ရေဝ်၊ အံက်တဝ်ဗာ ၂၂
ပ္ဍဲတွဵုရးဍုၚ်မန် သ္ကုတ်သၠုၚ်ကျာကဵု လ္ပာ်ဒေသထဝါဲတံဂှ် ယဝ်ကံၚ်ဇြဳပၞာန် ကၠောန်ကၠုၚ်ပရေၚ်ပၞာန် သွက်ဂွံထိၚ်ဒက်တိဍာ်တံဂှ်မ္ဂး ဂွံကလေၚ်ဗ္တိုက်အာဂှ် ဒှ်ဒၟံၚ်ဒတုဲဂှ် နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ပြဟ်ဟ်ဏံ ပ္ဍဲအရာကံက်စရၚ်လၟိဟ်မၞိဟ်တံဂှ် ရပ်စပ်ဒၟံၚ်ဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပ္ဍဲကဵုသၠုၚ်ကျာတွဵုရးဍုၚ်မန် မွဲဒမြိပ်ဂၠံၚ်ဇၞော်ပျဳထံၚ်သု စၟတ် (၈) ဂှ် ထ္ပက်ကရောၚ်ပၞာန်ကီု၊ ကၠောန်သ္ပကၠုၚ်ပရေၚ်ပၞာန်ကီုဂှ် ဟွံမွဲဏီရ။
ဆ္ဂး ယဝ်ရကိစ္စစရၚ်လၟိဟ်မၞိဟ်သ္ဂာဗ္တံဏံတုဲဒှ်အာမ္ဂး သွက်ဂွံထိၚ်ဒက်တိဍာ်ဂှ် ကၠောန်ကၠုၚ်ပရေၚ်ပၞာန်တံဏောၚ်တုဲ ပေါဲဗ္တိုက်တံလေဝ် သာသ္ကာတ်မြဟ်ကၠုၚ်ဏောၚ်ဂှ် နာဲနဂါ သ္ၚဳဂၠိပ်လဝ်ရ။
“ယဝ်ရ ဍေံတံ သွက်ဂွံထိၚ်ဒက်တိဍာ်ဂှ် ကၠောန်ကၠုၚ်ပရေၚ်ပၞာန်တံမ္ဂး လ္ပာ်ပိုယ်တံ ဒှ်ဒၟံၚ်ဒတုဲရဏောၚ် သွက်ဂွံဗ္တိုက်ပလီုပလာ်ဂှ် ပလေဝ်ပလေတ်လဝ် နွံ” သာ်ဝွံ ညး ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ပ္ဍဲကဵုတယိတ်ချံၚ်ကဵု ပွဳပွူဒေသထဝါဲ ပ္ဍဲကဵုဒေသဂွံလဝ်ပရိုၚ် ဂကောံဒပ်ပၠန်ဂတး တတ်ကၠောံအာကၠုၚ်ဒၟံၚ်တံ ပါလုပ်သီုကဵုကုန်ဒဵု စှ်ေကဵုဗျူဟာ လ္တူဂၠံၚ်ဇၞော် စၟတ် ၈ တံဂှ် သိုၚ်ခၞံလဝ် ဗ္ဒိုပ်ယာယဳတံကဵု ဗာန်ကာတံ နွံဂှ် သ္ဂးရ။
သ္အာၚ်နူဂှ်ပၠန် စပ်ကဵုခမရ ၅၈၈ ဖျေံလဝ်ဒပ် ဗ္ဒါဲကွာန်စဳပျး လ္တူဂၠံၚ်ကွဳစက် ရေဝ်−ဇြပ်ဗု ပ္တိတ်ဒၟံၚ်ဇြဟတ် သွက်ဂွံသိုၚ်ခၞံ ဗ္ဒိုပ်ဖျေံသ္ဇိုၚ်ယာယဳ ကံၚ်ဇြဳပၞာန် နကဵုဗာန်ကာ ခိုၚ်ၚ်ကၠိုက်က်ဂှ်တုဲ ပ္ဍဲဂိတုအံက်တဝ်ဗာ ၁၇ တေံ ဒပ်ပံၚ်ကောံမဟာမိတ်တံ ပါလုပ်သီုကဵု MSRF တံ လုပ်စိုပ်ဗ္တိုက်လဝ်ဏီရ။
ပ္ဍဲကဵုပရေၚ်ပၞာန်ဏံဂှ် ဒပ်ပံၚ်ကောံမဟာမိတ် မပ္တံကဵုဒပ်ပၠန်ဂတးဍုၚ်မန် MSRF၊ ဗော်ဍုင်မန်တၟိ NMSP AD၊ တမ်ဒပ် KNLA (၂၇) ၊ YPDF၊ တမ်ဒပ် (၁) ABSDF ၊ ဒပ်ဒမၠုက်ရေဝ် YGF တံ ပါလုပ်လဝ်ရ။
မွဲလ္ပာ်ဂှ်ပၠန် အကြာဒပ်ပၠန်ဂတးမန်တံဂှ်လေဝ် ပ္ဍဲကဵုထ္မံက်ပေါဲဗ္တိုက်ပရေၚ်ပၞာန် ကဆံၚ်သ္ဇိုၚ်တံဂှ် စကၠောန်ဒၟံၚ်မွဲစွံယျဂှ် နာဲနဂါ ကဵုလဝ်ပရိုၚ်ရ။
“ ဒပ်ပၠန်ဂတးမန်ဂမၠိုၚ် ဒပ်ပၠန်ဂတးဍုၚ်မန် MSRF၊ ဒပ်စဵုဒၞါဍုၚ်မန် MSDF ၊ NMSP AD ပိဒပ်ဏံ ပ္ဍဲကဵုကဆံၚ်သ္ဇိုၚ်ဏံ စထ္မံက်ဒၟံၚ်ပေါဲဗ္တိုက် ပရေၚ်ပၞာန်တံယျ။ MLA ဂွံပါလုပ်ကၠုၚ်ဂှ်လေဝ် ဒပ်ပံၚ်ကောံပိုယ်တံ ပရေၚ်ပ္ညဳပ္ညပ်သဳကၠဳဒၟံၚ်တံ နွံဒၟံၚ်ရ” သာ်ဝွံ သ္ဂးရ။
ဒပ်ပၠန်ဂတးဍုၚ်မန် MSRF စဒက်ပ္တန်လဝ် ပ္ဍဲကဵုအခိၚ်ပၞာန်သီအဝဵုတုဲတေံဂှ်ဝွံ ပ္ဍဲကဵုသ္ကုတ်သၠုၚ်ကျာတွဵုရးဍုၚ်မန် ဗ္ဒါဲပွိုၚ်ဍုၚ်ရေဝ်တံဂှ်ကဵု မွဲဒမြိပ်ဂၠံၚ်ဇၞော်ပျဳထံၚ်သု စၟတ် ၈ ရးတၞၚ်သဳဂှ် ချဳဒရာၚ်ဒၟံၚ်ပရေၚ်ပၞာန် ကရောံဒပ်မဟာမိတ်တံရ။
ညးမၞုံအခေါၚ်ဟီုဂး ဒပ်ပၠန်ဂတးမန်ပိဒပ်တံဂှ်တှ်ေ ရာသဳဗြဲကျာတၟးဏံ ပ္ဍဲကဵုဒေသချဳဒရာၚ်ဒၟံၚ်ဂှ် ပံၚ်တောဲအာ ပရေၚ်ပၞာန်စှ်ေကဵုဗျူဟာ ကုမဟာမိတ်တံဏောၚ်ဂှ် တုဲကၠုၚ်ပ္ဍဲဂိတုသေပ်တေမ်ဗာတေံ ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ နကဵုတၚ်ရန်တၟံ သ္ဂောံကလေၚ်သီကေတ် တိဍာ်ဒးဆောံလေၚ်လဝ် ဇရေၚ်ဒပ်ပၠန်ဂတးအပ္ဍဲဒေသတံကဵု ဂကောံရပ်လွဟ်ကောန်ဍုၚ်အရၚ်တံဂှ်တုဲ စဳဇန်လဝ် ပရေၚ်ပၞာန် (ရန်နိုင်မင်း) မွဲရောၚ် ဂွံတီကေတ် အတိုၚ်လိက်ဒုၚ်စဳရေၚ် Myanmar Witness ရ။
ပရိုၚ်−သြၚ်လောန်တိုၚ်(မ်)
ဗီု−Voice