လ္ဂုၚ်၊ နဝ်ဝေမ်ဗာ ၁၉
ပပ္တံနူဂိတုနဝ်ဝေမ်ဗာ ၁၈ တုဲ ရုၚ်ကလုတ်ကြုက် စပ်ကဵုဍုၚ်ဗၟာ လလောၚ်တြးကၠုၚ် ဒဒှ်ရကဵုအာဝဳဇြာ အခေါၚ်မံၚ်စံၚ် တြဴဂိတု ကုသၟာဗၞိက်ပရေၚ်ပိုန်ဒြပ် နူကဵုဍုၚ်ဗၟာတံကဵု ကောန်ဇာတ်သမ္ဘာညးတံ မဒှ်ရ။
ဝဳဇြာကဵုလဝ်အခေါၚ်ဂှ်ဝွံ ဒှ်ဂကူဝဳဇြာပွိုၚ်မသုန်သၞာံ လုပ်တိတ်အာကၠုၚ်ဍုၚ်ကြုက် ဂၠိုၚ်ၚ်ကဵုဝါဂွံ (Multiple Entry) ဒှ်ဂကူဝဳဇြာအာယုက်ဂၠိၚ်အိုတ်တုဲ ဟိုတ်နူဒှ်ဝဳဇြာ လာန်ချာန်−မေဝ်ခံၚ်တုဲ ဍုၚ်သေံ၊ ဍုၚ်လာအိုဝ်၊ ဍုၚ်ဝဳယေတ်နာမ် ကေုာံ ဍုၚ်ကာမ္ဗောဒဳယျာတံလေဝ် ပါလုပ်ရ။
ဒံက်တာလှကျဝ်ဇြဝ် ညးစိစောန်ပရေၚ်ကြုက်−ဗၟာဂှ်တှ်ေ နကဵုဍုၚ်ကြုက် ကဵုကၠုၚ်ဝဳဇြာ ကုကၟိန်ဍုၚ်အပ္ဍဲဒေသမေဝ်ခံၚ်တံဂှ်ဝွံ ကၠောန်ဒၟံၚ်ညံၚ်ပရေၚ်ပိုန်ဒြပ် ဂွံကလေၚ်တိုန်ပၠန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဍေံဂှ်တှ်ေ သွက်ကဏ္ဍအာတရဴ Tourism ဂှ် ညံၚ်မၞိဟ်ဂွံကၠုၚ်ဂၠိုၚ်ရဏောၚ်။ ညံၚ်ပရေၚ်ပိုန်ဒြပ်ဂွံတိုန် ဒၞါဲကၠောန်ညအ်ဂှ် ဖျေံဒၟံၚ် နဒဒှ်ပဝ်လသဳမွဲ တၟာလအ်ယျ။ ကၠောန်ဒၟံၚ် နူကဵုတမ်ကညၚ်တေံရဏောၚ်” သာ်ဝွံ သ္ဂးရ။
ပ္ဍဲကဵုကောံဓရီု ပရေၚ်ပံၚ်တောဲပရေၚ်ပိုန်ဒြပ် ဒေသပါ် မဟာမေဝ်ခံၚ် မရနုက်ကဵု ၈ ဝါ မကၠောန်ဗဒှ်လဝ် ပ္ဍဲဂိတုနဝ်ဝေမ်ဗာ ၇ ဂှ် သ္ကိုပ်ဝန်ဇၞော်ကြုက် မေဿတာ လဳချာန် သ္ဂုတ်သွာတ်လဝ် သွက်ဂွံပ္တိတ်ကဵု ဝဳဇြာလာန်ချာန်−မေဝ်ခံၚ် သွက်ဍုၚ်ၜဳမေဝ်ခံၚ် ၅ ဍုၚ်ဂှ်ရောၚ် ဟီုလဝ်ရ။
သ္အာၚ်နူဂှ်ပၠန် ရပ်စပ်ကၠုၚ်ဒတုဲကၟဝ် မဒှ်အထံက်အပၚ်ပရေၚ်ပိုန်ဒြပ် ကုကၟိန်ဍုၚ်အပ္ဍဲဒေသတံဂှ်တုဲ ပ္ဍဲကဏ္ဍနာနာ ပရေၚ်ပံၚ်တောဲရေၚ်တၠုၚ် မစှ်ေကဵုနတဲတံဂှ် ညံၚ်ဂွံဇြိုဟ်နက် ဒးက္ဍိုက်ပ်ဏောၚ်ဂှ် သ္ဂးရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် ကြုက် ကဵုကၠုၚ်အခေါၚ်မံၚ်စံၚ် ကုသၟာပရေၚ်ပိုန်ဒြပ်တံဂှ်ကီုလေဝ် ဟိုတ်နူကၟာတ်လဝ်ပယျဵုတံဂှ်တုဲ ပရေၚ်ပိုန်ဒြပ် သ္ဇက်ဂွံတိုန်ကၠုၚ် ဟွံမွဲပုဟ်ဂှ် သ္ၚဳဂၠိပ်လဝ်ရ။
“’ပ္ဍဲကဵုဍုၚ်ကြုက်ဂှ် ကဵုလဝ်အခေါၚ်ကၠုၚ်စိုပ်မံၚ်တန်တဴတံ အခေါၚ်ကၠောန်ကလောန်တံတုဲ ပရေၚ်ပိုန်ဒြပ်ဂှ် ဟွံတောတက်ကၠုၚ်ပုဟ်။ မူဟိုတ်ရောဟီုတှ်ေ ပယျဵုသီုဖအိုတ်ဂှ် ညးတံ ကၟာတ်လဝ်တုဲ အခိၚ်ကၠောန်ဒၟံၚ် ပရေၚ်ထပိုတ် ၅ ထပိုတ် စပ်ကဵုပရေၚ်ပိုန်ဒြပ်တံဂှ် ပရေၚ်ပိုန်ဒြပ် ဂွံစှ်ေကၠုၚ်ဂှ်ရနွံ။ ဂွံတောတက်ကၠုၚ်ဂှ် ဟွံမွဲပုဟ်ဂှ် သ္ၚဳဂၠိပ်လဝ်ရ” သာ်ဝွံ သ္ဂးရ။
သၞေဟ်ကၚ်ပရေၚ်သွံရာန်ဗၞိက် နူကဵုဂကောံရပ်လွဟ်ကောန်ဍုၚ်အရၚ်သ္ကုတ်သၟဝ်ကျာ ဗ္တိုက်ဒၟံၚ်ကံၚ်ဇြဳပၞာန်တံ မထိၚ်ဂွံလဝ် ပ္ဍဲကဵုပယျဵုကြုက်−ဗၟာ ပ္ဍဲကချေၚ်ကဵု ရးသေံသၟဝ်ကျာတံဂှ် လ္ပာ်အလဵုအသဳကြုက် ကၟာတ်လဝ်ရ။
အတိုၚ်တၚ်လလောၚ်တြး ကံၚ်ဇြဳပၞာန်ဂှ်မ္ဂး သၞေဟ်ပယျဵုၜါဍုၚ်ဂှ်ဝွံ ဒးနွံသၟဝ်ပရေၚ်အလဵုအသဳ ကောပ်ကာဲဂှ်ဏောၚ်တုဲ သွက်ဂွံကောပ်ကာဲအာ ဍိုက်က်ပေၚ်ၚ်မာန်ဂှ် ဆက်ရေၚ်တၠုၚ်အာဏောၚ်ဂှ် သ္ကိုပ်ဝန်ဇၞော်ကြုက် အခိၚ်ဆဵုဂဗကဵု က္ဍိုပ်သ္ကိုပ်ပၞာန်ဂှ် ဟီုလဝ်ရ။
မွဲလ္ပာ်ဂှ်ပၠန် ပ္ဍဲဂိတုနဝ်ဝေမ်ဗာ ၁၄ ဂှ် ညးတာလျိုၚ်ၜါဍုၚ် ထ္ပက်လဝ်စၟတ်တဲလိက်စၟတ်သမ္တီ သွက်ဂွံဒက်ပ္တန် ဍုၚ်ပရေၚ်ဆာန်ကၟိန် အကြာဍုၚ်ဗၟာ ဍုၚ်ဗကာံဂှ်ကဵု ဍုၚ်ကြုက် ဍုၚ်လေအ်ယှာန် မဒှ်ရ။
အတိုၚ်လိက်စၟတ်သမ္တီဂှ်မ္ဂး အကြာၜါဍုၚ်ဏံ ပ္ဍဲကဵုကဏ္ဍအာတရဴ ကေုာံ ကဏ္ဍပရေၚ်ဖောအ်ဗြေဝ်တောတက် ပရေၚ်ပိုန်ဒြပ် ပါလုပ်သီုကဵုပရေၚ်ယေန်သၞာၚ်တံဂှ် သ္ဂောံပံၚ်တောဲလှာဲဂတးညးသ္ကအ်မာန်ဂှ် ဒှ်ပရေၚ်ပံၚ်တောဲရေၚ်တၠုၚ်ပၟိက်ဇၞော်မွဲရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−Myanmar Trend