ဗော်ဍုင်မန်တၟိ AD ကလေၚ်ဗလးကဵု မာန်နေဂျာ မပါလုပ် မၞိဟ်ပိတၠ နူကဵုရုၚ်စက်ဆုမုဟ်ဍုၚ်

မုဟ်ဍုၚ်၊ နဝ်ဝေမ်ဗာ ၁၃

ညးယိုက်ဝန်ပိတၠ ပါလုပ်သီုကဵုမာန်နေဂျာ ရုၚ်စက်ဆု (ဟွန်ဒါမြန်မာ) မရပ်ဒက်လဝ်ဂှ် ကြဴနူပ္ညဳပ္ညပ်သဳကၠဳတုဲဂှ် ကလေၚ်ဗလးကဵုလဝ်ယျဂှ် ညးမၞုံအခေါၚ်ဟီုဂး ဗော်ဍုၚ်မန်တၟိ NMSP AD နာဲဗညာမန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဝွံ တုဲကၠုၚ်ဂိတုနဝ်ဝေမ်ဗာ ၆ တေံ ကၠုၚ်စိုပ်ရပ်ကော်ဏာလဝ် ညးယိုက်ဝန်ပိတၠ ပါလုပ်သီုကဵုမာန်နေဂျာ ရုၚ်စက်ဆု (ဟွန်ဒါမြန်မာ) ပ္ဍဲကွာန်ကျာ်ရဲ ပွိုၚ်ဍုၚ်မုဟ်ဍုၚ် တွဵုရးဍုၚ်မန်ဂှ်ရ။

ဗော်ဍုၚ်မန်တၟိ NMSP AD ဝွံ ကမၠောန်ပရေၚ်ပိုန်ဒြပ် နွံပ္ဍဲဒေသမန်တံသီုဖအိုတ် သွက်ဂွံကေတ်အဆက် ဟီုလဝ်ကီုလေဝ် ရုၚ်စက်ဆု(ဟွန်ဒါမြန်မာ) ဟွံကလေၚ်ပရိုၚ်တုဲ သွက်ဂွံပ္ညဳပ္ညပ်သဳကၠဳဂှ် ရပ်ဒက်လဝ် ညးတံပိတၠရ။

ကြဴနူဂှ်တုဲ ကြဴနူပ္ညဳပ္ညပ်သဳကၠဳကဵု ညးတံပိတၠတုဲဂှ် ပ္ဍဲဂိတုနဝ်ဝေမ်ဗာ ၉ ဂှ် ကလေၚ်ပလံၚ်ဖျဴလဝ်ညးတံ ခိုဟ်ဟ်သန်န်ဂှ် နာဲဗညာမန် သ္ဂးရ။

ကြဴနူဒးဒုၚ်ရပ်ဒက်တုဲ ညးမကလေၚ်ဗၠးကၠုၚ်ဂမၠိုၚ်ဂှ် သ္ကိုပ်ရုၚ်စက် ဥူဗိုဝ်ဝ်၊ မာန်နေဂျာ ဥူတေန်ထောန်အံၚ် ကေုာံ တၠပညာ ကောန်ဍုၚ်ကြုက်မွဲတၠ၊ အပံၚ်ဖအိုတ် ပိတၠ ပါလုပ်ရ။

ညးတာလျိုၚ် ရုၚ်စက်ဆု (ဟွန်ဒါမြန်မာ)တံ ဒးဒုၚ်ရပ်ဒက်တုဲဂှ် ပပ္တံနူဂိတုနဝ်ဝေမ်ဗာ ၇ တုဲ လ္ပာ်ဒပ်ကံၚ်ဇြဳပၞာန် ဂၠိုက်ဂၠါဲကၠုၚ် နူကဵုကွာန်ကျာ်ရဲ မွဲဒမြိပ်ဒဵုလက်ခတ်ဂှ်ရ။

အခိၚ်လၟုဟ် ဒပ်ကံၚ်ဇြဳပၞာန်ဝွံ ကော်သၟာန်သၟုက်ဒၟံၚ် ညးယိုက်ဝန်ပိတၠ မကလေၚ်ဗၠးကၠုၚ်တံဂှ်ရောၚ် ဂွံတီကေတ် နူကဵုညးမစုက်လုက်ကဵု ရုၚ်စက်တံရ။

ဗော်ဍုၚ်မန်တၟိ NMSP AD ပါ်တိတ်ကၠုၚ် နူကဵုဗော်ဍုၚ်မန်တၟိ NMSP ဂှ်ဝွံ ပံၚ်တောဲကဵု ဂကောံဇြဟတ်ပၠန်ဂတး အပ္ဍဲဒေသတံတုဲ ဒှ်ဂကောံမန်ရပ်လွဟ် ပၠန်ဂတးဒၟံၚ် ကံၚ်ဇြဳပၞာန်မွဲဂကောံကီုရ။

ပရိုၚ်−သြၚ်လောန်တိုၚ်(မ်) 

ဗီု−NMSP-AD