ဘာပန်၊ နဝ်ဝေမ်ဗာ ၁၀
ဂြောဝ်ဂတာကောန်ပၞာန် နွံပ္ဍဲဗျူဟာပၞာန်ဘာပန် နူကဵုဒပ်ပံၚ်ကောံပၠန်ဂတး KNLA တံ ဗိုၚ်ကၟာတ်လဒဵုလဝ်ဂှ် ဒပ်ကံၚ်ဇြဳပၞာန် ဟွံကဵုအခေါၚ်တိတ်မ္ၚးပုဟ်ဂှ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော်သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဌာန်ဂအုပ်တမ်ဒပ် ကေုာံ ဗျူဟာပၞာန် ဒပ်ကံၚ်ဇြဳပၞာန် ဗွဲဒိုဟ်သၠုၚ်ကျာ ဍုၚ်ဘာပန် တွဵုရးကရေၚ်တံဂှ် အပ္ဍဲဂိတုမာတ် တုဲကၠုၚ်တေံ ဒပ်ပံၚ်ကောံမဟာမိတ်ပၠန်ဂတး သၟဝ်သ္ကိုပ်သ္ကဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ ဗိုၚ်ဗ္တိုက်လဝ်တုဲ သီဂွံလဝ် တမ်ဒပ် ၃ ပါလုပ်သီုကဵု ခလရ ၁၉၊ ခမရ ၄၃၄ တံရ။
အခိၚ်လၟုဟ် ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဆက်ကၟာတ်လဒဵုဗ္တိုက်ဒၟံၚ် တမ်ဒပ် ခမရ ၃၄၀၊ ခမရ ၃၄၁ နွံဗ္ဒါဲဗျူဟာပၞာန်ဂှ်ကဵု ဗျူဟာပၞာန်ဘာပန်တံဂှ်တုဲ ဂြောဝ်ဂတာကောန်ပၞာန် နွံအပ္ဍဲဗျူဟာပၞာန်တံဂှ် ဒပ်ကံၚ်ဇြဳပၞာန် ပတေၚ်ဓရတ်လဝ်တုဲ ဟွံကဵုအခေါၚ်တိတ်မ္ၚးပုဟ်ဂှ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ဗျူဟာဘာပန် နူကဵုဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကၟာတ်ဗိုၚ်လဝ်ဂှ် ညံၚ်ဟွံဂွံစှ်ေအာဂှ် လ္ပာ်ဒပ်ကံၚ်ဇြဳပၞာန် ဗ္တိုက်တဝ်စၞေဟ်ဒၟံၚ် ဗွဲမသ္ကာတ်မြဟ်တုဲ နူကဵုပၞာန်ကျာဂှ်လေဝ် ကၠုၚ်စိုပ်ဘိုၚ်ပန်ကဵုဒၟံၚ်တုဲ ကၠုၚ်စိုပ်ဖျေံကဵု ကပေါတ်ဇွောံမလွဟ်လက်နက်တံဂှ်လေဝ် ကၠောန်သ္ပဒၟံၚ် ဟွံပိုတ်သ္ကုတ်ရ။
သ္အာၚ်နူဂှ်ပၠန် စွံပွန်ကဵုလ္တူညးဍုၚ်ကွာန်ကောန်အရာပ်တံတုဲ ဒပ်ကံၚ်ဇြဳပၞာန် ကၠောန်သ္ပဗ္တိုက်ဒၟံၚ်ပၞာန်ကျာ ကေုာံ ကဵုလွဟ်ဇၞော် အပ္ဍဲကွာန် မၞုံပ္ဍဲခရိုၚ်ဘာပန်တံဂှ်တုဲ ကောန်အရာပ်ဟွံအောန်နူကဵု ၃ တၠ ဇီုကပိုက်ချိုတ်လဝ်တုဲ ကလိဂွံဝပ်တံလေဝ် နွံတုဲ စမြိုၚ်သ္ၚိဒၟံၚ် လီုလာ်တံလေဝ် နွံလဝ်ရ။
တုဲကၠုၚ် ပ္ဍဲဂိတုအံက်တဝ်ဗာ ၂၉ တေံ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဗ္တိုက်သီလဝ် ဗ္ဒိုပ်ဒပ်(ခေါပုတ်) မဒှ်ပၟိက်ဇၞော်သွက်ပရေၚ်ပၞာန် မၞုံပ္ဍဲခရိုၚ်ဘာပန်ဂှ်တုဲ ရပ်ဂွံလဝ်ကောန်ဒပ်ကံၚ်ဇြဳပၞာန်တံနွံတုဲ မကမ်လွဟ်လက်နက်ဗွဲမဂၠိုၚ်ဂၠေၚ်လေဝ် သီဂွံလဝ်ရ။
အပ္ဍဲပေါဲဗ္တိုက်သီဗ္ဒိုပ်(ခေါပုတ်) ပ္ဍဲကဵုတမ်ဒပ်ဖျေံသ္ဇိုၚ်ဍုၚ်ဘာပန် မၞိဟ်ရပ်ဂွံလဝ်ဂမၠိုၚ် ပါလုပ်သီုကဵုသ္ကိုပ်ဒပ်ပါ် ၃ တၠကဵု သ္ကိုပ်ဂဥုဲမွဲတၠ အပံၚ်ဖအိုတ် ၁၇ တၠဂှ် လွဳလွတ်ကဵုဒၟံၚ်ဂှ်လေဝ် ဒပ်မဟာ ၅ ကဵုလဝ်သမ္တီရ။
သီဂွံလဝ် ဗ္ဒိုပ်ဒပ်(ခေါပုတ်) ဂှ်တုဲ ပ္ဍဲကဵုတိဍာ်ဒပ်မဟာ ၅ ခရိုၚ်ဘာပန်ဂှ် ဗ္ဒိုပ်ဒပ်ကံၚ်ဇြဳပၞာန် သှ်ေဒၟံၚ် ၜိုတ် ၁၀ ရတုဲ ဗ္ဒိုပ်ဒပ်သှ်ေဒၟံၚ်ဂမၠိုၚ် ဗျူဟာဘာပန်ကဵု တမ်ဒပ် ၂ တံဂှ် ဒပ်ပံၚ်ကောံပၠန်ဂတးတံ ဗိုၚ်ကၟာတ်လဒဵုလဝ်တုဲ ဂၠံၚ်ပလံၚ်ဗစိုပ်ဇွောံမ ဂၠံၚ်လုပ်ဂၠံၚ်တိတ် ဗ္ဒိုပ်ဒပ်တၞဟ်သ္အာၚ်တံဂှ်လေဝ် ထပိုတ်လဝ်ရ။
အတိုၚ်တၚ်လလောၚ်တြး ဌာန်ဂအုပ် ဒပ်မဟာ ၅ KNLA ဂှ်မ္ဂး အပ္ဍဲဂိတုအံက်တဝ်ဗာဏံ က္တဵုဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန် ၁၃၀ ဝါပြၚ်တုဲ လ္ပာ်ကံၚ်ဇြဳပၞာန် ဗ္ဒါဲ ၆၀ တၠ ဇီုကပိုက်ကလိဂွံဝပ်ပြဟ်လလုဲအာတံ နွံလဝ်တုဲ သီဂွံလဝ် ဗ္ဒိုပ်ဒပ်မွဲရ။
ပရိုၚ်−သြၚ်လောန်တိုၚ်(မ်)
ဗီု−PDF ဘာပန်