မတ်မလီု၊ နဝ်ဝေမ်ဗာ ၁၂
ပ္ဍဲတွဵုရးဍုၚ်မန် အပ္ဍဲကာလသြောံတိတ်သၞာံဏံဂှ် သြောံၚုဟ်ဟွံခိုဟ်ကီု၊ ဒမြိပ်တိတ် စှ်ေကၠုၚ်တီတီကီုတံဂှ်တုဲ ဒးဆေၚ်ဒၟံၚ်မုက်ကဵု ပရေၚ်ကျဗြံတံရောၚ်ဂှ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၟာဗ္ၚဂမၠိုၚ်ဝွံ အခိၚ်ကၠောန်သြောံဂှ် ၚုဟ်ခရိတ်အိုတ်နာနာ ပါလုပ်သီုကဵုကပေါတ်တမ်ရိုဟ် မပ္တံကဵုဝါဲတံ ၚုဟ်သၠုၚ်တိုန်ဒၟံၚ် ကဵုဆကီု၊ ဗြဲဂူဟွံသေၚ်ကဵုအခိၚ်အခါကီု၊ သီုကဵုဒးစၟတံဂှ်တုဲ သြောံဗွဲမဂၠိုၚ် ဒးဂဗလဝ်ကဵု ပရေၚ်ဇီုကပိုက်လီုလာ်တံရ။
ဆ္ဂး အခိၚ်သြောံတိတ်ဏံ ၚုဟ်သြောံဂှ် ၜိုတ်ထေၚ်လဝ်ဂှ် ဟွံဂွံၚုဟ် ဒးဒုၚ်ဍဵုမံၚ်ကီု၊ ခရိတ်ရတ်သီတံအိုတ်ဂၠိုၚ်ဒၟံၚ်တုဲ သၟာဗ္ၚဗွဲမဂၠိုၚ် ဒးဆေၚ်ဒၟံၚ်မုက်ကဵု ကျဗြံတံရ။
ၚုဟ်သြောံဂှ်လေဝ် သြောံလုပ်ဂကောံသ္ၚုကြံၚ် ၁၀၀ နဂှ် ဂွံဒၟံၚ်ၚုဟ် ၁၆ ကိုဋ်ပြၚ်၊ သြောံလုပ်ဂကောံသ္ၚုတဲခိုဟ် ၁၀၀ နဂှ် ဂွံဒၟံၚ်ၚုဟ် ၜိုတ် ၂၂ ကိုဋ်ဒ္ကေဝ်ဓဝ်ဂှ်ရ သၟာဗ္ၚဂမၠိုၚ် ယာက္ဍိုပ်ဟွံမာန် ဒှ်ဒၟံၚ်ရ။
သၟာဗ္ၚမွဲတၠဂှ်တှ်ေ ဟိုတ်နူၚုဟ်သြောံလၟုဟ်တုဲ အောန်အိုတ် နူ ၂၅ တၟံကၠံ စဵုကဵု ၅၀ တၟံကၠံ ကျမာန်ဂှ် ဟီုရ။
သၟာဗ္ၚဂမၠိုၚ်ဝွံ အပ္ဍဲအခိၚ်ကာလသီအဝဵုဏံ ဟိုတ်နူၚုဟ်ကပေါတ်ဗၞိက်တမ်ဂမၠိုၚ် ပါလုပ်သီုကဵုခရိတ်သၟာကမၠောန်တံ ဇၞော်သၠုၚ်ဒၟံၚ်တံဂှ်တုဲ တိဗ္ၚမွဲဨကမ္ဂး ခရိတ်အိုတ်ပရေၚ်တဵုလွဳဂှ် ဒတုံဒၟံၚ် ၁၁ ကိုဋ်ဒ္ကေဝ်ပြၚ်ရ။
ဆ္ဂး ပ္ဍဲသၞာံဏံ ဟိုတ်နူရာသဳဥတုဖံက်ပၠန် သီုကဵုဒးစၟတံဂှ်တုဲ ဗ္ၚမွဲဨကတှ်ေ ဂၠိုၚ်အိုတ် တိတ်ဒၟံၚ် နူ ၄၀ နကဵု ၜိုတ် ၅၀ နရတုဲ ဝါလ္ၚဵုတံဂှ်တှ်ေ မွဲဨက သြောံတိတ်ဒၟံၚ် ၜိုတ် ၂၅ နရဂှ် သၟာဗ္ၚဂမၠိုၚ် ဟီုအိုတ်ရ။
သၟာဗ္ၚမွဲတၠပၠန်ဂှ်လေဝ် အခိၚ်ဒမြိပ်သြောံတိတ် စှ်ေဒၟံၚ်ဏံ ၚုဟ်သြောံလေဝ်ဟွံခိုဟ်တုဲ သၟာဗ္ၚဂမၠိုၚ် ယာက္ဍိုပ်ဟွံမာန် ဒှ်ဒၟံၚ်ရောၚ် ဟီုရ။
တွဵုရးဍုၚ်မန်ဝွံ ဒှ်တွဵုရး တိဨကဝါဗ္ၚတဵုလွဳဒၟံၚ်သြောံတံ နွံဒၟံၚ် ဗ္ဒါဲထပှ်ကိုဋ်မွဲတုဲ လၟေၚ်သၞာံ သြောံတိတ်ဒၟံၚ် ၄၃၀ ကိုဋ်နပြၚ်ရ။
ဆ္ဂး ပ္ဍဲကဵုသၞာံဏံ ဟိုတ်နူဒးအာလဗိုတ်ကျာတိုၚ်ဝှောန်ယာဂဳကီု၊ ဟိုတ်နူဗြဲဂူ ဟွံသေၚ်ကဵုအခိၚ်အခါတံဂှ်ကီု၊ သီုကဵုဒးစၟတံဂှ်တုဲ ဒမြိပ်သြောံတိတ် စှ်ေကၠုၚ်တီတီမာန်ဏောၚ်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ