ၜၚ်ကံက်၊ နဝ်ဝေမ်ဗာ ၃
သွက်ဂွံစမ်ၜတ်အာ ဗျူဟာတၟိတံဂှ်တုဲ အလဵုအသဳသေံ စၟတ်ကေတ် တွဵုရး ၁၀ နဒဒှ်တွဵုရးကၠာအိုတ်တုဲ သွက်ဂွံသောၚ်ကလး ပြသၞာဆက်စပ်ကဵု ဂဥုဲၜူမာဲတံဂှ် ကၠောန်အာ ကွေံကွေံကြာန်န်ရဏောၚ် မဒှ်ရ။
စပ်ကဵုပရေၚ်ဇီုကပိုက် ပြသၞာဂဥုဲၜူမာဲ လ္တူပွဳဗွိုၚ်မၞိဟ်တံ ဇၞော်သၠဲလးကၠုၚ်ဂှ်တုဲ သ္ကိုပ်ဝန်ဇၞော် ဗဴဓောန်ဓာန် ယှေန်နာဝါထရာ ဟီုလဝ် ဗွဲမဇြိုဟ်နက်တုဲ သွက်ဂွံဗ္တိုက်သရိုဟ် တၚ်ကော်ဆဴဏံဂှ် ပၟိက်ဇၞော် ဗွဲမလောန်ဂှ် ဟီုလဝ်ရ။
ပြသၞာ ဂဥုဲၜူမာဲဝွံ ဒးဒုၚ်ညာတ်လဝ် နဒဒှ်ဒစုက်ဇလ သွက်ပရေၚ်တောတက်ကၟိန်ဍုၚ် ကေုာံ သွက်မူဝါဒဂမၠိုၚ် ဂွံအံၚ်ဇၞးတံဂှ်ရ နူကဵုအလဵုအသဳ စွံအဓိက ကၠောန်ၜိုတ်ဒၟံၚ် ဇၞော်ကဵုပၟိက်ရ။
စပ်ကဵုကိုန်စဳမာန်ဏံတုဲ ပ္တိုန်ထ္ၜးလဝ် ကၠတ်ထဝ်တုဲဒှ်ဂှ်ရ ဒဒှ်ရ ဒှ်ကိုန်စဳမာန်ပၟိက်ဇၞော်မွဲဂှ် ထ္မံက်ထ္ၜးဒၟံၚ်ရ။
ပ္ဍဲကဵုဒေသလ္ၚဵုတံဂှ်တှ်ေ အစဳဇန်ပရေၚ်ဗ္တိုက်သ္အး ဂဥုဲၜူမာဲ ဒဒှ်ရအံၚ်ဇၞးလဝ်ဂှ် သ္ကိုပ်ဝန်ဇၞော် ဟီုလဝ်တုဲ နွံပၟိက် ဒးလှဲပ္တိုန်အာ ကိုန်စဳမာန်ဂှ်ရောၚ် သ္ဂးရ။
တွဵုရးချေၚ်မာဲ၊ ဥူတောန်ထနဳ၊ ပရာချောတ် ခဳရဳခါန်၊ သဃောန် နက်ခေါန်၊ နာဃောန် ဖနန်၊ ရယံၚ်၊ နဃောန် သဳ တမရာတ်၊ ထရာန်၊ နရာသဳဝေတ် တံဂှ် အလဵုအသဳသေံ စၟတ်လဝ် နဒဒှ်တွဵုရးစအာ ကိုန်စဳမာန်ဗ္တိုက်သရိုဟ်ဂဥုဲၜူမာဲ ကိုပ်ကၠာအိုတ် မဒှ်ရ။
ပ္ဍဲအရာဗ္တိုက်သရိုဟ် ဂဥုဲၜူမာဲဂှ် ညံၚ်ဗွိုၚ်ညးဍုၚ်ကွာန်တံ ဂွံပံၚ်တောဲပါလုပ်ကၠုၚ်ကီု၊ ပရေၚ်ဗ္တိုက်သရိုဟ် ကေုာံ ပရေၚ်ကလေၚ်ပ္တန်ပ္တူ၊ သ္ဂောံထပိုတ်ဂဥုဲမာန်၊ ပရေၚ်သီပိုန်ဒြပ် ညးသွံဂဥုဲၜူမာဲတံ၊ သွက်ပရေၚ်ကလေၚ်ပ္တန်ပ္တူတံဂှ် ညံၚ်ဂွံဂွံကဵုအရီုဗၚ်၊ ကြဴနူကလိလောန်ဒုဟ်ဒဏ်တုဲ ညံၚ်ဂွံဒှ်သဟဇာတကဵု ဗွိုၚ်မၞိဟ်တံဒှ်တမ် အစဳဇန်တံဏံ ပါလုပ်ရ။
ပ္ဍဲဍုၚ်သေံ ကြဴနူကဵုအခေါၚ် သုၚ်စောဲတၞးဘၚ် ဗွဲမလုပ်သၞောဝ်တုဲဂှ် ဟိုတ်နူအပြံၚ်အလှာဲအလဵုအသဳတုဲ သွက်ဂွံကလေၚ်ပြံၚ် သၞောဝ်ဂှ် စဳဇန်လဝ်ရ။
ဂွံဆဵုကေတ် ဂဥုဲၜူမာဲ မက်တာဖက်တမေန် နတဲတုဲ တၚ်စၟတ် လၟိဟ်ဂဥုဲမ ဒးဒုၚ်ကေတ်အရေဝ်မာန်တံဂှ်လေဝ် အလဵုအသဳသေံ ပလေဝ်ပလေတ်လဝ်ရ။
ဟိုတ်နူအကာဲအရာ ဍုၚ်ဇိုၚ်ဝုတ်ဒိုဟ် ဍုၚ်ဗၟာ ဟွံညိၚ်ဝတ်တုဲ ဍုၚ်သေံဝွံ ဒှ်ကၠုၚ်ဂၠံၚ်ကြတ် သွက်ပရေၚ်သွံရာန်ဗၞိက် ဂဥုဲၜူမာဲတံဂှ် သၞာဲဒဴသေံဂမၠိုၚ်ဟီုရ။
ပ္ဍဲကဵုဒေသ ဍုၚ်သေံ၊ လာအိုဝ်၊ ဍုၚ်ဗၟာ မဆက်စပ်ဒၟံၚ် ပ္ဍဲကဵု Golden Triangle ဂှ် ပရေၚ်ကၠောန်ပ္တိတ်ဂဥုဲၜူမာဲ ဂၠိုၚ်တိုန်ကၠုၚ် တီတီတုဲ ရာန်ဂဥုဲမ မက်တာဖက်တမေန်ဂှ်တှ်ေ ရာန်လောဲနူကဵု ဗဳယျာ ဒှ်ဒၟံၚ်ရောၚ် သၞာဲဒဴသေံဂမၠိုၚ် ဟီုရ။
Ref: The Thaiger