တယိတ်ချံၚ်၊ အံက်တဝ်ဗာ ၂၇
ပ္ဍဲရးတၞၚ်သဳ ပွိုၚ်ဍုၚ်တယိတ်ချံၚ်ဂှ် ဒပ်ကံၚ်ဇြဳပၞာန် ပန်ပှော်လွဟ်ဇၞော်ကြာန်န်တုဲ ထ္ပက်ကရောၚ်ပၞာန် လုပ်စိုပ်ကၠုၚ်ဂှ်ရ ညးဒေသ ၃၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ၁၃၀ ပြၚ်ပါဂှ်ဝွံ စနူဂိတုအံက်တဝ်ဗာ ၂၅ အခိၚ်နူဂယးဂှ်တုဲ ပါ်ဇြဟတ် ထ္ပက်ကရောၚ်ပၞာန်လုပ်စိုပ်ကၠုၚ် ပ္ဍဲကွာန်(သရက်နှစ်ခွ၊ ပန်းပြင် ကေုာံ ကွာန်မဲနယ်အိုး) တံရ။
ဒပ်ကံၚ်ဇြဳပၞာန် ထ္ပက်ကရောၚ်ပၞာန်လုပ်စိုပ်ကၠုၚ်ဂှ်ဝွံ အခိၚ်လၟုဟ် လုပ်စိုပ်ဖျေံလဝ်ဒပ် အပ္ဍဲကွာန်တံတုဲ ညးဍုၚ်ကွာန်ကွာ်ဂၠံၚ်တံဂှ်လေဝ် ကၟာတ်လဒဵုတုဲ ဂၠိုက်ဂၠါဲစၟဳတ်ဒၟံၚ်တံ ကၠောန်ၜိုတ်ဒၟံၚ်ရ။
အတိုၚ်ဂလာန် ညးဒေသတံဂှ်မ္ဂး အပ္ဍဲကဵုပွိုၚ်ၜါတ္ၚဲ ဒပ်ကံၚ်ဇြဳပၞာန် ဖျေံလဝ်ဒပ် အပ္ဍဲကွာန်တံဂှ် ပရေၚ်ပန်ပှော်လွဟ်ဇၞော်တံ ကၠောန်သ္ပလဝ် ၂၀ ဝါပြၚ်ဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်တုဲ ဘာလကျာ် လဒေါဝ်ကွာန် (သရက်နှစ်ခွ) ဇီုကပိုက်ဒးလီုအာတံ နွံကီုလေဝ် မၞိဟ်ဇီုကပိုက်ကလိဂွံဝပ်ဂှ် ဟွံမွဲရ။
တုဲကၠုၚ် ပ္ဍဲဂိတုအံက်တဝ်ဗာ အပ္ဍဲသတ္တာဟဒုတိယဂှ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲဂကောံကွာန်ဍာ်ဗုသ္ကုတ်သၟဝ် ပွိုၚ်ဍုၚ်လံၚ်လုၚ် ရးတၞၚ်သဳဂှ်တုဲ ညးဒေသ ၅၀၀၀ ပြၚ် ဒးဂြိပ်ဒဴလဝ်ရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Thanintharyi ဂှ်မ္ဂး ပ္ဍဲရးတၞၚ်သဳ အပ္ဍဲဂိတုသေပ်တေမ်ဗာတုဲကၠုၚ်တေံ ပါဲနူကဵုကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်ဂှ် ဟိုတ်နူထောံမခတိုဟ်ကဵုဒရုၚ် ကေုာံ ကဵုလွဟ်ဇၞော်တံဂှ်တုဲ ညးဍုၚ်ကွာန်ဒးထောံလသာသ္ၚိဌာန် နွံဒၟံၚ် ဗ္ဒါဲ ၆၀၀၀၀ ရ။
ပရိုၚ်−သြၚ်လောန်တိုၚ်(မ်)
ဗီု−CJ