သ္ဂောံဆဵုဂဗသဳကၠဳကဵု ဂကောံကောဒေံပိဂကောံဂှ် ဒှ်ဒၟံၚ်ဒတုဲရောၚ် က္ဍိုပ်သ္ကိုပ်ပၞာန် ဟီု

နေဗျဳဒဝ်၊ နဝ်ဝေမ်ဗာ ၈

နကဵုဂကောံမဟာမိတ်ကောဒေံပိဂကောံ ယဝ်ရနွံပၟိက်ကဵု ပရေၚ်ၜိုဟ်လလမ် ဗွဲမဍာံပြမ္ဂး နကဵုညးတံ ပံက်လဝ်တြၚ်ပရေၚ်ၜိုဟ်လလမ် လၟိုန်တုဲ ဂွံသဳကၠဳ ဒှ်ဒၟံၚ်ဒတုဲရဂှ် က္ဍိုပ်သ္ကိုပ်ပၞာန် ကဵုလဝ်ပရိုၚ် နူကဵုသ္ကိုပ်ဝန်ဇၞော်ကြုက်မွဲကဆံၚ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞောန် မေန်အံၚ်လှာၚ် စိုပ်ဒၟံၚ်ဍုၚ်ကြုက် သ္ဂောံတိုန်စိုပ်ကောံဓရီုဂှ် ပ္ဍဲဂိတုအံက်တဝ်ဗာ ၆ တေံ အခိၚ်ဆဵုဂဗကဵု သ္ကိုပ်ဝန်ဇၞော်ဍုၚ်ကြုက် မေဿတာ လဳချာန်ဂှ် ဟီုလဝ်ရ။

နကဵု MNDAA, TNLA, AA တံ ယဝ်ရထ္ၜးကၠုၚ်ကမၠောန် ပိုတ်တ်သ္ကုတ်သ္ကုတ် ဒဒှ်ရနွံပၟိက် ကုပရေၚ်ၜိုဟ်လလမ်ဂှ်မှဟေၚ် ရေၚ်တၠုၚ်အာ ပရေၚ်သဳကၠဳတံမာန်ဏောၚ်ဂးတုဲ က္ဍိုပ်သ္ကိုပ်ပၞာန် ဟီုရ။ ဆ္ဂး ကမၠောန်သာ်လဵုရောဟီုဂှ် ဟီုစုတ်လဝ် ဗွဲလစှ်ေ ဂှ် ဟွံမွဲရ။

ဒံက်တာလှကျဝ်ဇြဝ် ညးစိုန်သ္ကီု ပရေၚ်ကြုက်−ဗၟာဂှ် ဒၟါနူမိက်ဂွံကလေၚ်ကေတ်တိဍာ် ဂကောံကောဒေံပိဂကောံတံ သီဂွံလဝ်တံဂှ်တုဲ ကဵုသၠးကၠေံလွဟ်တုဲ က္ဍိုပ်သ္ကိုပ်ပၞာန် ဟီုဒၟံၚ် သ္ဂောံသဳကၠဳကီုလေဝ် လုကဴဒပ်ပၞာန်နွံဒၟံၚ်ဂှ်တှ်ေ ပရေၚ်ၜိုဟ်လလမ် ဒှ်ဟွံမာန်ပုဟ်ဂှ် သ္ၚဳဂၠိပ်လဝ်ရ။

“ပ္ဍဲညး (မေန်အံၚ်လှာၚ်) ဟီုလဝ်ဂှ်တှ်ေ လက္ချန်မိက်ဂွံဂွံ ပရေၚ်ၜိုဟ်လလမ်တံဂှ် လ္ပာ်ဂကောံကောဒေံပိဂကောံတံ ဒးထ္ၜးဏောၚ်။ မိက်ဂွံဂွံအဓိကဂှ်တှ်ေ မိက်ဂွံကလေၚ်ကေတ် တိဍာ်ညးတံ (ကောဒေံပိဂကောံ) သီဂွံလဝ်ဂှ်ဏောၚ်။ မွဲပၠန်ဂှ် ဗီုညးလလောၚ်လဝ်ကၠာတေံဂှ်ရ တိုန်ကၠုၚ်ဝိုၚ်တက်ကျာပရေၚ်ဍုၚ်ကွာန်မ္ဂး သၠးလွဟ်တုဲမှ တိုန်ဂွံဏောၚ်။ ညးဂှ်တှ်ေ ရပ်လဝ်လွဟ် သုၚ်စောဲလွဟ်တံဂှ်တုဲ ကဵုမၞိဟ်သှ်ေဒၟံၚ်တံ ထောံလွဟ်တုဲ ကဵုကၠုၚ်ဂှ်တှ်ေ ညးဂှ်ကၠောန်ရော။ ပရေၚ်ၜိုဟ်လလမ်ဂှ်တှ်ေ လုကဴဒပ်ပၞာန်ဏံ နွံဒၟံၚ်ဂှ် ပရေၚ်ၜိုဟ်လလမ်ဂှ် ဒှ်ဟွံမာန်ပုဟ်” သာ်ဝွံ သ္ဂးရ။

က္ဍိုပ်သ္ကိုပ်ပၞာန် မိက်ဂွံသဳကၠဳပရေၚ်ၜိုဟ်လလမ်ဂှ်တှ်ေ ရပ်စပ်ကၠုၚ်ဝေါဟာ “သၟာပကီုပရာပ်ရပ်လွဟ်” တံဂှ်တုဲ ဟီုကၠုၚ် ကုဂကောံမဟာမိတ်ကောဒေံပိဂကောံတံ စၞးဒးကဵုက္ဍိုပ် အရာမိက်ဂွံဒှ်ဂှ် နွံပၟိက်သ္ဒးကၠောန် အရာမဒှ်ထေက်တံဂှ်ဏောၚ် မဒှ်ရ။

စပ်ကဵုပရေၚ်ပၞာန် ၁၀၂၇ ပ္ဍဲသေံသ္ကုတ်သၟဝ်ကျာဂှ်တုဲ အလဵုအသဳကြုက် လုပ်အကြာပ္ညဳပ္ညပ်တုဲ ကလိဂွံလဝ်တၚ်တုပ်စိုတ်ပရေၚ်ၜိုဟ်လလမ်ကီုလေဝ် ဂကောံကောဒေံပိဂကောံတံ ဝးပ္ကဝ်တၚ်တုပ်စိုတ်တံဂှ်တုဲ ဒဒှ်ရဝေၚ်ကၠုၚ်လဝ်ပေါဲဗ္တိုက်ဂှ် တေၚ်စိုပ်လဝ် ဇရေၚ်အလဵုအသဳကြုက်ရ။

ဂကောံကောဒေံပိဂကောံဂှ်တှ်ေ တၚ်တုပ်စိုတ်ဟိုၚ်ဂေန် ကြုက်လုပ်အကြာပ္ညဳပ္ညပ်တုဲ ၜါလ္ပာ်ထ္ပက်လဝ်စၟတ်တဲဂှ်ဝွံ လ္ပာ်ကံၚ်ဇြဳပၞာန် ဟိုတ်နူဝးပ္ကဝ်လဝ်ဂှ်ရ ပ္ဍဲရးသေံသ္ကုတ်သၟဝ်ကျာဂှ် ပရေၚ်ပၞာန် ၁၀၂၇ သ္ကုတ်ဒုတိယ က္တဵုဒှ်ကၠုၚ်လဝ်ရောၚ် ခၠေဝ်ပလန်လဝ်ရ။

ပရေၚ်ညိၚ်ဝတ် ကၟိန်ဍုၚ်ဗၟာသ္ကုတ်သၟဝ်ကျာဂှ်ဝွံ ပၟိက်ဇၞော်တုဲ သ္ပသ္ဇိုၚ်ကဵု အပ္ဍဲဍုၚ်ကြုက်တုဲ ရေၚ်တၠုၚ်ဒၟံၚ် ညံၚ်ဒတုဲဖဵုဍုၚ်ဗၟာ ဂွံလီုလာ်ဂှ် ဒုၚ်တဲဟွံသေၚ်ပုဟ်ဂှ် သ္ကိုပ်ဝန်ဇၞော်ကြုက် သ္ဂးရ။

နကဵုဍုၚ်ကြုက် ထံက်ဂလာန် ကုလၟေၚ်ကမၠောန်ကံၚ်ဇြဳပၞာန် ၅ တၚ်ဂှ်တုဲ သွက်ဂွံကၠောန်ဗဒှ်ပေါဲရုဲမာဲ ဗွဲမအံၚ်ဇၞးဂှ် ရီုဗၚ်ကဵုမာန်ရောၚ် သ္ကိုပ်ဝန်ဇၞော်ကြုက် ဟီုလဝ်ကဵု က္ဍိုပ်သ္ကိုပ်ပၞာန်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ ကဵုဇြဟတ်ဂရိုဟ် ကုဂကောံကောဒေံပိဂကောံဂှ်တုဲ ကဵုပၞော်တိတ်ပရေၚ်ပၞာန် ကုမေန်အံၚ်လှာၚ်ဏောၚ် တၚ်ဒုၚ်ဂိုၚ်ကေတ်ဏံဂှ်ဝွံ နတဲဏံဂှ်တှ်ေ ဟိုတ်နူပြဝကံၚ်ဇြဳပၞာန်တုဲ ဗီုကြုက်စၟဳလဝ် ဒှ်ကၠုၚ်ဟွံသေၚ်ပုဟ်ဂှ် သ္ၚဳဂၠိပ်လဝ်ရ။

“ကြုက်ဂှ်တှ်ေ ဂကောံကောဒေံပိဂကောံတံ ဂွံဒေါအ်ပၞာန် ဂွံကၠောန်ပေါဲသဳကၠဳပရေၚ်ၜိုဟ်လလမ်ဂှ် ကဵုဇြဟတ်ဂရိုဟ်ဏောၚ်။ မေန်အံၚ်လှာၚ်ဂှ်လေဝ် ဒုၚ်တဲတုဲ ညံၚ်ပရေၚ်ချဳဒရာၚ်ပရေၚ်ပၞာန် လ္ပာ်ဒိုဟ်ဨသာန်တေံ ဂွံဒေါအ်ဒေၚ်အာ ကၠောန်ကဵုမာန်မ္ဂး မေန်အံၚ်လှာၚ် ဂွံအာပၞော်တိတ်ပရေၚ်ပၞာန်ဏောၚ် ဂလာန်ပ္တိုန်ဒုၚ်ဂိုၚ်ကေတ်သာ်ဏံ မံက်တိတ်ကၠုၚ်ရ။ ဆ္ဂး နတဲဏံဂှ်တှ်ေ ဍာ်ဇမၠိၚ်ဂှ် ဗီုကြုက်စၟဳ ဒှ်ကၠုၚ်ဟွံသေၚ်ပုဟ်။ အကာဲအရာဒှ်ကၠုၚ်မာန်ဂှ်လေဝ် ဟွံမွဲပုဟ်။ မူဟိုတ်ရောဟီုတှ်ေ မွဲလ္ပာ်ဏံ လ္ပာ်မေန်အံၚ်လှာၚ် ဟီုဒၟံၚ်အရေဝ်ပရေၚ်ၜိုဟ်လလမ်ကီုလေဝ် လ္ပာ်တေံဂှ် ကလိလောန်ဒၟံၚ် ပရေၚ်ချဳဒရာၚ်ပကီုပရာပ်တံ မသ္ကာတ်မြဟ်ရ” သာ်ဝွံ သ္ဂးရ။

အတိုၚ်တၚ်နၚ် ဇာဇၞိက်ချဳဒရာၚ်စပ်ကဵုအခေါၚ်အရာမၞိဟ် ဖျေံသ္ဇိုၚ်ရးသေံသ္ကုတ်သၟဝ်ကျာဂှ်မ္ဂး အပ္ဍဲပရေၚ်ပၞာန် ၁၀၂၇ ဏံ ဟိုတ်နူပရေၚ်ဗ္တိုက်ကံၚ်ဇြဳပၞာန်တုဲ ပ္ဍဲရးသေံသ္ကုတ်သၟဝ်ကျာဂှ် အပ္ဍဲပွိုၚ်မွဲသၞာံ ကောန်အရာပ် ၃၃၉ တၠ ဒးချိုတ်အာလဝ်ရ။

မွဲလ္ပာ်ဂှ်ပၠန် ဍုၚ် ဂကောံကောဒေံပိဂကောံ သီဂွံလဝ်ဂှ် နွံကၠုၚ် စဵုကဵု ၃၈ ဍုၚ်ဂှ်ရ ညံၚ်ယန္တရယာပရေၚ်အုပ်ဓုပ်အပ္ဍဲဒေသတံ ဂေတ်ဂြိပ်ဟွံဂွံဂှ် ပ္ဍဲကဵုဍုၚ်လ္ၚဵုတံဂှ်တှ်ေ ကံၚ်ဇြဳပၞာန် ဆက်ကၠောန်သ္ပဒၟံၚ် ပရေၚ်ဗ္တိုက်ပၞာန်ကျာတံရ။

စပ်ကဵုဂကောံသ္ကုတ်သၟဝ်ကျာတံ ထိၚ်ဒက်ဂွံလဝ် သၞေဟ်ကၚ်သွံရာန်ဗၞိက် နွံပယျဵုကြုက်−ဗၟာဂှ်တုဲ ကမၠောန်ဟွံလုပ်သၞောဝ် ပရေၚ်သွံရာန်ဟွံလုပ်သၞောဝ် မဒှ်အထံက်အပၚ် ကုဂကောံရပ်လွဟ် ပ္ဍဲပယျဵုတံဂှ် ဒးဗ္တိုက်သရိုဟ် ဒးပသောၚ်အာဏောၚ်ဂှ် က္ဍိုပ်သ္ကိုပ်ပၞာန် သ္ဂးရ။

အခိၚ်လၟုဟ်ဂှ်လေဝ် လ္ပာ်အလဵုအသဳကြုက် ကၟာတ်လဒဵုလဝ် သၞေဟ်ကၚ်သွံရာန်ဗၞိက်ၜါဍုၚ် ဂကောံသၟဝ်ကျာ မဒစဵုဒစးပၠန်ဂတးဒၟံၚ် ကုကံၚ်ဇြဳပၞာန်တံ ထိၚ်ဒက်ဂွံလဝ် ပ္ဍဲကဵုကချေၚ်ကဵု ပ္ဍဲကဵုရးသေံသၟဝ်ကျာဂှ်ရ။

ဒေသသ္ကုတ်သၟဝ်ကျာ ပယျဵုကြုက်−ဗၟာဂှ်ဝွံ သွက်တၚ်နွံပၟိက်သ္ဇိုၚ် မပ္တံကဵုပၟတ်ဓာတ်လလဳ၊ ဇွောံမစၞစ၊ ဂဥုဲဇဗ၊ ကၠေၚ်စၞပၟတ်၊ ကပေါတ်အရပ်စပ်မၞိဟ်တံဂှ် ဒးသ္ပပဓာန်ဒၟံၚ် ဍုၚ်ကြုက်ရ။

ဒံက်တာလှကျဝ်ဇြဝ်ဂှ်တှ်ေ လ္ပာ်ဗဟဵု ကၟာတ်လဒဵုလဝ် သၞေဟ်ကၚ်ပယျဵုတံကီုလေဝ် ညးသွံရာန်ဒၟံၚ်ဗၞိက်ပ္ဍဲကဵုဒေသတံဂှ်တှ်ေ နကဵုဓဝ်ကၠိုဟ်ခၠၚ် ကၠောန်ကၠုၚ်မာန်ဏောၚ်ဂှ် ဟီုလဝ် လညာတ်ညးရ။

“ကၟာတ်ဂှ်တှ်ေ ဆက်ကၟာတ်ဒၟံၚ်ဏီဏောၚ်။ ကၟာတ်လဝ်သၞေဟ်ကၚ်တံဂှ်ကီုလေဝ် ညအ်ဂှ် လ္ပာ်ဗဟဵုတေံရ ကၟာတ်လဝ်။ အေ ဂှ်တှ်ေ ရဲဒေသတံဂှ်တှ်ေ နကဵုဓဝ်ကၠိုဟ်ခၠၚ် မၞိဟ်ကၠောန်ဒၟံၚ် ကမၠောန်သွံရာန်ဗၞိက် ဒေသလ္ပာ်တေံ လ္ပာ်ဏံတံဂှ်တှ်ေ ဖအောန်ဖျေံ အရာမတေၚ်ဂြတ်တံဂှ်တုဲ ကၠောန်ကၠုၚ်မာန်ဏောၚ် ထေၚ်ကေတ်ရ။ ပဵုနူဏံတုဲ သ္ဇက်ဂွံကၟာတ်ဂှ် ဟွံမွဲပုဟ်” သာ်ဝွံ သ္ဂးရ။

သ္ကိုပ်ဝန်ဇၞော်ကြုက်ဂှ်တှ်ေ သၞေဟ်ကၚ်ပယျဵုၜါဍုၚ်ဂှ်ဝွံ ဒးနွံသၟဝ်ပရေၚ်ကောပ်ကာဲ အလဵုအသဳဏောၚ်တုဲ သွက်ဂွံကောပ်ကာဲဍိုက်က်ပေၚ်ၚ်မာန် ဆက်ရေၚ်တၠုၚ်အာဏောၚ် ဒဒှ်ရဟီုလဝ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။

ပ္ဍဲကဵုပရေၚ်ပၞာန် ၁၀၂၇ သ္ကုတ်ဒုတိယ ဂကောံမဟာမိတ်ကောဒေံပိဂကောံဂှ် ကံၚ်ဇြဳပၞာန်တံ ဒးဂိအာလဝ်ဂှ် MNDAA ကေုာံ TNLA သီဂွံလဝ် ဌာန်ဂအုပ်ပၞာန်ရးမွဲကဵု ဍုၚ်သှ်ေဒၟံၚ် ပ္ဍဲကဵုရးသေံသၟဝ်ကျာတံဂှ် အလဵုအသဳကြုက် ကဵုကၠုၚ်လဝ်ဇြဟတ်ဂရိုဟ် သွက်ဂွံဒေါအ် ပေါဲဗ္တိုက်ရ။

ဟိုတ်နူဇြဟတ်ဂရိုဟ်တုဲ MNDAA ဂှ်တှ်ေ ပ္ဍဲကဵုပရေၚ်ပၞာန်ပရေၚ်ဍုၚ်ကွာန်ဂှ် ပံၚ်တောဲကဵု NUG ကီု၊ သၠဲပ္တိုန်ဗလးတိပၞာန်တံဂှ် ကၠောန်အာဟွံသေၚ်ပုဟ်ဂှ် လလောၚ်တြးလဝ် တၚ်ဒတူလိုၚ်လစွံစိုတ်တုဲ TNLA ကဵု AA ဂှ်တှ်ေ အတိုၚ်အစဳဇန်တမ်မူလတေံဂှ် ဆက်ချဳဒရာၚ်ဒၟံၚ်ရ။

ဒဝ်ဇြေန်မာအံၚ် ဝန်ဇၞော်ကာဍုၚ်သ္အာၚ်၊ အလဵုအသဳညဳသၟဟ်ဂကူ NUG ဂှ်တှ်ေ ဟိုတ်နူဇြဟတ်ဂရိုဟ်အလဵုအသဳကြုက် လ္တူဂကောံမဟာမိတ်ကောဒေံသ္ကုတ်သၟဝ်ကျာတံဂှ်တုဲ ဂၠံၚ်တရဴပၠန်ဂတး ပြံၚ်လှာဲအာဟွံသေၚ်ပုဟ်ဂှ် ဟီုလဝ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၅ တေံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media/MOI