တၞၚ်သဳ၊ နဝ်ဝေမ်ဗာ ၅
ဒပ်ကံၚ်ဇြဳပၞာန် ကၠုၚ်စိုပ်ဂေတ်ကၚ် ဒးဒုၚ်ဗ္တိုဟ်မာၚ်ဗ္တိုက်လဝ် ပ္ဍဲကဵုဂၠံၚ်ကွာန်ဗာန်လမတ် ပွိုၚ်ဍုၚ်တၞၚ်သဳ ရးတၞၚ်သဳတံဂှ်တုဲ ကောန်ဒပ်ကံၚ်ဇြဳပၞာန် ပန်တၠ ချိုတ်အာလဝ်ရောၚ် ဂကောံဒပ်စဵုဒၞါညးဍုၚ်ကွာန် (တောဗုံးကြီး) လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုနဝ်ဝေမ်ဗာ ၂ အခိၚ်ဇိုၚ်သဝ်တ္ၚဲ ၜိုတ်အခိၚ် ၃ နာဍဳဂှ် ကောန်ဒပ်ကံၚ်ဇြဳပၞာန် ၄၀ ပြၚ် နူကဵုတမ်ဒပ် ခမရ စၟတ် ၅၅၆ ဖျေံသ္ဇိုၚ်ကွာန်(ဇဝဲ) ထ္ပက်ကရောၚ်ပၞာန်တိတ်ကၠုၚ် နကဵုတရဴတိုက်ဂှ် အခိၚ်စိုပ်ဂၠံၚ်ကွာန်ဗာန်လမတ်ဂှ် ဒးဒုၚ်ဗ္တိုဟ်မာၚ် ဗ္တိုက်လဝ်ရ။
ဟိုတ်နူဒးဒုၚ်ဗ္တိုဟ်မာၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ဇီုကပိုက်ချိုတ်အာတံဂှ် မၚ်ရံၚ်ကဵုဒရုၚ်တုဲ သ္ပဒတန်လဝ်ရောၚ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် (တောဗုံးကြီး) မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒးဒုၚ်ဗ္တိုဟ်မာၚ်ဗ္တိုက်လဝ် နကဵုမာၚ်ဗ္တိုက် ပန်မတုဲ ကောန်ဒပ်ကံၚ်ဇြဳပၞာန် ပန်တၠ ချိုတ်တုဲ မၞိဟ်ဇီုကပိုက်ကလိဂွံဝပ် နွံဒၟံၚ် ဗွဲမဂၠိုၚ်ဂၠေၚ်ရောၚ် သ္ဂးရ။
ကောန်ဒပ်ကံၚ်ဇြဳပၞာန် ဒးဒုၚ်ဗ္တိုဟ်လဝ်မာၚ်တံဂှ်ဝွံ ဒှ်ကောန်ဒပ်ကံၚ်ဇြဳပၞာန် ကၠုၚ်စိုပ်သွက်ဂွံကေတ်ကဵုဂီုကၠီုဂၠံၚ် ကုရေၚ်ယာန်ကွဳစက်ကံၚ်ဇြဳပၞာန် မကၠုၚ်လ္ပာ်တၞၚ်သဳတံဂှ်ရောၚ် ဂွံတီကေတ်ရ။
ကောန်ဒပ်ကံၚ်ဇြဳပၞာန် ဇီုကပိုက်ချိုတ်အာလဝ် ပ္ဍဲကဵုပရေၚ်ဗ္တိုက်ထောံမခတိုဟ် ဗ္ဒါဲကွာန်ဗာန်လမတ်တံဂှ် ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် လ္ပာ်ကံၚ်ဇြဳပၞာန် ကၠုၚ်စိုပ်ယိုက်ကေတ်ဏာလဝ် နကဵုကွဳစက်မွဲဖ္ဍိုက်ရောၚ် ဂွံတီကေတ် အတိုၚ်ဂလာန်ညးဒေသတံရ။
တုဲကၠုၚ် ပ္ဍဲဂိတုအံက်တဝ်ဗာ ၂၇ တေံဂှ်လေဝ် ဒပ်ကံၚ်ဇြဳပၞာန် မကေတ်ကဵုဂီုကၠီုရေၚ်ယာန်ဇွောံမကံၚ်ဇြဳပၞာန်ဂှ် ဒးဒုၚ်ဗ္တိုဟ်မာၚ်ဗ္တိုက်လဝ် ပ္ဍဲဇိုၚ်ဒဵုကျာ် ကရပ်ကွာန်ဗာန်လမတ်ဂှ်တုဲ ကောန်ဒပ်ကံၚ်ဇြဳပၞာန် ထပှ်တၠ ကလိဂွံလဝ်ဝပ် ဗွဲမသ္ကာတ်မြဟ်ရောၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−တောဗုံးကြီး