နေဗျဳဒဝ်၊ အံက်တဝ်ဗာ ၁၆
စပ်ကဵုဂကောံရပ်လွဟ်တံ အာတ်မိက်ကၠုၚ် သွက်ဂွံသောၚ်ကလး ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ်တုဲ ဖ္ဍိုက်ဗပေၚ်သောၚ်ကလးကဵုအာဟွံသေၚ်ပုဟ်ဂှ် က္ဍိုပ်သ္ကိုပ်ပၞာန် ဟီုရ။
ပ္ဍဲကဵုတ္ၚဲကၠောံသၞာံ လိက်ကသုက်ဒေါအ်ပန်ပှော်အလုံဍုၚ် NCA ပေၚ် ၉ သၞာံ ပ္ဍဲဂိတုအံက်တဝ်ဗာ ၁၅ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုလဝ်ဂလာန်ရ။
ပဋိပက္ခက္တဵုဒှ်ဒၟံၚ် ပ္ဍဲဍုၚ်တံဂှ်ဝွံ မံက်ဂတဝ်ကၠုၚ် နူကဵုလညာတ်ပရေၚ်ဍုၚ်ကွာန်ဟွံတုပ်သၟဟ်တံတုဲ သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ် ကော်ဘိက်ဒၟံၚ်တုဲ ရန်ကဵုဒတုဲဖဵုကၟိန်ဍုၚ်တုဲ သီုညးဖအိုတ် သွက်ဂွံပါလုပ်ဂါံကွာ်အာ လ္တူဂၠံၚ်တရဴဆဵုဂဗသဳကၠဳဂှ် ဟီုလဝ်ရ။
ဆ္ဂး နကဵုနဲကဲရပ်လွဟ်ဂှ် အာတ်မိက်အရာဇကုမၞုံပၟိက်တံ ဟွံဂွံတုဲ စိုပ်ကၠုၚ်ပ္ဍဲကဵုဝိုၚ်တက်ကျာပရေၚ်ဍုၚ်ကွာန်တုဲ နကဵုနဲကဲသောၚ်ကလး ဗွဲမၜိုဟ်လလမ်ဂှ်ဟေၚ် ပြေပြံၚ်မာန်ရောၚ် သ္ဂးရ။
နကဵုဂကောံရပ်လွဟ်ကောန်ဍုၚ်အရၚ်တံ ပံၚ်တောဲပါလုပ် ပ္ဍဲလၟေၚ်ကမၠောန်ပရေၚ်ညိၚ်ဝတ် ဒပ်ပၞာန်ရေၚ်တၠုၚ်ဒၟံၚ်ဂှ်တုဲ နူကဵုပရေၚ်ဆဵုဂဗသဳကၠဳဂှ် သွက်ဂွံပ္ညဳပ္ညပ်အာတ်မိက် အရာဇကုနွံပၟိက်တံဂှ် ဖ္ဍိုက်ဖ္အောဝ်လဝ်ရ။
မွဲလ္ပာ်ဂှ်ပၠန် နကဵုဒပ်ပၞာန် အရာနွံပၟိက်သွက်ဂွံဗ္တိုက်သ္အး ဂကောံပၠန်ဂတးတံဂှ် ထပ်ရေၚ်တၠုၚ်အာဏောၚ်ဂှ်ရ နကဵုညးဍုၚ်ကွာန်တံ ဂွံစွံသတိဂှ်လေဝ် က္ဍိုပ်သ္ကိုပ်ပၞာန် ဟီုဂလာန်ပရေၚ်ၜိုဟ်လလမ်တုဲ ဘပဠလဝ်ဏီရ။
သ္အာၚ်နူဂှ်ပၠန် စပ်ကဵုပရေၚ်ၜိုဟ်လလမ်တုဲလေဝ် အာအတိုၚ်ဂၠံၚ်တရဴ NCA ရဏောၚ်တုဲ အတိုၚ်တၚ်တုပ်စိုတ် NCA ၜိုတ်ဒှ်မာန် သွက်ဂွံရေၚ်တၠုၚ်စွံအာဇြိုဟ်နက် ဗွဲမကၠးမှးဂှ် ဟီုလဝ်တုဲဂှ်လေဝ် သ္ဂးရ။
နူစသီအဝဵုတုဲ ဒဒှ်ရပလီုလဝ် သၞောဝ်သ္ဇိုၚ်ဒက်ပ္တန် ၂၀၀၈ ဂှ် ဂကောံဇြဟတ်ပၠန်ဂတးတံ လလောၚ်တြးလဝ်တုဲ အတိုၚ်လိက်ကသုက် NCA ဒှ်ကၠုၚ် နူသၞောဝ်သ္ဇိုၚ်ဏံဂှ်မ္ဂး ဂလာန်ဂွံသဳကၠဳပရေၚ်ဍုၚ်ကွာန်ဂှ်ဝွံ ထ္ၜးက္ဍိုပ်ဗ္ၜေံတုဲ သွံစဒၟံၚ်ဖျုန်ကၠဵု သာ်ဏံ ပါ်ပါဲဒၟံၚ်တံလေဝ် နွံဒၟံၚ်ရ။
မွဲလ္ပာ်ဂှ်ပၠန် မူသ္ဇိုၚ် ပါလုပ် ပ္ဍဲလိက်ကသုက် NCA အခန် ၁ ဂှ်ဝွံ ဟိုတ်နူဒပ်ပၞာန်သီအဝဵုတုဲ ဒးလီုလာ်အာဂှ်ရ လိက်ကသုက်လေဝ် လီုအာယျဂှ် ဂကောံဗော်သွးကောန်ဂကူကရေၚ် KNU လလောၚ်ပ္တိတ်ဟီုကၠုၚ်လဝ် ဗွဲမလုပ်သၞောဝ်ရ။
ပ္ဍဲကဵုမူသ္ဇိုၚ်ဂှ် ပြသၞာပရေၚ်ဍုၚ်ကွာန်ဂှ် ဟွံသောၚ်ကလး နကဵုပရေၚ်ပၞာန်မွဲသာ် သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန် ကြက်ရှ်သာသာ်ဏံ စၞောန်ပျးစုတ်လဝ်ကီုလေဝ် နကဵုဟိုတ်မမာဲဟွံဗဗွဲဓဝ်ဂှ် ဒပ်ပၞာန် သ္ပပဓာန်ကဵုဇြဟတ်လွဟ်တုဲ သီကေတ်လဝ် အဝဵုကၟိန်ဍုၚ်ရ။
နကဵုကံၚ်ဇြဳပၞာန် အခိၚ်လၟုဟ် ဟိုတ်နူပၞာန်ထ္ပက်ပၠန်ဂတး ကြပ်အလုံဍုၚ်မွဲတုဲ ပ္ဍဲကဵုအကာဲအရာ ဒးဗလးလဝ်တဲ ဌာန်ဂအုပ်ပၞာန်ရးမွဲ ကဵု ဍုၚ် ၈၀ ဍုၚ်ဂှ် ကော်ဘိက်ဒၟံၚ် ဂကောံပၠန်ဂတးတံ လ္တူဝိုၚ်တက်ကျာပရေၚ်ဍုၚ်ကွာန်ဂှ် ဂွံဆဵုကေတ်ဒၟံၚ် အဆက်က်ရ။
တုဲကၠုၚ် ပ္ဍဲဂိတုသေပ်တေမ်ဗာ ၁၆ တေံဂှ်လေဝ် သွက်ဂွံသောၚ်ကလး ပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ဂှ် မ္ၚးနူဂကောံရပ်လွဟ်ကောန်ဍုၚ်အရၚ်တံဂှ် ကၠာတေံ ကဵုလာပ်ဗဇဴတုဲ ကဵု PDF လုပ်ဖျေံလွဟ်ဂှ်လေဝ် ကော်ဘိက်ကၠုၚ်လဝ်ရ။
ကံၚ်ဇြဳပၞာန် မိက်ဂွံသောၚ်ကလးအာ နဲကဲပရေၚ်ဍုၚ်ကွာန်ဂှ် အလဵုညး ဟွံဖျေံလွဟ်မွဲသာ် ဗီုပြၚ်တၠအဝဵုပၞာန် ကဵုဂကောံရပ်လွဟ်တံ ဖျေံလွဟ်တုဲ ပ္တိတ်ကၠုၚ်ဇြဟတ် သွက်ဂွံသောၚ်ကလး နူကဵုဂၠံၚ်တရဴကၠတ်ထဝ်ဗော်ပရေၚ်ဍုၚ်ကွာန်ရ။
ဂကောံရပ်လွဟ်ကောန်ဍုၚ်အရၚ် ပါလုပ်ဒၟံၚ် ပ္ဍဲကဵုပရေၚ်ထပိုတ်ရိုဟ်ကၞက် သၞောတ်တၠအဝဵုပၞာန် ပ္တဝ်က္ဍိုပ်ကဵု ပၠန်ဂတးပြံၚ်လှာဲသၞောတ် တံ NUG, NUCC, PDF တံ ဟွံဒုၚ်တဲတုဲ ကယျာန်ပါဲလဝ် ပိုတ်တ်သ္ကုတ်တ်ရ။
ပရိုၚ်−သြၚ်လောန်တိုၚ်(မ်)
ဗီု−MOI