ကအ်ကြိက်၊ နဝ်ဝေမ်ဗာ၇
တွဵုရးကရေၚ် ပွိုၚ်ဍုၚ်ကအ်ကြိက် လ္ပာ်ကွာန်( ရန်ကုတ်) ဗ္ဒါဲဂၠံၚ်ဒဵုဒဝ်ဏတြေံဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ပေါဲဗ္တိုက်ၜါလ္ပာ် က္တဵုဒှ်ဒၟံၚ် ဗွဲမသ္ကာတ်မြဟ်ရောၚ် တမ်ရိုဟ်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူဂိတုနဝ်ဝေမ်ဗာ ၄ တေံရ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဂကောံကွာန် ( ရန်ကုတ်) နွံဗ္ဒါဲဂၠံၚ်ဒဵုဒဝ်ဏတြေံဂှ် နကဵုဇြဟတ်ဒပ်ဗွဲမဂၠိုၚ်ဂၠေၚ်တုဲ က္တဵုဒှ်လဝ် ပေါဲဗ္တိုက်ၜါလ္ပာ် ကုဒပ်ပံၚ်ကောံပၠန်ဂတးတံ ဗွဲမသ္ကာတ်မြဟ်ရ။
ပ္ဍဲဂိတုနဝ်ဝေမ်ဗာ ၄ ဂှ် ဗ္ဒါဲကွာန် ( ရန်ကုတ်) ဂှ် ပေါဲဗ္တိုက်ၜါလ္ပာ် က္တဵုဒှ်လဝ် ကြပ်ကၠိုဟ်တ္ၚဲတုဲ စဵုကဵုဂိတုနဝ်ဝေမ်ဗာ ၆ ဂှ် ဂွံမိၚ်ဒၟံၚ်ဗရုပန်ပှော်လွဟ်ဇၞော်တံဂှ်ဖိုဟ်တုဲ အပ္ဍဲပေါဲဗ္တိုက်ဂှ် ညးဍုၚ်ကွာန်ဒေသ နူကဵုကွာန် ( ရန်ကုတ်၊ ကြောၚ်ရှာကုန်း) တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ် တမ်ရိုဟ်ပရိုၚ်ဒေသတံ ဟီုရ။
ကွာန်( ရန်ကုတ်) ဝွံ နွံဒၟံၚ်ကရပ်ဂၠံၚ်ဒဵုဒဝ်ဏတြေံ သ္ကုတ်သၟဝ်ကျာ ဗ္ဒါဲဍုၚ်ကအ်ကြိက်ဂှ်တုဲ အပ္ဍဲပေါဲဗ္တိုက်ၜါလ္ပာ်ဂှ် ပ္ဍဲကဵုအရာပ် လ္တူဍုၚ်ကအ်ကြိက်လ္ၚဵုတံဂှ်တှ်ေ မကမ်လွဟ်ဇၞော်ဒတုံဗ္တိုဟ်ထ္ကးအာတံ နွံဒၟံၚ်ဂှ်လေဝ် ညးဒေသကအ်ကြိက်တံ သ္ဂးရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန်ဝွံ မွဲဏှမွဲဏှ ပန်ခ္ဍာၚ်ဒၟံၚ်ကဵု လွဟ်ဇၞော် အပ္ဍဲကဵုကွာန် နွံပ္ဍဲပွိုၚ်ဍုၚ်ကအ်ကြိက်တံဂှ်တုဲ ညးဍုၚ်ကွာန်ဒေသ ဇီုကပိုက်ချိုတ် ကလိဂွံအာဝပ်တံလေဝ် နွံဒၟံၚ်ဂှ် လ္ပာ် KNU လလောၚ်ပ္တိတ်လဝ်ပရိုၚ်ရ။
အတိုၚ်ဒပ်ပံၚ်ကောံပၠန်ဂတးဒေသတံ ထ္မံက်ထ္ၜးလဝ်ဂှ်မ္ဂး အပ္ဍဲပွိုၚ်ဍုၚ်ကအ်ကြိက်ဂှ် ပေါဲဗ္တိုက်ကုဒပ်ကံၚ်ဇြဳပၞာန်တံ က္တဵုဒှ်ဒၟံၚ် လၟေၚ်ဒဒှ်တ္ၚဲရောၚ် လလောၚ်ပ္တိတ်လဝ်ရ။
ကံၚ်ဇြဳပၞာန်ဝွံ ပ္ဍဲကဵုဂၠံၚ်သွံရာန်ဗၞိက်ပယျဵု ပွိုၚ်ဍုၚ်ကအ်ကြိက်ကဵု ပွိုၚ်ဍုၚ်ဗြဝတဳ ဆက်စၠောံလဝ်ဂှ် ဂၠံၚ်ပၟိက်ဇၞော် မပ္တံကဵုဂၠံၚ်ဇၞော်အာယှ၊ ဂၠံၚ်ဒဵုဒဝ်ဏတြေံတံကဵု အပ္ဍဲဒေသကြုၚ်ဒဵု၊ သ္ကုတ်သၟဝ်ကျာကအ်ကြိက်တံဂှ် ထ္မံက်ကၠုၚ်လဝ်ပရေၚ်ပၞာန်အံၚ်ဇေယျတုဲ ဂွံကလေၚ်ထိၚ်ဒက် ဗြဝတဳ တေန်ဂါန်ညဳနံၚ်မာန်ဂှ် ဒးပ္တိတ်ကၠုၚ်ဇြဟတ် ဂိတုဗွဲမဂၠိုၚ်ဂၠေၚ်ရ။
လ္ပာ်ဒပ်ကံၚ်ဇြဳပၞာန်ဂှ်တှ်ေ အပ္ဍဲဂိတုတုဲကၠုၚ်တေံ ဂလိုၚ်ပ္တိုန်ဇြဟတ်ဒပ်တုဲ ပလံၚ်ဗစိုပ်ဒၟံၚ် ကောန်ဒပ်စှ်ေနူတန်ဗ္တောန်ကွတ်ပၞာန်တၟိတၟိတံ ဇရေၚ်ကရောၚ်ပၞာန်အံၚ်ဇေယျ စိုပ်ဒၟံၚ်ဂၠံၚ်ဇၞော်အာယှ ကဵု ဂၠံၚ်ဒဵုဒဝ်ဏတြေံ နွံသ္ကုတ်သၟဝ်ကျာဍုၚ်ကအ်ကြိက်ဂှ်ရ။
ဆ္ဂး လ္ပာ်ဒပ်ပံၚ်ကောံ KNLA လေဝ် ဗိုၚ်ကၟာတ်လဒဵုဗ္တိုက်ဒၟံၚ် ကရောၚ်ပၞာန်အံၚ်ဇေယျတုဲ လ္ပာ်ဒပ်ကံၚ်ဇြဳပၞာန် ဒးဂိလဝ်တုဲ ကလိဂွံလဝ် မကမ်လွဟ်ဇၞော်တံရောၚ် လ္ပာ်ဒပ်ပံၚ်ကောံတံ လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
လိက်ဗီု−ဒၞါဲဂၠံၚ်ဒဵုဒဝ်ဏတြေံ မွဲဒၞါဲ