ကောန်ပၞာန်ကိုဝ်ရဳယျာသၟဝ်ကျာတံ ပ္တဝ်ကၠုၚ်ဒၟံၚ်က္ဍိုပ် လ္ပာ်ယူကရုၚ်ယျဂှ် အမေရိကာန် ဟီု

ဝါယှေန်တာန်၊ နဝ်ဝေမ်ဗာ ၁

ကောန်ပၞာန် ကိုဝ်ရဳယျာသၟဝ်ကျာ လ္တက်လဝ်ကယျိုၚ်ပၞာန်ရုယှာတံဝွံ ယိုက်ကေတ်လွဟ်လက်နက်ပၞာန် ရုယှာတံတုဲ ပ္တဝ်ကၠုၚ်ဒၟံၚ်က္ဍိုပ် လ္ပာ်ယူကရုၚ်ယျဂှ် ဝန်ဇၞော်ကာစဵုဒၞါ အမေရိကာန် အေဝ်လွိုၚ် အဝ်သတေန် ဟီုလဝ် ပ္ဍဲဂိတုအံက်တဝ်ဗာ ၃၀ တေံရ။

စပ်ကဵုကိုဝ်ရဳယျာသၟဝ်ကျာ ဖျေံလဝ်ကောန်ပၞာန် သွက်ရုယှာ စဵုကဵုဇြဟတ် ၁၂၀၀၀ ဂှ်တုဲ အခိၚ်ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ဂှ် အပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဍုၚ်ဝါယှေန်တာန် ကရောံဝန်ဇၞော်စဵုဒၞါ ကိုဝ်ရဳယျာသၠုၚ်ကျာ ကေန်ယံၚ်ဟောန်ဂှ် ဝန်ဇၞော်ကာစဵုဒၞါအမေရိကာန် ဟီုကၠုၚ်လဝ် သာ်ဏံရ။

ကောန်ပၞာန်ကိုဝ်ရဳယျာသၟဝ်ကျာလ္ၚဵုတံဝွံ ပ္တဝ်အာဒၟံၚ်က္ဍိုပ် ဒေသကာသ် ဍုၚ်ရုယှာ ပယျဵုယူကရုၚ်ဂှ် အမေရိကာန် ကေုာံ ကိုဝ်ရဳယျာသၠုၚ်ကျာတံ ဟီုလဝ်ရ။

သွက်ဂွံဗ္တိုက်ပ္တိတ် ကောန်ဒပ်ယူကရုၚ် ထ္ပက်ဒၟံၚ်ပၞာန် အပ္ဍဲဒေသတံဏံဂှ် ဒပ်ရုယှာတံ ဒးပ္တိတ်ဒၟံၚ်ဇြဟတ် ဗွဲမဝါတ်ဂါတ်ရ။ ဟိုတ်နူပရေၚ်ဆက်ဆောံ ကိုဝ်ရဳယျာသၟဝ်ကျာကဵု ရုယှာတံ ခိုဟ်ကၠုၚ်တုဲ နူကဵုပျုၚ်ယာန် ဗလးကဵုလဝ် ကောန်ပၞာန်တံဂှ်တုဲ လ္ပာ်ကရေန်မလေန် ကလေၚ်ကဵုအာ အရီုဗၚ်သာ်လဵုရောဟီုဂှ် က္ဍိုပ်သ္ကိုပ်ဂၠးတိဂမၠိုၚ် ဒှ်ဒၟံၚ်ဓဝိၚ်အိုတ်ရ။

ကောန်ဒပ်ကိုဝ်ရဳယျာသၟဝ်ကျာ စဵုကဵု ၄၅၀၀ အပ္ဍဲသတ္တာဟဏံ စိုပ်ကၠုၚ်ပယျဵုယူကရုၚ်မာန်ဏောၚ် အမာတ်ကလုတ် ကုလသမဂ္ဂ ယူကရုၚ် ဟီုလဝ် ပ္ဍဲကောံဓရီုကာတၟေၚ် မကၠောန်ဗဒှ်လဝ် ပ္ဍဲဂိတုအံက်တဝ်ဗာ ၃၀ တေံရ။

ကောန်ပၞာန်ကိုဝ်ရဳယျာသၟဝ်ကျာတံဝွံ ပ္ဍဲအရာဗ္တိုက်ယူကရုၚ်တံဂှ် စနူဂိတုနဝ်ဝေမ်ဗာတုဲ ပါလုပ်ကၠုၚ် တိုက်ရိုက်ရဏောၚ်ဂှ် ညး ဟီုလဝ်ရ။

ဟိုတ်နူဖျေံလဝ် ကောန်ပၞာန်ကိုဝ်ရဳယျာသၟဝ်ကျာတံတုဲ ပေါဲပၞာန်ရုယှာ−ယူကရုၚ် သာလှဲလးကၠုၚ်မာန်တုဲ သီုကဵုဂၠိၚ်သ္ၚောဲကၠုၚ်မာန်ဂှ်ရ စပ်ကဵုကလေၚ်ခၠေဝ်ပလန်သာ်လဵုထေက်ရောဂှ်တုဲ သၞာဲဒဴဂမၠိုၚ် သဳကၠဳဒၟံၚ်အိုတ်ဂှ် အဝ်သတေန် ဟီုရ။

ကောန်ပၞာန်ကိုဝ်ရဳယျာသၟဝ်ကျာတံဝွံ စိုပ်ဒၟံၚ်ပယျဵု ရုယှာ−ယူကရုၚ် ၜိုတ် ၃၀ မိုၚ်ယျဂှ် သၞာဲဒဴယူကရုၚ်မွဲတၠ ဟီုရ။

ဟိုတ်နူပြဝကိုဝ်ရဳယျာသၟဝ်ကျာတုဲ ဍုၚ်တၞဟ်ဟ်တံလေဝ် ဂွံပါလုပ်ကၠုၚ် ပ္ဍဲပေါဲပၞာန်ယူကရုၚ် ဒှ်မာန်ဟာ စပ်ကဵုသၟာန်ဏံတုဲ ဝန်ဇၞော်အဝ်သတေန်ဂှ်တှ်ေ ဟီုလဝ် ဒှ်ပြဝဍုၚ်တၞဟ်ဟ်တံ ခၠေဝ်ပလန်ကၠုၚ်မာန်ကီုလေဝ် ဗွဲလစှ်ေ ဂှ်တှ်ေ ဟွံဟီုဏာလဝ်ရ။

နကဵုကိုဝ်ရဳယျာသၟဝ်ကျာ သွက်ဂွံကလေၚ်ကော် ကောန်ဒပ်ညးတံ နွံပ္ဍဲရုယှာတံဂှ် အမေရိကာန် ကေုာံ ကိုဝ်ရဳယျာသၠုၚ်ကျာတံ ဖ္တိုက်ဖ္အောဝ်လဝ်ရ။

ရုယှာ ဒးကော်ကေတ်သုၚ်စောဲဒၟံၚ် ကောန်ပၞာန်ကိုဝ်ရဳယျာသၟဝ်ကျာတံ သာ်ဏံဂှ်ဝွံ အပ္ဍဲပွိုၚ်ၜါသၞာံပြၚ်ဏံ ဒးဆောံလေၚ်လဝ် ကောန်ပၞာန်ဗွဲမဂၠိုၚ်ဂၠေၚ်ဂှ် မံက်ကၠးဒၟံၚ်ရောၚ် သၞာဲဒဴအမေရိကာန်တံ ဟီုရ။

ယဝ်ရအဝဵုအပိုၚ်အခြာရုယှာ ကေုာံ ပရေၚ်ပိုန်ဒြပ် ဒတုဲဖဵုရုယှာ ဒးဒုၚ်ဘပဠမ္ဂး ပျုၚ်ယာန် ဂွံခၠေဝ်ပလန်အာ ဒှ်ဒၟံၚ်ဒတုဲရောၚ် အမာတ်ကလုတ် ကိုဝ်ရဳယျာသၟဝ်ကျာ စပ်ကဵုကုလသမဂ္ဂ ဟီုလဝ်ရ။

Ref: AP