မတ်မလီု၊ နဝ်ဝေမ်ဗာ ၆
ပ္ဍဲတွဵုရးဍုၚ်မန် ကောန်ဒပ်ဗၠာဲသၟိၚ်သၟဝ်တဲကံၚ်ဇြဳပၞာန်တံဝွံ ရပ်စပ်နဲကဲနာနာတုဲ ရပ်ဒက်အာတ်မိက်ကၠုၚ်သြန် လ္တူညးဍုၚ်ကွာန်တံဂှ် ကၠောန်ကၠုၚ်ဒၟံၚ် အဆက်က်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ဗၠာဲသၟိၚ်တံဝွံ နကဵုဟိုတ်ပရေၚ်ဂီုကၠီုဂှ် ဂေတ်ဂေၚ်အပ္ဍဲဍုၚ်ကီု၊ ကၟာတ်လဒဵုဂၠိုက်ဂၠါဲကီု၊ ပ္ဍဲကဵုဒၞါဲ မၞိဟ်မံၚ်ဂၠိုၚ်တံဂှ် စၟဳတ်စရၚ်ကၟုဲတုဲ ဘပဠအာတ်မိက်သြန်တံ ကၠောန်ၜိုတ်ဒၟံၚ်ရ။
ပ္ဍဲအရာကၠောန်တဴသာ်ဏံဂှ် ပ္ဍဲကဵုပွိုၚ်ဍုၚ်ပံၚ်၊ သဓီု၊ ၜဳကလေၚ်၊ ကျာ်ထဝ် ကေုာံ ပ္ဍဲကဵုပွိုၚ်ဍုၚ်ရေဝ် မစၟတ်လဝ် မၞိဟ်တြုံၜါတၠ ဍိုက်ကွဳလိုန်ဓာတ်ဟွံဂွံတံဂှ် ကြဴနူကၟာတ်လဒဵုရပ်ဒက်ကေတ် ညးဍိုက်ကွဳလိုန်ဓာတ်တံဂှ်တုဲ အာတ်မိက်ဒၟံၚ် သြန် ဂၠိုၚ်ကဵုစှော်ကိုဋ် နွံဒၟံၚ်ရ။
ညးဒေသ တွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကောန်ဒပ်ဗၠာဲသၟိၚ်လ္ၚဵုတံဝွံ ဗွဲအဓိက စွံပွန်ကဵု မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်ဟွံဂွံတံဂှ်တုဲ ရပ်ဒက်အာတ်မိက်ဒၟံၚ်သြန်ဂှ် ဟီုရ။
“စပ်ကဵု မၞိဟ်တြုံၜါတၠ ဍိုက်ကွဳလိုန်ဓာတ်ဂှ်တုဲ ရပ်ဒက်တုဲ အာတ်မိက်ဒၟံၚ်သြန်။ ညးဍုၚ်ကွာန်ဓမ္မတာတံှဂ်တှ်ေ လ္ၚဵုတံဂှ်လေဝ် ဍိုက်ဒၟံၚ်ဖိုဟ်ရ။ ဂဗကဵုဍေံတံတှ်ေ ဒးဏောၚ်။ အဓိကဂှ်တှ်ေ ဒပ်ဗၠာဲသၟိၚ်တံရ။ ကောန်ဒပ်ဗၠာဲသၟိၚ် လ္ၚဵုတံ။ မၞိဟ်ဇၞော်လ္တူလ္တူတေံ ဟွံတီလေဝ် ဒှ်မာန်ဒၟံၚ်ဏောၚ်။ ဟွံကဵုလှုဲတှ်ေ ဟွံဗလးကဵုပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲဒၞါဲကောန်ဒပ်ဗၠာဲသၟိၚ်တံ တာဒၞါစၟဳတ်ဂှ် ယဝ်ရဒဳအသိၚ်လောန်အာမ္ဂး ရပ်ဒက်ပန်ပှော်ဒၟံၚ်ကဵုသေနာတ် ကၠောန်သ္ပဒၟံၚ်ဂှ်ရ မ္ၚးနူကဵုဒးကဵုသြန်ဂှ် ဒးဆေၚ်ဒၟံၚ်မုက်ကဵု သီုအန္တရာယ်လမျီုတံရောၚ် ညးဆက်ဟီုရ။
နကဵုကောန်ဒပ်ဗၠာဲသၟိၚ်ဂမၠိုၚ် အပ္ဍဲဍုၚ်ဂှ်တှ်ေ နကဵုဟိုတ်ပရေၚ်ဂီုကၠီုဂှ် ဂေတ်ဂေၚ်ဗွဲတၞဟ်ခြာတုဲ အာတ်မိက်ဒၟံၚ်သြန်တံ နွံတုဲ ကောန်ဒပ်ကံၚ်ဇြဳပၞာန်တံ၊ ပၞာန်မၚ်ကွာန်တံ၊ ပျူသဝ်ထဳတံသၟးဟွံက ပံၚ်တောဲကဵု သ္ကိုပ်အုပ်ဓုပ်တံတုဲ အာတ်မိက်ဒၟံၚ်သြန်တံ နွံဂှ် ညးဒေသတံ ဟီုရ။
မွဲလ္ပာ်ဂှ်ပၠန် ကောန်ဒပ်ဗၠာဲသၟိၚ်တံဝွံ ပ္ဍဲအရာအာတ်မိက်သြန် ပ္ဍဲညးဍုၚ်ကွာန်တံ နကဵုနဲကဲနာနာဂှ် ညးဍုၚ်ကွာန်ကဵုသြန်ဟွံမာန်တံဂှ်တှ်ေ ရပ်ဒက်ၜုၚ်တက် တပ်စုတ်ၝောံပိုဒ်နာနာတုဲ ဖျေံဒၟံၚ်ထံၚ်တံ ကၠောန်သ္ပဒၟံၚ်ရ။
စပ်ကဵုကောန်ဒပ်ဗၠာဲသၟိၚ်တံ ရပ်ဒက်အာမိက်ဒၟံၚ်သြန် အတေၚ်အဓမ္မ လ္တူညးဍုၚ်ကွာန်တံ သာ်ဏံဂှ်တုဲ အာတေၚ် ဇရေၚ်ညးတာလျိုၚ် ကံၚ်ဇြဳပၞာန်တံမ္ဂးလေဝ် ပါဲနူဟွံကေတ်အရေဝ်ဂှ် မၞိဟ်အာတေၚ်တံလေဝ် ဒးဒုၚ်ဘပဠဒၟံၚ်တံ နွံဒၟံၚ်ရ။
ပ္ဍဲတွဵုရးဍုၚ်မန်ဂှ် ကောန်ဒပ်ဗၠာဲသၟိၚ်ဂမၠိုၚ် ရပ်စပ်နဲကဲနာနာသာ်တုဲ ရပ်ဒက်အာတ်မိက်ဒၟံၚ်သြန် လ္တူညးဍုၚ်ကွာန်တံကီုလေဝ် ဂဗုတ်ကၠတ်ကွဳလိုန်ဓာတ် က္တဵုဒှ်ဒၟံၚ်အရိုဟ်ဒဒှ်တ္ၚဲတံ မပါလုပ် ဂဗုတ်ကၠတ်ဂၠံက်ပၠံၚ်ၜးတံဂှ်တှ်ေ ထ္မံက်ပ္တိတ်ရပ်ဒက်ကဵုမာန်ဂှ် စဵုကဵုဟွံမွဲ အောန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI