မတ်မလီု၊ နဝ်ဝေမ်ဗာ ၈
မွဲဒမြိပ်ၜဳသက်တိုၚ် မဆက်စပ်ဒၟံၚ်ကဵု ပွိုၚ်ဍုၚ်ကျာ်ထဝ် တွဵုရးဍုၚ်မန်၊ ပွိုၚ်ဍုၚ်ဝဝ် ကေုာံ ပွိုၚ်ဍုၚ်ယှိုဲကျေန် ရးဗဂေါတံဂှ် ကံၚ်ဇြဳပၞာန် ပပဵုပ္တိုန်ကၠုၚ်ဇြဟတ်ဒပ်ဂှ် ညးတာလျိုၚ် ဒပ်ပံၚ်ကောံ ဂကောံဇြဟတ်ပၠန်ဂတးတံ ဟီုရ။
ဒပ်ကံၚ်ဇြဳပၞာန်ဝွံ စနူဂိတုနဝ်ဝေမ်ဗာမံက်တုဲ ပ္ဍဲကဵုသၞေဟ်ကၚ်စၟဳတ်၊ ဗ္ဒိုပ်ဖျေံလဝ်ဒပ် ဗွဲမခိုၚ်ကၠိုက်တံ ကေုာံ ပ္ဍဲကဵုတမ်ဒပ် နွံကရပ်သြၚ်ၜဳသက်တိုၚ်တံဂှ် သၠဲပ္တိုန်ကၠုၚ်ဇြဟတ် ဂၠိုၚ်နူကဵုတြေံတေံရ။
ပ္ဍဲအရာသၠဲပ္တိုန်ဇြဟတ်ဒပ်ဂှ် ပ္ဍဲကဵုသၞေဟ်ကၚ်စၟဳတ်တံဂှ်ဟီုမ္ဂး ဇြဟတ်ဂလိုၚ်ပ္တိုန်ဂှ် ဗၞတ် ၂၀ ၊ ပ္ဍဲကဵုဂကောံဒပ်တမ်ဒပ်တံဂှ်တှ်ေ ထပ်လှဲပ္တိုန်လဝ် ဇြဟတ်ဒပ် ၜိုတ် ၁၀၀ တုဲ ကၠောန်လဝ် ပရေၚ်ပလေဝ်ပလေတ် သွက်ပရေၚ်ပၞာန်တံရ။
ကံၚ်ဇြဳပၞာန် ဂလိုၚ်ပ္တိုန်ကၠုၚ်ဇြဟတ်ဒပ်ဂှ်ဝွံ စပ်ကဵုထ္မံက်ကၠုၚ်မံၚ် ပေါဲဗ္တိုက်သီဍုၚ်တံဂှ်တုဲ သွက်ဂွံထပိုတ်ဂၠံၚ်တံဂှ်ကီု ဟွံသေၚ်မ္ဂး နကဵုဇြဟတ်ဂလိုၚ်ပ္တိုန်ကၠုၚ်လဝ်တံဂှ် သွက်ဂွံထ္ပက်ကရောၚ်ပၞာန် လ္ပာ်တိဍာ်ထိၚ်ဒဝ် PDF တံ ဒှ်မာန်ဂှ် ညးဒုၚ်တာလျိုၚ် ခရိုၚ်သဓီု PDF ကိုဝ်အေမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အတိုၚ်ဂလာန် ဂကောံဇြဟတ်ပၠန်ဂတးတံဂှ်မ္ဂး ပ္ဍဲကဵုကွာန် နွံမွဲဒမြိပ်ၜဳသက်တိုၚ်တံဂှ် လ္ပာ်ကံၚ်ဇြဳပၞာန် ပံက်လဝ်ဗ္ဒိုပ်သၞေဟ်ကၚ် ဗၞတ် ၂၀ တုဲ တမ်ဒပ်ဖျေံလဝ်သ္ဇိုၚ်ခိုၚ်ၚ်ကၠိုက်က်ဂှ် နွံဒၟံၚ် ၄ ရ။
တုဲကၠုၚ် နူဂိတုအံက်တဝ်ဗာ ၃၀ စဵုကဵု ဂိတုနဝ်ဝေမ်ဗာ ၄ ဂှ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ကျာ်ထဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု ၇ ဝါတုဲ ပရေၚ်ဇီုကပိုက်ၜါလ္ပာ်တံ နွံလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ