ပ္ဍဲလှာဒကှ် လွဟ်ဇၞော်ဒပ်ပၞာန်စှ်ေတုဲ ကောန်အရာပ်ၜါတၠ ချိုတ်အာ

လှာဒကှ်၊ အံက်တဝ်ဗာ ၁၆

ဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်(ဝက်ဆီကုန်း) ပွိုၚ်ဍုၚ်လှာဒကှ် တွဵုရးကရေၚ်ဂှ်တုဲ ညးဍုၚ်ကွာန်ကောန်အရာပ်ၜါတၠ ပါလုပ်သီုကဵု ကောန်ၚာ်သၟတ်မွဲတၠ ဇီုကပိုက်ဒးချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံကဵု KNU ရ။

တုဲကၠုၚ် ပ္ဍဲဂိတုအံက်တဝ်ဗာ ၁၂ အခိၚ်ဗ္တံဂှ် နူကဵုကုန်ဗျူဟာ တမ်ဒပ်ခလရ စၟတ် ၂၈၄ ဖျေံသ္ဇိုၚ်လှာဒကှ်ဂှ် ပေါဲဗ္တိုက်ဟွံမွဲမွဲသာ် ပန်ပှော်လဝ်လွဟ်ဇၞော်ကြာန်န်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန်(ဝက်ဆီကုန်း) ရ။

ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်တုဲ နဝ်အေဝ်ခူ အာယုက် ၁၀ သၞာံကဵု ဥူပါန်မျာၚ် အာယုက် ၆၄ သၞာံတံ ဇီုကပိုက်ချိုတ်အာတုဲ ဂေလဝ်အေဝ် အာယုက် ၁၃ သၞာံကဵု မလှထောန် အာယုက် ၁၇ သၞာံတံ ဇီုကပိုက်ကလိဂွံလဝ်ဝပ်ရ။

KNU ဗဟဵုဂှ်တှ်ေ ဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်လှာဒကှ်တံ ဒးဒုၚ်ဗိုၚ်ကၟာတ်လဝ်တုဲ ပေါဲဗ္တိုက်ဟွံမွဲလေဝ် လ္ပာ်ကံၚ်ဇြဳပၞာန် ကၠောန်သ္ပဗ္တိုက်လဝ်ကဵုလွဟ်ဇၞော် ကေုာံ ဗ္တိုက်လဝ်ကဵုပၞာန်ကျာ အပ္ဍဲကဵုကွာန် ဒၞါဲညးဍုၚ်ကွာန်ကောန်အရာပ်တံ မံၚ်တန်တဴဂှ်ရောၚ် လလောၚ်ပ္တိတ်လဝ်ရ။

အပ္ဍဲကဵုပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်ဂှ် ညးဍုၚ်ကွာန်ကောန်အရာပ်တံ ဒးဇီုကပိုက်ချိုတ်အာကီု၊ ဒြပ်ရတ်သ္ၚိဌာန်၊ ရုၚ်ဂဥုဲဗ္ဒမ်ဂဥုဲ၊ ဘာလကျာ်တံ ကဵု စမြိုၚ်ပရေၚ်ဘာသာတံလေဝ် ဇီုကပိုက်ဒးလီုလာ်လဝ်တံ နွံဒၟံၚ်ရောၚ် သ္ဂးရ။

ပ္ဍဲတိဍာ်အုပ်ဓုပ် ဗော်သွးကောန်ဂကူကရေၚ် KNU ဂှ် အပ္ဍဲကာလသီအဝဵုဏံ ဟိုတ်နူဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ်တံတုဲ ညးဍုၚ်ကွာန်မွဲပြကောဋိကိုဋ်ပြၚ် ထောံလသာသ္ၚိဌာန်ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုရ။

ပရိုၚ်−သြၚ်လောန်တိုၚ်(မ်)

ဗီု−KNU