵုဒပ်ပြုပြေၚ်ပၞာန်တၟေၚ် SOF ပါလုပ်ဒၟံၚ် ပ္ဍဲပေါဲဗ္တိုက်ဗလးတိဂှ် ကဵုလဝ်သမ္တီရ။
ဒပ်ကံၚ်ဇြဳပၞာန်ဂှ်တှ်ေ ဒေသအနာန်ကွေန် ပရေၚ်ပၞာန်သ္ကာတ်မြဟ်ဒၟံၚ်ဏံ သၟးဟွံက ပ္ဍဲကဵုပွိုၚ်ဍုၚ်ဝေန်ယျေ၊ KNU ကွာန်ဒံၚ်ဒဳ၊ ဖာဗြ၊ (ကျုံခဝန်) ကေုာံ ဗ္ဒါဲဍုၚ်လှာဒကှ် ပ္ဍဲကဵုကွာန်(ကြခတ်ချောၚ်း) တံဂှ် ပန်ပှော်ကဵုလွဟ်ဇၞော်၊ ထောံမခတိုဟ်ဗ္တိုက်ကဵုက္ၜၚ်ကျာတံ ကၠောန်ဒၟံၚ်တုဲ ညးဍုၚ်ကွာန်ဒေသ ဇီုကပိုက်ဒးတံ နွံလဝ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော် ကေုာံ ဗ္တိုက်ထောံမခတိုဟ်နကဵုက္ၜၚ်ကျာ အပ္ဍဲဒေသအနာန်ကွေန်တုဲ ညးဍုၚ်ကွာန်ဒေသ နူကဵုကွာန်အနာန်ကွေန်၊ တညေန်၊ လောတ်ယှာန် ဟွံအောန်နူကဵုပိကွာန်တံဝွံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲတုဲ သ္ၚိဒၟံၚ်ဗွဲမဂၠိုၚ်ဂၠေၚ်လေဝ် ပၟတ်တူလီုအာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)