ပ္ဍဲဘာပန် ဟိုတ်နူပရေၚ်ဗ္တိုက်ကံၚ်ဇြဳပၞာန်တုဲ ကောန်အရာပ်ပိတၠ ချိုတ်အာ

ဘာပန်၊ နဝ်ဝေမ်ဗာ ၆

ပ္ဍဲတိဍာ်ဗော်သွးကောန်ဂကူကရေၚ် KNU ခရိုၚ်ဘာပန် ဒပ်မဟာ ၅ ဂှ် တုဲကၠုၚ်အပ္ဍဲဂိတုအံက်တဝ်ဗာမွဲဂိတုတေံ ဟိုတ်နူပရေၚ်ပန်ပှော်ဗ္တိုက် ဒပ်ကံၚ်ဇြဳပၞာန်တုဲ ကောန်အရာပ်ပိတၠ ချိုတ်တုဲ မသုန်တၠ ဇီုကပိုက်ကလိဂွံလဝ်ဝပ်ရောၚ် ဌာန်ဂအုပ်ဒပ်မဟာ ၅ KNLA လလောၚ်ပ္တိတ်လဝ်ရ။

ပ္ဍဲဂိတုအံက်တဝ်ဗာဂှ် ဒပ်ကံၚ်ဇြဳပၞာန် ထောံလဝ်မခတိုဟ် ၃၆၉ မ ပ္ဍဲကဵုကွာန်ညးဍုၚ်ကွာန် မံၚ်တန်တဴမံၚ်တံ နကဵုက္ၜၚ်ကျာဂှ်တုဲ ကဵုသၞာတ်စက်ပန်က္ၜၚ်ကျာတံဂှ်လေဝ် ပန်ပှော်လဝ် ဗွဲမဂၠိုၚ်ဂၠေၚ်တုဲ ပန်ပှော်လဝ် ဗွဲမဂၠိုၚ်ဂၠေၚ်တုဲ အပ္ဍဲကွာန်တံဂှ် ပန်ပှော်လဝ် မကမ်လွဟ်ဇၞော် ၄၄ မရ။

သ္အာၚ်နူဂှ်ပၠန် သ္ၚိမၞိဟ်ဒၟံၚ် ၉ မ၊ ဘာကျာ်မွဲမ၊ ဗ္ဒမ်စပုၚ်မွဲမ၊ ဘာ(မူကြို) မွဲမ၊ ဘာတန်မူလမွဲမ ကေုာံ ဗ္ဒမ်ဘာမွဲမ ဇီုကပိုက်လီုလာ်အာလဝ်တုဲ ခံက်ဝါဗ္ၚညးဍုၚ်ကွာန်တံကဵု သြောံၜဲသြောံဂန်ဗွဲမဂၠိုၚ်ဂၠေၚ်လေဝ် ဇီုကပိုက်လီုလာ်အာလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲခရိုၚ်ဘာပန် KNU ဂှ် ဒပ်ကံၚ်ဇြဳပၞာန်ဝွံ ကြဴနူဒးဒုၚ်သီဗ္ဒိုပ်ဒပ်တံတုဲဂှ် ကၠောန်သ္ပဗ္တိုက်ကၠုၚ်ပၞာန်ကျာ ပ္ဍဲကဵုကွာန်ညးဍုၚ်ကွာန်တံမံၚ်တံ အဆက်က်ဂှ် KNU သ္ဂးရ။

မွဲလ္ပာ်ဂှ်ပၠန် ပရေၚ်ဗ္တိုက်ပၞာန်ကျာ ဒပ်ကံၚ်ဇြဳပၞာန်တံ ထပ်ဒှ်ကၠုၚ်ဂှ် ဂွိၚ်ဒၟံၚ်အိုတ်ဂှ်ရ ကောန်ကွာန်ဒေသ ဂကောံကွာန် (ခေါပုတ်) တံဝွံ ဒးသ္ဂုတ်သွာတ်လဝ် သ္ဂောံကၟာတ်ဘာဗ္တောန်လိက် ယာယဳဂှ်ရောၚ် ဂကောံအခေါၚ်အရာမၞိဟ်ကရေၚ် KHRG လေဝ် လလောၚ်ပ္တိတ်ဟီုလဝ်ရ။

ဗ္ဒိုပ်ဒပ်(ခေါပုတ်) ပၟိက်ဇၞော် ပ္ဍဲကဵုဗျူဟာပရေၚ်ပၞာန် ပ္ဍဲခရိုၚ်ဘာပန် KNU ဂှ် ဒပ်ပံၚ်ကောံပၠန်ဂတးမဟာမိတ်တံ သီဂွံလဝ် ပ္ဍဲဂိတုအံက်တဝ်ဗာ ၂၉ တေံတုဲဂှ် ပ္ဍဲအရာဗက်ဗ္တိုက်ပသောၚ် ကုဒပ်ကံၚ်ဇြဳပၞာန် ဂြိပ်ဗၠးအာတံဂှ် ရပ်ဂွံလဝ် ကောန်ဒပ် ၁၇ တၠ ဂျိုၚ်ၚ်ရ။

သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်လ္ၚဵု ဂြိပ်တိတ်ကၠုၚ် နူဗ္ဒိုပ်(ခေါပုတ်) တံဂှ်လေဝ် သှ်ေဒၟံၚ်ဏီတုဲ လ္ပာ်ဒပ်ပံၚ်ကောံပၠန်ဂတးတံ ဗက်ဗ္တိုက်ပသောၚ်ဒၟံၚ်ဂှ် ညးမၞုံအခေါၚ်ဟီုဂး ဒပ်မဟာ ၅ သ္ကိုပ်ဗိုလ်ဇၞော် သဝ်ကလာဒိုဝ် ဟီုလဝ်ရ။

ပ္ဍဲခရိုၚ်ဘာပန် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတး ဒပ်မဟာ ၅ KNLA တံဂှ် အပ္ဍဲဂိတုအံက်တဝ်ဗာတေံ က္တဵုဒှ်လဝ်ပေါဲဗ္တိုက် ၁၃၆ ဝါတုဲ လ္ပာ်ကံၚ်ဇြဳပၞာန် ၂၉ တၠ ချိုတ်တုဲ ၃၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။

ပရိုၚ်−သြၚ်လောန်တိုၚ်(မ်)

ဗီု−KPSN