ဍာ်ဗု၊ နဝ်ဝေမ်ဗာ ၂၆
အပ္ဍဲကဵုပေါဲဗ္တိုက် မက္တဵုဒှ်ဒၟံၚ် ပ္ဍဲပွိုၚ်ဍုၚ်ဍာ်ဗု ရးတၞၚ်သဳဂှ် ၜါလ္ပာ်ဇီုကပိုက်ချိုတ်အာတံ နွံဒၟံၚ်တုဲ ဟိုတ်ဟွံမွဲမွဲသာ် လ္ပာ်ကံၚ်ဇြဳပၞာန် ပန်ဂစိုတ်ဏာလဝ် ညးဍုၚ်ကွာန်ကောန်အရာပ်မွဲတၠဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ဒပ်ကံၚ်ဇြဳပၞာန် ဇြဟတ်ဒပ် ၁၀၀ ပြၚ်ပါဂှ်ဝွံ ပ္ဍဲဂိတုနဝ်ဝေမ်ဗာ ၂၄ အခိၚ်နူဂယး ၜိုတ် ၈ နာဍဳဂှ် နူကဵုကွာန်(ပိန်းရှောင်) ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲကဵုကွာန် (ကျော်ဝပ်ကုန်း) တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲပွိုၚ်ၜါနာဍဳဂှ် လ္ပာ်ကံၚ်ဇြဳပၞာန် ဟွံအောန်နူကဵု ၁၀ တၠ ဇီုကပိုက်ချိုတ်လဝ်တုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးဂှ် ကောန်သ္ဂံၚ် ဖျဵုကျဝ်တူ ဒးပြဟ်လလုဲအာလဝ်ရ။
အပ္ဍဲပရေၚ်ဗ္တိုက်ဂှ် နူကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်ဍာ်ဗု ခမရ စၟတ် ၄၀၆ ကဵု ၄၀၇ တံ ဘိုၚ်ပန်ကဵုလဝ် ကြပ်ကၠိုဟ်တ္ၚဲရောၚ် ဂွံတီကေတ် အတိုၚ်ဂလာန် ညးတာလျိုၚ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံရ။
ကြဴနူပေါဲဗ္တိုက်တုဲဂှ် ကရောၚ်ပၞာန်ကံၚ်ဇြဳပၞာန်ဝွံ ဖျေံဒပ်ပ္ဍဲဘာလကျာ် ကွာန် (ကျောက်ဝပ်ကုန်း) ဂှ်တုဲ တိက်လဝ်ဗ္တံရ။
ကရောၚ်ပၞာန်ဂှ်ဝွံ ပ္ဍဲဂိတုနဝ်ဝေမ်ဗာ ၂၅ အခိၚ်နူဂယး ၜိုတ် ၇ နာဍဳဂှ် နူကဵုကွာန် (ကျောက်ဝပ်ကုန်း) အခိၚ်ကရောၚ်ပၞာန် ကလေၚ်တိတ်ကၠုၚ်ဂှ် ဟိုတ်ဟွံမွဲမွဲသာ် ပန်ဂစိုတ်လဝ် ကောန်ကွာန် ဥူညာန်ယှိုဲ အာယုက်မၞုံ ၆၀ သၞာံပြၚ်ဂှ်တုဲ ကၠဟ်လဝ် ဗ္ဒါဲသ္ၚိဍာ်ဘာလကျာ်ရ။
အတိုၚ်ဂလာန် ညးဒေသတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ စနူဂိတုနဝ်ဝေမ်ဗာ ၁၈ တုဲကၠုၚ်တေံတုဲ ဒှ်ဒပ်ကံၚ်ဇြဳပၞာန် ဂေတ်ဒၟံၚ်ကွာန် နူကဵုကွာန်(ထိန်တွင်း) ပွိုၚ်ဍုၚ်လံၚ်လုၚ်တုဲ ထ္ပက်ဒၟံၚ်ကရောၚ်ပၞာန်ဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်တုဲ ညးဒေသ နူကဵုပွိုၚ်ဍုၚ်ဍာ်ဗု နူကဵုကွာန် (ပိန်းရှောင်၊ ကျောက်ဝပ်ကုန်း၊ နတ်တွင်း) ကဵု ညးဍုင်ကွာန် နူကဵုပွိုၚ်ဍုၚ်လံၚ်လုၚ် ကွာန် ( ထိန်တွင်း၊ ဖွားဘုတ်ပြင်၊ မြို့ဟောင်း) တံ ၜိုတ် ၁၀ ကွာန် လၟိဟ်မၞိဟ် ၅၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရ။
ကရောၚ်ပၞာန်ကံၚ်ဇြဳပၞာန်ဝွံ ပ္ဍဲဂိတုနဝ်ဝေမ်ဗာ ၂၁ တေံဂှ်လေဝ် အခိၚ်လုပ်စိုပ်ကၠုၚ် ပ္ဍဲကွာန် (မြို့ဟောင်း) ပွိုၚ်ဍုၚ်လံၚ်လုၚ်ဂှ် ရပ်ဂစိုတ်ဏာလဝ် ညးဍုၚ်ကွာန်ကောန်အရာပ်ၜါတၠဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ