မတ်မလီု၊ အံက်တဝ်ဗာ ၂၅
ကပေါတ်ဗၞိက်သေံ လုပ်စိုပ်ကၠုၚ် အပ္ဍဲတွဵုရးဍုၚ်မန်တံဂှ် ထ္ၜးဟိုတ် နဒဒှ်ကပေါတ်ဗၞိက် ဟွံလုပ်သၞောဝ်ဂှ်တုဲ လ္ပာ်ကံၚ်ဇြဳပၞာန် ဗက်ရပ်ဒက်ဒၟံၚ်ဂှ်ရ ဒးဂဗကၠုၚ်ကဵု ကပေါတ်ဗၞိက်ပိုတ်အိုတ်တံမာန်ရောၚ် တၠပညာပရေၚ်ပိုန်ဒြပ်တံ ဟီုရ။
ဂကောံပံၚ်ကောံကံၚ်ဇြဳပၞာန် ဌာနစုၚ် ပါလုပ်ဂှ်ဝွံ စနူဂိတုအံက်တဝ်ဗာ သတ္တာဟဒုတိယဂှ်တုဲ ကပေါတ်ဗၞိက်သေံ လုပ်စိုပ်ကၠုၚ် အပ္ဍဲတွဵုရးဍုၚ်မန်တံဂှ် မ္ၚးနူကဵုသၞေဟ်ကၚ်စၟဳတ်ဂှ် ဗက်ရပ်ဒက်ဒၟံၚ် စဵုကဵုရုၚ်ကြိုၚ်စွံကပေါတ် ဂိုဝ်ဒံၚ်တံရ။
ပ္ဍဲအရာရပ်ဒက်ဿာ်ဏံဂှ်လေဝ် ကပေါတ်ဗၞိက်သီဂွံလဝ်တံမပါလုပ် မွဲတဲဓဝ် သီဏာလဝ် သီုကဵုကွဳစက်ဖ္ဍိုက်ဗၞိက် မၞုံပ္ဍဲဒၞါဲဒေၚ်တံဂှ်တုဲ ကဵုထ္ပက်စၟတ်တဲဒုၚ်ဝန် ဒဒှ်ရဟွံကၠောန် ပွမပၠောပ်ပ္တိုန်ကပေါတ်ဗၞိက် ဟွံလုပ်သၞောဝ်တံ နွံဒၟံၚ်ရ။
လ္ပာ်ကံၚ်ဇြဳပၞာန် ဗက်ရပ်ဒက်ဒၟံၚ် ကပေါတ်ဗၞိက်သေံတံ နွံဒၟံၚ်တုဲ အပ္ဍဲဗွဝ်ဖျာ ကပေါတ်ဗၞိက်သေံဗွဲမဂၠိုၚ် ၚုဟ်တိုန်ကၠုၚ်ဒၟံၚ်တုဲ သၟာဗၞိက်တံလေဝ် ဒေါအ်ဇူလဝ် ပရေၚ်ပၠောပ်ပ္တိုန်ကပေါတ်ဗၞိက်တံ ယာယဳရ။
တၠပညာပရေၚ်ပိုန်ဒြပ်မွဲတၠဂှ်တှ်ေ ဗက်ရပ်ဒက်ဒၟံၚ် ကပေါတ်ဗၞိက်ပၠောပ်ပ္တိုန်နၚ် နူကဵုဍုၚ်သ္အာၚ်တံဂှ်ဝွံ ကပေါတ်ဗၞိက်အောန်တုဲ ၚုဟ်ထပ်က္ဍၚ်တိုန်ကၠုၚ်မာန်တုဲ ကၠောန်လဝ် ညံၚ်ညးရပ်စပ်စသုၚ်တံ ဂွံဒှ်ဒဒိုက်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲအရာထပိုတ်ဖျေံ ဗၞိက် ပၠောပ်ပ္တိုန်နၚ် နူကဵုဍုၚ်သ္အာၚ်တံဂှ်လေဝ် လၟုဟ် ပ္ဍဲဗွဝ်ဖျာဏံဂှ်တှ်ေ ဒှ်သဘဴဗက်ရပ်ဒက်ဒၟံၚ် ရဲသွံပရးတံ နွံဒၟံၚ်ရ။ ဗက်ရပ်ဒက်သာ်ဏံဂှ်တှ်ေ ဖဵုအဆက်ဍေံဂှ်တှ်ေ ကပေါတ်ဗၞိက်တံ အောန်ဏောၚ်။ ၚုဟ်တိုန်ကၠုၚ်ဏောၚ်။ မုဒှ်ရောဟီုတှ်ေ မၞိဟ်စသုၚ် ဒှ်ဒၟံၚ်ဒဒိုက် နူတမ်တေံဂှ် ညံၚ်ဂွံဒှ်ဒဒိုက် သာတုဲကၠောန်ကၠုၚ်လဝ်ရ” သာ်ဝွံ သ္ဂးရ။
ကပေါတ်ဗၞိက် လုပ်စိုပ်ကၠုၚ် ဟွံလုပ်သၞောဝ်တံဂှ် မ္ၚးနူကဵုဒေသပယျဵုကဵု ဂၠံၚ်သွံရာန်ဗၞိက်တံဂှ် သွက်ဂွံလုပ်စိုပ်စၟဳတ်ကေတ်အရေဝ် စဵုကဵုအပ္ဍဲဗွဝ်ဖျာ ကေုာံ ရုၚ်ကြိုၚ်စွံကပေါတ် အပ္ဍဲဍုၚ်တံဂှ် တုဲကၠုၚ် ပ္ဍဲဂိတုအံက်တဝ်ဗာ ၉ တေံ ဒုက္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် သဵုဝေန် ကဵုလဝ်ပၟိၚ်ရ။
ဒုက္ဍိုပ်သ္ကိုပ်ပၞာန်ဂှ်တှ်ေ ပရေၚ်သွံရာန်ဗၞိက် ဟွံလုပ်သၞောဝ်တံ နွံဒၟံၚ်တုဲ ပရေၚ်ကၠောန်ပ္တိတ်ဗၞိက် တၠကမၠောန်ကၠောန်ဒၟံၚ် ကမၠောန်ကၠောန်ပ္တိတ်အပ္ဍဲဍုၚ်တံကဵု ပရေၚ်ပြိုၚ်ပ္ကာန် အပ္ဍဲဗွဝ်ဖျာတံ ယအ်စှ်ေအာမာန်ဂှ်ရ တာဒၞါအာ ပိုတ်တ်သ္ကုတ်တ်ဏောၚ်ဂှ် ဟီုလဝ်ရ။
တၠပညာပရေၚ်ပိုန်ဒြပ်မွဲတၠဂှ်တှ်ေ ပ္ဍဲဍုၚ်သ္အာၚ် အခိၚ်ပံက်ကဵုဒၟံၚ် ဗွဝ်ဖျာပရေၚ်ပိုန်ဒြပ်ဂှ် ကံၚ်ဇြဳပၞာန် ရပ်ဒက်ဒၟံၚ် သာ်ဏံဂှ်ဝွံ ဒှ်သဘဴ ကလေၚ်အာဒၟံၚ် ခေတ်ကၠာတေံဏောၚ်တုဲ ရပ်ဒၟံၚ် ရဲပၠောပ်ပ္တိုန်ကပေါတ်တံသၟးတုဲ ရဲစလာပ်ဗဇဴတံဂှ် ဟွံရပ်မွဲသာ် အရာမစိုပ်တရဴတံ နွံကၠုၚ်ဟွံသေၚ်ပုဟ်ဂှ် ထံက်ထ္ၜးလဝ်ရ။
“ဍုၚ်ညးကဵုညး အခိၚ်ပံက်ကဵုဒၟံၚ်ပရေၚ်ပိုန်ဒြပ်ညးတံ ညံၚ်ဂွံဂွံအဆက်ကဵု ညးဂၠးတံ ဂွံဒှ်ဂလိုဝ်ဗဴလိုက်ဇြေယှေန် အခိၚ်ပံက်ကဵုဒၟံၚ်ဂှ် ဍုၚ်ဇကု ကလေၚ်ကၟာတ်ဒၟံၚ်ဟီုတှ်ေ ဒှ်ဒၟံၚ်သဘဴကလေၚ်အာဒၟံၚ် ခေတ်ကၠာတေံရဏောၚ်။ ဗ္တိုက်သ္အးဒၟံၚ် အရာမစလာပ်ဒ္ဂေတ်လီုတံဂှ်ဟွံသေၚ် လၟုဟ်ဂှ် ရဲပၠောပ်နၚ်တံဂှ်ရ ရပ်မံၚ်။ ရဲစလာပ်တံဏံဂှ်တှ်ေ အကြာဏံ ဗၠးဒၟံၚ်မံၚ်ဖိုဟ်ရ။ ကိစ္စဏံဂှ် မုမှဂွံစိုပ်တရဴဂှ် ဟွံမွဲပုဟ်” သာ်ဝွံ သ္ဂးရ။
လ္ပာ်ကံၚ်ဇြဳပၞာန် နကဵုဟိုတ်ပရေၚ်သွံရာန်ဗၞိက်ဟွံလုပ်သၞောဝ်ဂှ် ဗက်ရပ်ဒက်ဒၟံၚ် ကပေါတ်ဗၞိက်သေံတံတုဲ အပ္ဍဲဒေသ ကပေါတ်ဗၞိက်မၞိဟ်ရပ်စပ်ဂၠိုၚ်တံ အောန်တုဲ ပရေၚ်ပိုန်အိုတ်တံ ဒှ်ကၠုၚ်မာန်တုဲ ဗွဝ်ဖျာဒမၠုက် သာဇၞော်ပၟဝ်ကၠုၚ်မာန်ရောၚ် သၟာဗၞိက်ဂမၠိုၚ် သ္ၚဳဂၠိပ်လဝ်ရ။
ပ္ဍဲဍုၚ်ဗၟာ လက်ထက်ကံၚ်ဇြဳပၞာန် နူသၞာံ ၂၀၂၂ ဂိတုဂျာန္နဝါရဳ စဵုကဵုသၞာံ ၂၀၂၄ ဂိတုအဝ်ဂါတ်ဂှ် ပရေၚ်သွံရာန်ဗၞိက်ဟွံလုပ်သၞောဝ် ဂဗုတ်နွံဒၟံၚ် ၁၄၀၀၀ ပြၚ်တုဲ ရပ်ဂွံလဝ် ၚုဟ်မးမၞုံ ၃၀၀ ဗဳလျာန်ဒ္ကေဝ်ပြၚ်ဂှ် ဂွံတီကေတ် အတိုၚ်တၚ်နၚ် ကံၚ်ဇြဳပၞာန်ရ။
ပ္ဍဲကဵုကပေါတ်ဗၞိက်ရပ်ဂွံဂမၠိုၚ် ကွဳစက်လာၚ်ဇြေန်ဟွံမွဲတံကဵု ယာန်ကွဳစက်ဖ္ဍိုက်ပ္တိုန်ဗၞိက် ဟွံလုပ်သၞောဝ်တံ ဒှ်ဂၠိုၚ်အိုတ်တုဲ ကပေါတ်ဗၞိက်အပြောံတံဂှ်တှ်ေ ဒှ်ဒုတိယဂၠိုၚ်အိုတ်တုဲ ကပေါတ်ဗၞိက်ဓလိုက်တမ်ရိုဟ်တံဂှ်တှ်ေ ဒှ်တတိယဂၠိုၚ်အိုတ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ